Read lugbara Efuza 4 Bible Online

Efuza 4 - lugbara bible

Efuza 4

¹Musa omvi e’yo, eri ’yo ra, Te mi ne, yi ngani e’yo mani a’i ku, yi ngani o’duko mani eri ku indi; te yi nga ’yo, Yehova efuni mi milia ’de ku.

²Te Yehova ’yo eri tia, Mi dria ’di a’di afani ya? Eri ’yo ra, Kalini.

³Eri ’yo ra, Mi ’be eri nyakua. Eri ’be eri nyakua, nga i oja uriru; Musa nzu erisi nzu nzu.

⁴Yehova ’yo Musa tia, Mi eju mi dri, mi bi sobini-eri eju i dri, bi eri ra, eri nga di ofu kaliru eri ma dria

⁵’dini yi ma a’i kini Yehova Mungu yi ma a’bipiniri, Mungu Iburahimuni, Mungu Isakani, Mungu Yakoboni, eri e’da i mi milia ’bo

⁶Yehova ’yo vini eri tia e’yo azini ’dini, Mi su mi dri mi agatia. Te eri su i dri i agatia; ka enze i agatiasi, mi ne, ofu nya eri ma dri emve forotoru.

⁷Mungu ’yo, Mi su mi dri mi agatia dika. ’Dini eri su i dri i agatia dika; te ka enze i agatiasi ’bo, mi ne, oja i dika ekile eri ma rua adarile.

⁸Te eri nga eca ’dini, yi ka mi a’i ku, yi ka eceta amboru okori ma o’duko eri ku, ka’dini yi nga eceta vileri a’i’i.

⁹Eri nga eca ’dini, yi ka eceta ’diyi iri tro a’i ku, azini ka 0’duko mini eri ku, ka ’dini mi nga yi eko yi ara Nilia, mi nga yiniri da nyaku a’wiru ma dria; te yi mini ekole yi ara Niliari nga i oja ariru nyaku a’wiru nderi ma dria.

¹⁰Te Musa ’yo Yehova tia, Wo wo! Opi la! Ecazu curu’do ti mani ndrini e’yo ’yozu ku, azini vini engazu mini ’baria e’yo ’yoria mi ati’bo be ’borisi ti, ma tini ovu be ’dinile; a’disiku ma e’yo ’yo e’yere, ma andreni adri e’yo ombe ombe.

¹¹Te Yehova ’yo eri tia, A’di ’ba ’ba tini ya? A’di ’ba ’bani ovuzu ti be ndi ndiruni ya, kani bile be dirinyaru, kani mile be afa ndrezu, kani afa ndrezu kurini ya? Eri ovuni ma’i Yehova’i ku va?

¹²Ka’dini mi mu di, ma nga ovu ti mini be tualu, ma nga mi imba e’yo mini ngale ’yolerisi ra.

¹³Te eri omvi e’yo kini, Opi la! mi pe tini ’ba mini lele tini peleri ma dria fo!

¹⁴Te Yehova ovu aokosi Musa vu, eri ’yo ra, Mi adri Aroni ’ba Levinini yo ya? Ma ni ra, ti erini eco e’yo ’yozaru onyiru; azini vini indi, mi ne, eri emu curu’do dri fuzu mi be, ka nga mi ne ’bo, asi eriniri nga ovu ayikosi,

¹⁵Te mi nga e’yo ’yo eri tia, mi nga e’yo ’ba eri tilia; ma nga ovu ti mini be, ti erini be indi, ma nga vini emi imba e’yo emini ngale ’yelerisi.

¹⁶Eri nga e’yo olu mi ma paria ’ba ongulumuru driliani; te eri nga eca ’dini, eri’i eri nga ovu tile miniru, mi’i mi nga ovu Mungu erinile.

¹⁷Te mi nga kali ’dori ’du mi dria, eceta amboru nde ’diyi ’yezu erisi.

¹⁸Musa mu ra, eri mvi Yetero i anyi vu, ’yo tinia kini, Ma zi mi tia, Kiri kiri mi ku nga ma mu mvi adripi mani angu Misiria ’diyi vu, yi nezu kani yi nga indi ya. Te Yetero ’yo Musa tia, Mi mu asi anzuru be.

¹⁹Te Yehova ’yo Musa tia angu Midiani ma alia, Mi mu, mi mvi angu Misiria; a’disiku ’ba ndra lepi mi fupi ’diyi odra di dria ’bo.

²⁰Musa ’du oku erini anzi be, ’ba yi akanya dria, mvi Misiria ra; te Musa nga di kali Munguni ’du i dria.

²¹Yehova ’yo Musa tia kini, Mi ka mvi Misiria ’dale ’bo, mi ma ne mi ’ye eceta dria mani fele mi dri ’diyi Parau drilia; te ma nga asi erini ’ba mbazaru, eri ngani ku ’ba nde ’diyini muzu ku.

²²Mi nga ’yo ’dini Farau tia kini, Yehova ’yo ’dini, Israeli eri amurumva mani okori’i,

²³ma ’yo mi tia ’bo, Mi ku mva mani ma mu azi ngazu ma dri ani; te mi oga geri eri dri mu kosi ’bo; mi ne, e’yo ’disi ma nga mva mini amurumvaru okori fu.

²⁴Eri eca ’dini, pari yini lazu geriaria, Yehova fu dri eri be, eri ’ye eri fu fu.

²⁵O’du nderisi Zipora eri ’du oni were cizaru, eri li mva ini ma agele, eri ’be enyiniri Musa ma palaa, ’yo ra, Ada mi de di ma dri izio ari ofupiri’i!

²⁶’Dini Mungu ku eri ra. O’du nderisi eri ’yo kini, Mi de di izio ari ofupiri’i, agele liza ma e’yosi.

²⁷Yehova ’yo Aroni tia, Mi mu roko dria dri fuzu Musa be. Eri mu ra, isu eri oni Munguni dria, eri o’de ’eri avasi.

²⁸Te Musa ’yo Aroni tia e’yo dria Munguni eri ti pele ’yozu ’diyi, azini eceta dria erini azile, eri dri ’yezu ’diyi.

²⁹Te Musa pi Aroni be yi mu ra, yi oku ’ba ’wara anzi Israelini ’diyi dria tualu.

³⁰Aroni eri olu e’yo dria Yehovani ’yole Musa tiari, azini eri ’ye eceta ’diyi ’ba ongulumuru milia.

³¹Te ’ba ongulumuru a’i ra; te yi ka eri Yehova andri anzi Israelini ’bo, ne candi yini ra, yi osu dri va inzizu.