Read lugbara Efuza 39 Bible Online

Efuza 39 - lugbara bible

Efuza 39

¹Bongo blururi pisi, okalako kalari pie, ekaruri pie, bongo mile be nyiriaruri pie, yi ede ani bongo suza sole onyiru tu, ’bani azi ngazu ani pari alatararoria ’diyi; yi ede bongo alatararu Aroni dri; ekile Yehovani azile Musa ma tiarile.

²Eri ede koti alinari mele pisi, blururi pie, okalakokalari pie, ekaruri pie, bongo mile be nyiriari pie.

³Yi di mele kparakalaru, osi eri izina ayabaru, eri osezu bongo blururi pi ma ruaa, okalakokalari pie, ekaruri pie, bongo mile be nyiriaruri pie, azi nderi ovu onduou ma dripamvu.

⁴Yi ede baka erini budriari iri ecizaru tualu, eci yi eri ma kalati iria.

⁵Baka onduouni cale ovupi eri ma ruaa eri ombezuri, yi ede bongo alu ’dasi, azini azi ngale ruaniari ma wura si i bongo adari be si si; ede eri bongo blururi pisi, okalakokalari pie, ekaruri pie, bongo mile be nyiriaruri pie; ekile Yehovani azile Musa tiarile.

⁶Azini yi ede oni onikiru ’diyi, osu yi mele yi bipi ci ’diyi ma alia, li yi ekile yini eceta sile oni driadriamva ma ruaari ma driarile, anzi Israelini ’diyi ma ru vusi.

⁷Eri ’ba yi koti alinari ma budria ovuzu oni Israeli anzi ma e’yo egazuriru; ekile Yehovani azile Musa tiarile.

⁸Eri ede bongo agatiari, azi onduou ma dri pamvu, azi nde ngale ruaniari ma wura si i koti alinari be si si, mele pisi, bongo blururi pie, okalakokalari pie, ekaruri pie, bongo mile be nyiriaruri pie.

⁹O’biza kalani ovu dria tro tro; yi agbo bongo agatia nderi mile iri, oconi ovu driale alu, walani driale alu indi, mileko iri,

¹⁰Yi oti oni eri ma ruaa bereto su su.Bereto okori sadiusi pi, topaze pie, karaboko pie;

¹¹bereto iriri emerode pi, safira pie, diamonde pie;

¹²bereto nari jasinte pi, agate pie, ametusito pie;

¹³bereto suri berule pi, oniki pie, jasipe pie; yi ovu ecizaru pari yinia mele yi bipi ci ’diyi ma alia.

¹⁴Oni ’diyi ovu Israeli anzi ma ru vusi, mudri drini iri ru yini vusi; ekile onduouni eceta sile oni driadriamva ma ruaari ma driarile, yi dria alu alu ma ru vusi, yi ovu suruti mudri drini iri ’diyini alu alu.

¹⁵Azini yi ede bongo agatiari ma ruaa anziriku ekile bakale ’diyi, mele alaru kale karisi;

¹⁶yi ede mele oni bipi ci ’diyi iri, ocoko meleru ’diyi iri, yi eci ocoko ’diyi iri bongo agatiari ma tia iri tro;

¹⁷yi su anziriku meleru kale ka ’diyi iri ocoko iri ovupi bongo agatiari ma ’tia ’diyi ma talaa.

¹⁸Anziriku iri kale ka ’diyi ma ti acepi iri ’diyi yi eci mele oni bipi ci ’diyi ma ruaa, yi ’ba yi koti alinari ma baka budriari ma dria agatialeru.

¹⁹Yi ede ocoko iri melesi, eci yi bongo agatiari ma ’tia iri tro, kala alialeru i isupi koti alinari beria.

²⁰Yi ede ocoko iri melesi, eci yi koti alinari ma baka budria iri’diyi ma ruaa valeru, kala agatialeru ogogo pari yini yi ti ’isuzuria koti alinari ma baka kale onduasiri ma drilia uruleru.

²¹Yi a’di bongo agatiari ocoko erinisi baka blururisi, ocoko koti alinari vileri be tualu, eri ma ovu ani koti alinari ma baka kale onduasiri ma dria, bongo agatiari kazu i ayuzu koti alinari ma ruaarisi ku; ekile Yehovani azile Musa tiarile.

²²Eri ede kanzu koti alinari vileri cazaru bongo blururisi dria;

²³ede, kanzu ma tile agadua ekile koti edele anzirikusiri ma tilele, tini ovu ecizaru kuru kuru dria bongo kale ’karisi, kazu i asizu ku beni.

²⁴Ka nzu ma ti eleria yi so patiefi pome, granateni ma wura, baka blururi pisi, okalakokalari pie, ekaruri pie, bongo mile be nyiriari pie.

²⁵Yi ede aiyoro mele alarusi, osa aiyoro nde pomegranate ’diyi ma eselia, kanzu ma ti eleri ma ageia dria;

²⁶aiyoro alu, patiefi pomegranateni alu, dika aiyoro alu, pomegranateni alu, kanzu yini sule azi ngazuri ma ti eleri ma ageia dria.

²⁷Yi ede koti bongo cale mile be nyiriarurisi, Aroni pi dri anzipi be,

²⁸ede vini bongo dri ombezuri bongo mile be nyiriarurisi, bongo onyiru sule dria ’diyi be bongo mile be nyiriarurisi, azini bongo paa ’diyi bongo mile be nyiriarurisi,

²⁹azini enyiriko opiliari edezaru bongo mile be nyiriaruri pisi, blururi pie, okalakokalari pie, ekaruri pie, onduou wura sopi bongo ruaari ma dripamvu;ekile Yehovani azile Musa tiarile.

³⁰Yi di mele alaru kparakalaru ecizu oku alatararuri ma dria, yi li e’yo siza drinia, ekile onduouni adrile eceta sile oni driadriamva ma ruaari ma driarile, ’dini, ALATARARU YEHOVA DRI.

³¹Yi a’di baka blururi eri ruaa, eri ecizu bongo dri ombezuri ma ruaa uru; ekile Yehovani azile Musa tiarile.

³²’Dini yi de bere hema ti ecizanirini ma azi dria ra; anzi Israelini ’diyi ’ye e’yo dria ekile Munguni azile Musa tiarile; yi ’ye ’dini.

³³Yi eji bere Musa vu, hema pi afa erini ’diyi be dria, afa erini eri ecizu ’diyi pie, bauni ’diyi pie, patini rwe rwe ’diyi pie, patini agoferu ’diyi pie, ’bileni ’diyi pie;

³⁴afa drini a’buzu edele kabiloago ma enyiriko ojale ekaru ’diyisiri pie, afa a’buza edele yianya ma enyirikosiri pie, bongo jo ale alizuri pie;

³⁵sanduku e’yo eti nzezaniri pie, pati eri ’duzu ’diyi pie, oguna yikiniri pie,

³⁶mesa pie, afazu erini ’diyi pie dria, mikate ecetaruri pie;

³⁷talapati alaruri pie, talani ma ada ’diyi pie o’bale yi ma paria, afa erini ’diyi pie dria, tala odu pie;

³⁸pari edeta edezu meleruri pie, odu osule osuri pie, obiese vele ve arikariruri pie, bongo ’ile hema tiliari pie;

³⁹pari edeta edezu molaruri pie, keikeini molaruri pie, patini eri ’duzu ’diyi pie, afa erini pie dria; awala rua ojizuri pie, pani pie;

⁴⁰bongo o’ile irii ageia ’diyi pie, agofeni pie, ’bileni ’diyi pie, bongo ’ile kalitiliari pie, bakani ’diyi pie, aloni ’diyi pie; azini afa dria bere ma azi ngazu, hema ti ecizaniri ma azi ngazu ’diyi pie dria;

⁴¹bongo sole onyiru tu sule azi ngazu pari alatararu ma alia ’diyi pie, bongo alatararu kuhani Aroni vile ’diyi pie, bongo anzipi vile ’diyi pie, yini sule azi kuhanini ngazu ’diyi.

⁴²Anzi Israelini ’diyi ’ye azi dria tro tro ekile Yehovani azile Musa ma tiarile.

⁴³Te Musa ne azi nde dria, azini mi ne, yi ’ye eri de ’bo; yi ’ye eri ’yeke ’yeke ekile Yehovani azilerile di ’bo. Te Musa nga di asi ndriza fe yi dri.