Read lugbara Yobu 1 Bible Online

Yobu 1 - lugbara bible

Yobu 1

¹Agu azini mira indi angu Uziaria, runi Yobu’i; agu nde ndra ’ba e’yo kokoruri’i, eri ’ba kililini, eri ru Mungu, eri adri i ona e’yo onzisi.

²Ti i dri agianzi aziri ezoanzi na be.

³Lonyi erini ovu ’dini, kabilo alifu aziri, ngamia alifu na, ti ranya ecile kulumbusi e’bu osepi iri iri ’diyi alifu alu, akanya aroniru turu towi, ’ba eri ma joa ’diyi pie karakarau tu; ’dini eri ’ba amboni aga anzi angu etuni efurialeruria ’diyi ma azi dria ra,

⁴Anzi erini yi adri mu omu nya yi vile joasi alu alu o’du yiniria; adri ’ba ti pe yi amvipi na omvezu emuzu nyaka nyazu afa mvuzu yi be indi.

⁵Te eri ovu ’dini, o’du yini omu nyazu ’diyi ka yi de ra, Yobuni adri ’ba ti pe yi ’bazu alatararu, nga enga o’bitisi drio edeta vezaru ’diyi edezu yi ma kalafe vusi dria; a’disiku Yobu ’yo ra, Kani ma anzipi eza e’yo ra, Mungu o’dazu yi asia yani. Yobuni adri ’ye ’dinile etuzu ’dani.

⁶Isu o’du azinisi anzi Munguni emu yi e’dazu Yehova ma milia, te Satani emu alu indi yi ma eselia.

⁷Yehova ’yo Satani ma tia, Mi enga ngoa ya? Satani nga di e’yo omvi Yehova ma tia, ’yo kini, Ma ibi enga mani aciria ’dile ’dale nyaku ma dria, mani kelekele coria ’dale ’dole eri ma alia.

⁸Yehova nga ’yo Satani ma tia, Mi ega ati’bo mani Yobu ma e’yo ra ya? ’ba azini erile nyaku ma driani yo, eri ’ba e’yo kokori, ’ba kililiruni, ’ba Mungu rupi, i onapi e’yo onzisiri’i.

⁹Satani nga di e’yo omvi Yehova ma tia, nga ’yo kini, Yobuni Mungu ru oye ya?

¹⁰Mi toni kali eri ma ageia kuru, jo erini pie, afa dria erini ovuzu yi be ’diyi pie dria ku ya? Mi fe asi ndriza azi eri ma drini ’yele ’diyi ma dria ’bo, lonyi erini ezu tre angua.

¹¹Te di curu’do mi eju nga mi dri, mi elo afa ’ dria erini ovuzu yi be ’diyi ma rua, eri nga ani mi o’da va mi milia ’dia.

¹²Yehova nga ’yo Satani ma tia, Mi ndre, ma fe afa dria erini ovuzu yi be ’diyi ovu mi dria; te kiri mi ma eju dri eri ma ngulupi ma rua elozu ku. Satani nga di fu Yehova vurisi ani,

¹³Eri nga eca ’dini, o’du anzi erini ezoanzi erini be yini nyaka nyazu patiefi ma su mvuzu yi adri ambori ma joarisi;

¹⁴ojio nga eca Yobu vu kini, Ti yini e’bu seria, akanya aroni yini iribi nyaria yi ageia,

¹⁵’ba Sabeaa ’diyi o’de yi ma dria, nga yi opa jizu ra, ada yi ofu ati’ba seisi ’bo; kiri ma pa ma a’dule e’yoni ejizu mi vuni.

¹⁶Erini de e’yo ’yoria ’ba azini nga vini eca, kini, Aci Munguni e’de ’bua, ove kabilo piyi teketeke ati’ba be, ja yi dri dria; kiri ma pa ma a’dule e’yoni ejizu mi vuni.

¹⁷Erini de e’yo ’yoria ’ba azini nga vini eca, kini, ’Ba Kalideyaa ’diyi awa yi esele ongulumuru ongulumuru na, o’de ngamia ma dria, ji yi ra, ada ofu ati’ba seisi ’bo; kiri ma pa ma a’dule e’yoni ejizu mi vuni.

¹⁸Erini de e’yo ’yoria ’ba azini nga vini eca, kini, Agianzi mini piyi mi ezopi be yini de nyaka nyaria patiefi ma su mvuria, yi adri ambori ma joa;

¹⁹te mi mire, akuluku amboru enga angu roko driaria, co jo nde ma kala su ’diyi, eri asu i ani anzi nde ’diyi ma dria, yi odra ra; kiri ma pa ma a’dule e’yoni ejizu mi vuni.

²⁰Yobu nga di enga ra, nga i ma bongo ’beza asi ra, fa i ma dribi, eco iva nyakua inzizu.

²¹Eri ’yo kini, Ma efu ma andri ma opoasi pililiru, ma nga mvi pililiru; Yehova fe ra, Yehova omvi i ma afani; Yehova ma ru ma ovu di inzizaru.

²²E’yo ’diyi ma alia dria Yobu ezani ku, ’yoni Mungu ’yeni kililiru ku, ’dinini ku.