Read lugbara Yobu 14 Bible Online

Yobu 14 - lugbara bible

Yobu 14

¹’Ba okuni osileri eri idriru o’du were, eri ga tre candisi.

²Eri efu patifule, eri onyu ra; eri vini apa endrilendrile, ovuni ’dani ku.

³Ka’dini mi mi mile zi ’ba male ’doni ’dori ma dria ma ejizu pari e’yo lizuria mi beraya?

⁴A’di eco afa alaruri ofuzu afa alata kokoruri ma aliasini ya? ’Ba aluni yo.

⁵Te mi li o’du erini ma kalafe ’bo, mba erini ma kalafe ovu mi vu ci, mi pe lokiri eri dri ’bo, eriniecozu agazu ani kuri;

⁶mi ku eri luzu ja, ’dini eri ma li ava beni, de nga eri deni o’du erini ku, ekile ’ba azi ngapi oyasirile.

⁷A’disiku ’ba ka pati ga ra, ’ba ovu asi tezasi eri nga eridika, azini arakalani edipi aroruri ngani asi ku.

⁸Olani ka tro eca dezaru nyakua ’bo, azini duluti erini ka ma nyakua ’bo,

⁹te ti, ozoo ma ajisi eri nga egbi ra, eri nga arakala gbi ekile pati edizani egbilerile.

¹⁰Te ’ba ka dra ra, eri ma ra; ada eri ma orindi fu ra, te eri ngoa ya?

¹¹Ekile yi mirini nzulerile, ekile yi razani yi okule were raka, erini nzule ndorile,

¹²’dinile ’ba la va, te engani dika ku; kpere ewu ’buni ngazu ovuzu dika yoria yi ngani enga ku, ngani oru o’duasi ku.

¹³Mi ka te ma zi Pari ’ba drazani ma alia fo! Mi ka te ma ta mba pari zizarua, de nga adra mini agani ku, ’yeke; mi ka te o’du pe ma dri, ma egazu, ’yeke fo!

¹⁴’Ba ka dra ra, eri nga ovu idriru dika ya? Ma eco tezaru o’du mani omba ’bazu ’diyi ma alia dria, de nga o’du yini ma truzuri ecani ku.

¹⁵Mi nga omve, ma nga di e’yo omvi mi tia ra; azi mi dri pamvuniri ma avani nga mi va ra.

¹⁶Te curu’do mi pa o’baza mani ma kalafe ola; mi luni ezata mani vu okposi ku ya?

¹⁷Mi ezata mani opi jurua ma alia ci, mi e’yo onzi mani ombe ra.

¹⁸Te ada, oni amboru ’de va, avi ra, oni kataru nga ovu nzezaru pariasi;

¹⁹yi raza adri oni otri ra; yi nde ka ti ra, eri adri irifura nyakuari ’du ra; ’dini mi asi teza ’bani ma dri ja.

²⁰Mi eri nde ’dani ’dani, eri mu ra; mi oja eri ma mile, eri ti pezu vile.

²¹Anzi erini fi inzita ma alia, te eri nini ku; omvi yi ele, te eri nini e’yo yini ku.

²²Te eri i ma ngulupi ma rua suza ega’i, orindi eri ma aliari ovu candisi isi.