Read lugbara Efuza 7 Bible Online

Efuza 7 - lugbara bible

Efuza 7

¹Te Yehova ’yo Musa tia, Mi ne, ma ’ba mi,Mungule Farau dri; te Aroni mi adrini nga ovu nabi mini.

²Mi nga e’yo dria mani azile mi tiari ’yo; azini Aroni mi adrini nga ’yo Farau tia eri ma ku anzi Israelini ma fu angu eriniasi ra.

³Te ma nga asi Farauni ’ba mbazaru, ma nga fe eceta mani ezu kakau tali osutaru mani ’diyi be angu Misirinia.

⁴Te Farau ngani e’yo mini eri ku; ma nga dri mani ’ba angu Misirini dria, ma nga ’ba ongulumu mani suru Israeliniriru ’diyi ofu angu Misirini aliasi e’yo liza, amboru ’diyisi.

⁵Ma ka dri mani eju angu Misirini dria, anzi Israelini ofuzu ’ba Misirini ma eseliasi ra, yi nga ni ma ovu Yehova’i.

⁶Musa pi Aroni be yi ’ye ’dini; ekile Yehovani azile yi tiarile, yi ’ye ’dini ra.

⁷Ewu yini e’yo ’yozu Farau driliarisi, eli Musani ba de kali aro, azini Aronini ca de kali aro drini na.

⁸Yehova ’yo Musa pi ma tia Aroni be kini,

⁹Farau ka nga ’yo emi tia ’yozu kini, Emi eca tali emini osutaruri; mi nga di ’yo Aroni tia kini, Mi ’du kali mini, mi ’be eri va Farau drilia, ’dini eri ma oja i uriru ani.

¹⁰Te Musa pi Aroni be yi nga fi Farau vu, yi ’ye ’dini ekile Yehovani azile yi tiarile; te Aroni nga kali erini ’be Farau drilia ati’ba erini drilia indi, eri nga i oja uriru ani.

¹¹’Di ma vutia Farau nga ’ba onduaru ’diyi omve ’ba ojeru, ’diyi be; ’ba nde, ’ba ojouru Misiria ’diyi nga ’ye ’dini indi ondua yini olenirisi.

¹²Te ’ba ’diyi dria alu alu nga kali yini o’be va, kali nde nga yi oja uriru indio Te kali Aroniniri nga kali yini oki dria.

¹³Te asi Farauni ovu mbazaru ’dani, eri erini e’yo yini ku; ekile Yehovani ’yolerile.

¹⁴Yehova nga ’yo Musa tia, Asi Farauni ovu okporu, eri oga ’bani mukokoru si.

¹⁵Mi mu Farau vu dru o’bitisi, mi ne, eri fu muzu yia; mi nga pa so yi tia dri fuzu eri be, te mi ’du kali teka i ojapi uriruri mi dria.

¹⁶Mi nga ’yo eri tia, Yehova Mungu ’ba Ebraniani epe ma ti mi vu, kini, Mi ku suru mani ma mu ’dini yi ma nga azi ma dri angu roko driaria ani; te mi ne, kpere andru mi erini nga kiri ku.

¹⁷Yehova ’yo ’dini kini, E’yo ’diri ma alia mi nga ni ma ovu Yehova’i; mi ne, ma nga kali ma driarisi yi ara amboruri co, yi nderi nga i oja ariru.

¹⁸E’bi yi ara nde alia ’diyi nga odra ra, yini nga ngu ngu; ’ba Misiria ’diyi nga yi ara nderi ngu onzi mvuzaru.

¹⁹Te Yehova ’yo Musa tia, Mi ’yo Aroni tia kini, Mi ’du kali mini, mi eju mi dri yi Misirini dria, yi ara ma dria, yi nyiri ’diyi pie, yi atipi ati ’diyi pie, yi yi olipi nyiri nyiri ’diyi be, ’dini yi ma oja i ariru ani; te arini nga ovu angu Misirini dria ma alia, afazu wariru ’diyi ma alia, azini oni edele tijoru ’diyi ma alia dria.

²⁰Te Musa pi Aroni be yi ’ye ’dini ekile Yehovani azilerile; eri enga kali nderi uru, eri co yi yi ara ndeni Farau ma milia, ati’ba erini milia indi, yi dria ovupi yi ara aliari nga i oja ariru.

²¹E’bi yi ara nde ma alia ’diyi nga odra ra; yi ara nderi ngu ngu, ’dini ’ba Misiria ’diyi econi yi yi ara ndeni mvuzaru ku; te ari nderi ovu angu Misirini ma alia dria.

²²Te ’ba ojouru Misiria ’diyi yi ’ye ’dini ondua yini olenirisi indi, te Farau ma asi mba ’dani, eri erini e’yo yini ku; ekile Yehovani ’yolerile.

²³Te Farau oja i fi i vile joa,la ’bani asi e’yo ’di dria ku.

²⁴Te ’ba Misiria ’diyi dria ga ’bile yi ara amboru nde ria yi mvuza ndazu, yini ecole yi yi ara ndeni mvule kurisi.

²⁵Yehovani yi cozuri ma vutia, o’du aga aziri ra.