Read lugbara Yobu 11 Bible Online

Yobu 11 - lugbara bible

Yobu 11

¹Zofari ’ba Naamatini nga di e’yo omvi kini:

²E’yo ’yole o’biru ’diyi, omvini ku ya? ’Ba e’yo o’yopi tu ’diniri, ma la eri kililiru ya?

³Enyaza miniri fe ’bani adrizu cirini ya? Mini ’ba ’baria aparakaru, ’ba aluni mi dri drinza fepini yo ya?

⁴Mini ’yole kini, Imbata maniri eri alatararu, ma ovu ’ba alaruni mi ma milianirisi.

⁵Te Mungu ka te e’yo ’yo fo, i tile zizu e’yo ’yozu mi dria, ’yeke!

⁶Eri ka te e’yo zizaru onduani ’diyi ece mi dri, ’yeke Ondua erinini ovule esele be kakaurisi, Mi ma ni ani kini e’yo liza Munguni mi driari were, o’bini i ezata mini be aluni ku,

⁷Mi eco e’yo Munguni aliru va dii ’diyi ndazu isuzu ya? Mi eco Mungu Okpoe’i ma e’yo tini asizuri isuzaru ra ya?

⁸Eri uru kpere ’bua-mi eco ani, a’di ’ye ya? Eri valeru dii aga Pari ’ba drazani ra-mi eco ani a’di e’yo nizaru ya?

⁹O’bizaniri ovu izuru aga wudrikuru ra, eri walaru aga miri ra,

¹⁰Eri ka aga alenia, ka opi ci, ka ’ba omve e’yo lizuria, a’di eco eri ogazaruni ya?

¹¹Erini ’ba toko tokoa ’diyi nilerisi; eri adri vini e’yo onzi ndre indi, ka tro eri egani e’yoni ku ti,

¹²Te ’ba ondua kokoruri ma e’yo vaza yo, ada, osi ’ba ovuzu ekile akanya aseari ma mvale.

¹³Mi ka mi asi ’ba ’yeke, mi dri ejuzu eri vu,

¹⁴mi ka ovu e’yo onzi be mi dria, mi ’be eri ziti, mi fe e’yo kililiru kuri ma adri hema mini ma alia ku.

¹⁵Ka’dini mi nga di ani mi mile enga nyibele kokoru ada; ada, mi nga pa so okporu, mi ngani ovu urisi ku.

¹⁶Mini ngale candi mini ma e’yo avile rarisi: mi nga eri ma e’yo ega ekile yi nzupi ’borile.

¹⁷Idri mini nga ovu alatara tindiliru aga etuaga biriri ra; angu biza ka ovu indi ti, eri nga e’da ekile o’bitile.

¹⁸Mi nga ovu e’yo ’yaasi, asi tezani ovule indirisi; ada, mi nga angu nda mi ageiasi, ava lizu e’yo ’yaasi.

¹⁹Mi nga vini la va, te ’ba ngapi uri fepi mi drini yo; ada, ’ba dria nga mi mileti nda.

²⁰Te ’ba azi onzi ’yepi ’diyi ma mileni nga asa asa; yi ngani geri yini apazuri isu ku, asi teza yiniri nga ovu lu orindini fuzuri’i.