Read lugbara Yobu 12 Bible Online

Yobu 12 - lugbara bible

Yobu 12

¹Yobu nga di e’yo omvi kini:

²Ada, ’ba mgba emileni yo, emi ka odra ra, onduani nga asi emisi.

³Te ma’i indi, ma e’yo vaza be emile; emi ndeni ma ku. Ada, a’di nini e’yo ’dinile ’diyi: kunini ya?

⁴Ma ovu ekile agu ’ba eri ma jo ejelearini gule gurile; ’de vini ma ’ba Munguni omvepi, erini e’yoni omvizu tiniri’i; ’ba kililiru e’yo kokoruri ofu oguaru’do.

⁵Agu ovupi e’yo ’yaasiri ma asia drileonzi eri afa aparakaruni; te eri ngonde ’ba yi ma pani ’yezu nzozu ’diyi vu ogogo.

⁶’Ba oguouru ’diyi ma hema ovu drilebaru, ’ba fepi Munguni ovuzu adrasi; ’diyi ovu e’yo ’yaasi; Munguni adri afa fe yi ma dria kakau.

⁷Te emi zi nga e’yo anyapa asea ’diyi ma tia, yi nga mi imba ra; aria ’bua ’diyi ma tia, yi nga e’yo olu mini;

⁸kani mi ’yo e’yo nyaku ma tia, eri nga mi imba ra; e’bi miria ’diyi nga vini e’yo olu mi tia indi,

⁹Afa ’diyisi dria a’di nini kini Yehova ma dri ’ye e’yo ’dirini kuni ya?

¹⁰Afa idri be dria ’diyi ma orindi ovu eri ma dria, ava ’yaza ’ba driani be.

¹¹Bile o’bini e’yo ’yoza ekile ’ba ma tileni nyaka ma aji o’bilerile ku ya?

¹²Ondua eri ’ba deza ’diyini, e’yo vaza eri vini ’ba ovupi o’du kakau ’diyini.

¹³Te Mungu vu ondua pi okpo be indi; e’yo amaza pi e’yo vaza be yi erini.

¹⁴Mi ndre, eri afa onyo vani, te ’ba econi sizaru dika ku; eri ’ba ombe ci, te ayuzani yo.

¹⁵Mi ndre, eri yi raza bi, yi nzu ani ra; te dika eri yi nde ’diyi ofu, yi ti ra angu wudrikuru guzu olizu,

¹⁶Eci vu okpo pi ondua be indi; ’ba icile rari pi yi erini ’ba ’ba icipiri be.

¹⁷Eri ’ba e’yo amapi ’diyi ma afa opa ra yi jizu pirini, eri ’ba e’yo lipi ’diyi oja ovuzu ondua kokoru.

¹⁸Eri adri baka opini ’ba o’izu ’diyi otru yi o’izu opilea enyirikosi.

¹⁹Eri kuhani edeta edepi ’diyi ma afa opa yi jizu pirini, eri ’ba okporu ’diyi ogu va.

²⁰Eri ’ba ’bani asi ’bale drinia ’diyi fe ovuzu ndi e’yo ’yoza kokoru, eri ’ba ’wara ma e’yo vaza nze ra.

²¹Eri adri ’ba opiru ’diyi ede ede, eri ’ba okporuri ma enyiriko opiliari tru ra.

²²Eri afa aliru ele ’diyi ofu ini ma aliasi, eri dra ma endrilendri ofu ofizu

²³Eri suru fe ezuzu, eri vini yi dri ja: eri fe suruni yi erezu, eri vini yi ji ati’baru.

²⁴Eri ’ba ’ba nyakua ’diyi ma dri cepi ’diyi ma asi fe nze ra, fezu yini abazu roko dria pari gerini ovuzu yoria.

²⁵Yi angu nda drisi ini be, dizani ovule yorisi; eri fe yini acizu parapara ’ba ewani fulerile.