Read lugbara Efuza 6 Bible Online

Efuza 6 - lugbara bible

Efuza 6

¹Yehova ’yo Musa tia, Mi nga e’yo mani ngale ’yele Farau driri ne curu’do; te dri okporusi eri nga ku yi muzu ra, azini dri okporusi eri nga yi dro angu erini aliasi.

²Te Mungu ’yo Musa be, ’yo tinia kini, Ma YEHOVA’i.

³Ma e’da ma Mungu Okpo be Turi’i ndra Iburahimu pi ma milia, Isaka pie, Yakobo pie, te yi nini ndra ma ru YEHOVA’iri ku.

⁴Azini vini ma ede aziza amani ama eselia yi beri pa sozu ’bo, angu Kananini yini ovuzu alenia ani’baruri fezu yi dri.

⁵Azini indi ma eri otaza anzi Israelini ’ba Misirini ombele ati’baru ’diyini ’bo, te ma ega aziza mani dika.

⁶E’yo ’disi ma ’yo anzi Israelini tia, Ma Yehova’i, ma nga emi ofu azi nzizaru ’ba Misiria ’diyini ma aliasi, ma nga emi otru ovuza emini ati’baruri ma aliasi, ma nga emi onze dri mani ejulerisi, e’yo liza amboru ’diyisi indi.

⁷Ma nga emi ’du ovuzu suru maniru, ma nga ovu Mungu eminiru, emi nga ni ma Yehova Mungu emini emi ofupi azi nzizaru ’ba Misiria ’diyini ma aliasi’ri’i.

⁸Ma nga emi ofi angu nde ndra mani dri engale eri fezu Iburahimu pi dri, Isaka pie, Yakobo pieria; ma nga angu nderi fe emi dri ovuzu awita eminiru. Ma Yehova’i.

⁹Te Musa ’yo ’dini anzi Israelini tia; te yi erini e’yo Musani ku candi yi asia azini ’bani yi ombele ati’baru yiki kokoruri ma e’yosi.

¹⁰Te Yehova ’yo Musa tia kini,

¹¹Mi fi, mi ’yo Farau opi Misiriari ma tia kini eri ma ku anzi Israelini ma fu angu erini ma aliasi.

¹²Te Musa ’yo Yehova drilia kini, Mi ne anzi Israelini yi erini e’yo mani ku; ka’dini Farauni nga ma eri ngoni ngoni ya,ma’i ovupi tile be li kokoruri?

¹³Te Yehova ’yo Musa pi tia Aroni be, e’yoni azizu anzi Israelini dri azini Farau opi Misiriari dri, anzi Israelini ofuzu angu Misiriniasi.

¹⁴’Ba suruti yi ma a’bipini ma drilia yi ’diyi: agupianzi Rubeni, mva oko Israelinirini yi ru Hanoki, Palu pie, Hezironi pie, Karimi pie; enyati Rubenini yi ’diyi.

¹⁵Agupianzi Simeonini ’diyi: Yemueli, Yamina, Ohadi, Yakina, Zohari, azini Saulo oku Kananiruri ma mva; ’diyi enyati Simeonini.

¹⁶Agupianzi Levini a’bianzi yini vusi ’diyi yi ru ’diyi: Gerisoni, Kohati, azini Merari; eli Levini adrizu nyakuari yi ovu turu alu kali na drini aziri.

¹⁷Agupianzi Gerisonini ’diyi: Libini pi Simei be, enyati yini vusi,

¹⁸Agupianzi Kohatini ’diyi: Amiramu, Izihari, Hebironi, azini Uzieli: eli Kohatini adrizu nyakuari yi ovu turu alu kali na drini na.

¹⁹Agupianzi Merarini ’diyi: Ma’i pi Musi be. ’Diyi ovu enyati ’ba Levini a’bianzi yini vusi.

²⁰Amiramu’du ati ma amvi Yokebedini oku iniru; ti eri dri Aroni pi Musa be; eli Amiramuni adrizu nyakuari yi ovu turu alu kali na drini aziri.

²¹Agupianzi Iziharini ’diyi: Kora, Nefegi, azini Zikiri.

²²Agupianzi Uzielini, diyi: Misaeli, Elizafani, azini Sitiri.

²³Aroni eri je Eliseba Nasoni amvi Aminadabu zini oku iniru; ti eri dri Nadabu, Abihu, Eleazari, azini Itamari.

²⁴Agupianzi Korani ’diyi: Asiri, Elikana, azini Abiasafu; ’diyi enyati ’ba Koranini ’diyini.

²⁵Te Eleazari mva Aronini je zamva alu ezoanzi Putielini ma eseliari okuru; eri ti eri dri Finehasi. ’Ba ’diyi ovu suruti yi ma a’bipini drilia ’ba Levini ma eselia a’bianzi yini vusi.

²⁶’Ba ’diyi Aroni pi Musa be, yi ovu ’ba Yehovani e’yo ’yozu yi tia ’diyi, kini, Emi ofu anzi Israelini angu Misirini aliasi ’ba ongulumuru yini vusi.

²⁷’Ba e’yo ’yopi Farau opi Misiriari ma tia anzi Israelini ofuzu Misiri ma aliasi ’diyi, yi ovu Musa nde pi Aroni be.

²⁸Eri eca ’dini, o’du Yehovani e’yo ’yozu Musa be angu Misiriniarisi,

²⁹Yehova ’yo Musa tia kini, Ma Yehova’i; mi ’yo e’yo dria mani ’yole mi tia ’diyi Farau opi Misiriari I tia.

³⁰Te Musa ’yo Yehova tia, Mi ne, tile mani ovu li kokoru, Farauni nga e’yo mani eri ngoni ngoni ya?