Read lugbara Efuza 8 Bible Online

Efuza 8 - lugbara bible

Efuza 8

¹Yehova ’yo Musa tia kini, Mi fi Farau vu, mi ’yo eri tia, Yehova ’yo ’dini kini, Mi ku ’ba mani ma mu, ma nga azi ma dri ani beni.

²Te mi ka ga yi dri geri feko si, mi ne, ma nga angu mini co dria odrudrusi traa kalatinia;

³yi ara nga ga odrudrusi tre tre, yi nga efu fi jo Olinia, nga fi jo mini lazuri ma alia, nga tu pari mini lazuri ma dria, azini yi nga fi ati’ba mini ma joa, ’ba mini ma dria indi, yi nga otu atiliku dria kpere wari mikate itizu ’diyi ma alia indi

⁴odrudru nde ’diyi nga ombu mi ruaa, azini ’ba mini ma ruaa, azini ati’ba mini dria ma ruaa indi.

⁵Yehova ’yo Musa tia, Mi ’yo Aroni tia, Mi eju mi dri kali be yi ara ’diyi ma dria, yi nyiri ’diyi pie, azini yi atipi ati ’diyi pie, odrudru ofuzu angu Misirini ma dri dria ani

⁶Te Aroni nga di i dri eju yi Misirini dria ra; odrudru efu ani, a’bu angu Misirini ma dri dria ci.

⁷Te ’ba ojouru yi ’ye ’dini indi ondua yini olenirisi, yi ofu odrudru angu Misirini ma dria.

⁸’Di ma vutia Farau nga Musa pi omve Aroni be kini, Emi zi Yehova tia, odrudru dria drozu ma vusi, ’ba mani ’diyi be; te ma nga ku ’ba ma mu edeta edezu Yehova dri ani beni.

⁹Musa eri ’yo Farau tia, Mi enya mi e’yo ’dori ma alia masi: ma zi Mungu mi dri, ati’ba mini dri azini suru mini dri, odrudru ma dri jazu dria emi vusi, jo emini ma aliasi o’du ngorisi, ’dini odrudru ma ovu kiri yi ara ma alia a’dule beni ya?

¹⁰Te eri ’yo tinia, Drusi. Musa ’yo ra, Ma ovu mini ’yolerile, ’dini mi ma ni Mungu azini i sipi Yehova Mungu amanileri aluni yo.

¹¹Odrudru nga mi ku, jo mini ’diyi pie, ati’ba mini pie, azini ’ba mini ’diyi pie dria; yi nga ace kiri yi ara alia a’dule.

¹²Te Musa pi Aroni be yi fu Farau vusi; Musa owu Yehova vu odrudru erini ofule Farau vu ’diyi Ma e’yosi.

¹³Te Yehova ’ye ekile Musani ’yolerile; te odrudru odra dria jo aliasi, dri driasi, azini amvuasi dria,

¹⁴Yi otro yi ma avu tualu ngulu ngulu, angu nga ani ngu onzi tu.

¹⁵Te Farau ka ndre oli li i ruaa were ’bo, asini mba kongoloko, eri erini yi ku; ekile Yeho’vani ’yolerile.

¹⁶Te Yehova ’yo Musa tia kini, Mi ’yo Aroni tia, mi eju kali mini, mi co irifura nyakuari, eri ma oja i uriru angu Misirini ma alia dria.,

¹⁷Yi ’ye ’dini; Aroni eju i dri kali be, co irifura nyakuari ra, uri efu ’ba ruaa azini anyapa ruaa indi; Irifura! nyakuari dria oja i uriru angu Misirini ma alia dria dria.

¹⁸Te ’ba ojouru yi o’bi ’ye ’dini indi ondua yini olenirisi uri ofuzu, te econi yi dri ku. Uri ovu ’ba ruaa azini anyapa ruaa dria.

¹⁹’Di ma vutia ’ba ojouru nga di ’yo Farau tia kini, ’Dori drileju Munguni fo! Te Farau ma asi ovu mbazaru, erini yi ku; ekile Yehovani ’yolerile.

²⁰Te Yehova ’yo Musa tia, enga o’bitisi kula kula, mi mu pa so Farau ma drilia; mi ne, eri fu mu yia; mi ’yo tinia, Yehova ’yo ’dini, Mi ku ’ba mani ma mu, ma nga azi ma dri ani.

²¹Te ka oga ’ba mani dri muko si, mi ne, ma nga onyu konyu o’biru ma ti pe mi dria, ati’ba mini pie, ’ba mini pie dria, jo emini ma alia indi; jo ’ba Misirini ’diyini nga ga tre onyukonyu o’birusi, yi nga nyaku ’bani ovuzu driniari a’bu ci.

²²Te ma nga angu Goseni ’ba: manini ovuzu aleniari ma esele co, ’dini onyukonyu o’biru ’diyi ma ovu ’daa ku; ’dini mi ma ni ma Yehova ovupi nyaku eseliari’i beni.

²³Ma nga ’ba mani esele co ’ba mini be. Eceta ’diri nga i ’ye drusi.

²⁴Yehova ’ye ’dini ra; onyukonyu: o’biru onzi candi fepi ’diyi fi Farau vile joa, azini ati’ba erini ma joa indi; angu Misirini dria ovu di ezazaru onyukonyu nde ’diyisi.

²⁵Te Farau omve Musa pi Aroni be kini, Emi mu edeta edezu Mungu emini dri angu ’doria,

²⁶Te Musa ’yo ra, Econi amani: ’yezaru ’dinile ku; ama nga edeta ’ba Misiria ’diyini ngule onziri ede Yehova Mungu amani dri. Mi ne, onyiru ama ede edeta ’ba Misiria ’diyini ngule onziri yi ma milia ya? Yi ngani ama o’be onisi ku ya?

²⁷Ama nga mu o’du pale na roko dria edeta edezu Yehova Mungu amani dri, ekile erini ngale azita fele ama dririle.

²⁸Te Farau ’yo ra, Ma nga geri fe emi dri ra ’bo, emini edeta edezu Yehova Mungu eminiri dri roko dria; te bani emi mu re tu i ku. Emi zi ma dri indi fo.

²⁹Te: Musa ’yo, Mi ne, ma di fu mi vusi, ma nga zi Mungu tia onyukonyu o’biru ma ku Farauni drusi, ati’ba, lerini pie, ’ba erini be; te di Farau ma ’ye lokirisi dika geri ogazu ’ba dri muzu edeta edezu Yehova dri ku.

³⁰Musa fu Farau vusi, zi Yehova tia ra.

³¹Yehova nga di ’ye ekile Musani ’yolerile, eri ’du onyukonyu o’biru ’diyi Farau vusi, ati’ba erini pie, ’ba erini be ra; aluni aceni ku.,

³²Te Farau ’ba asi ini mbazaru, dika o’du ’dirisi indi, kuni yi dri geri muzu ku.