Read lugbara Yobu 13 Bible Online

Yobu 13 - lugbara bible

Yobu 13

¹Mi ne, ma ndre e’yo ’diyi dria ma milesi ra, ma eri ma bilesi, ma va eri ra.

²E’yo emini nileri, ma ni alu indi; emi ndeni ma ku.

³Ada, ma le te e’yo ’yo Mungu Okpoe’i ma tia, ma le e’yo nze Mungu be.

⁴Te emi onduou inzo lipi ’diyi; emi dria ojoou ’ba aza kopi ku ’diyi.

⁵Emi ka te adri ciri ’yeke fo! ’Diri te ovu ondua emini,

⁶Emi eri anga e’yo mani nzeleri, emi co bile e’yo eti mani nzele ma tisiri erizu.

⁷Emi nga e’yo kililiru ku ’diyi ’yo Mungu dri ra? Emi nga vini e’yo lokiriru olu eri dri ya?

⁸E’yo liza ma alia emi fi Munguniru ya? Emi nga agata ga Munguniru ya?

⁹Eri ka e’yo emini nda, eri nga ovu ba ya? Emi nga eri ici emini ’ba icilerile ya?

¹⁰Eri nga ega emi dria ada ada emi ka ’ba ope oyokolosi.

¹¹Emi ngani ’ye urisi ambo erinisi ku ya? E’yo erini uriuriruri ngani ’de emi dria ku ya?

¹²E’yo ’yoza emini egata fepi ’diyi yi e’yo o’beza ofutaru, kali emini yi kali odriru ’diyi.

¹³Emi adri ciri, emi ku ma ovu, ma ma ’yo beni; e’yo ka ngoni ti ka nga eca ma ruaa, ma eca ’dale eca.

¹⁴E’yo yo, ma nga za kalanya ma ruaari ’du ma sisi ceni, ma nga vini idri mani ’du ma drisi, ma’i.

¹⁵Ka tro ma fu ra ti, ma ce eri te ra; ma nga geri mani ma e’yo eti nze eri drilia.

¹⁶E’yo ’diri nga ovu ma dri pataru, a’disiku ’ba Mungu inzipi kuri econi cazaru eri ma drilia ku.

¹⁷Emi ’ba asi e’yo mani erizu fo! Emi fe e’yo eti nzeza mani ma fi emi bilia.

¹⁸Mi ndre, ma oti e’yo eti nzeza mani ’bo; ma ni ra ma kililiru.

¹⁹A’dini nga agata ga ma beni ya? Ma ka te nga adri ciri curu’do, ma orindini te fu ra.

²⁰Mi ma ’ye ma dri kiri e’yo iri ’diyi ku, ma ngani di ani ma zi mi miliasi ku beni:

²¹mi ’ba mi dri ma ruaa ku, e’yo uriuriru miniri ma fe uri ma dri ku.

²²’Dini mi omve, te ma nga e’yoni omvi ra; ka ku, mi ku ma e’yo ’yo raka, mi nga di e’yo omvi ma tia ndo.

²³E’yo onzi mani ’diyi pi ezata mani ’diyi be yi si ya? Mi fe ma ma ni ezata mani pi e’yo onzi mani be fo.

²⁴Mi zi mi mile masi, ma lazu mi ma ari’boru a’disi ya?

²⁵Mi nga patibi olini droleri inza ra ya? Mi nga anya drileko ma vuti dro ra ya?

²⁶Mini e’yo okangalikaru ’diyi sile e’yo manisirisi, mi fe mani e’yo onzi mani ’yele karilausi ’diyi nyazu awitaru.

²⁷Mi ofi ma pa pati okaliru ’ba pa ecizuri ma alia, mi one geri mani ’diyi dria ra mi osi lokiri ma pa ma kalasi kuru ci;

²⁸ma ka tro ovu afa maza i ezapi rarile ti, ekile bongo oduduni mbelerile.