Read lugbara Yobu 15 Bible Online

Yobu 15 - lugbara bible

Yobu 15

¹Elifazi ’ba Temanini nga di e’yo omvi kini:

²’Ba onduaru ma omvi e’yo nita tokorurisi, eri ma fe i ale ma tra oli engapi etuni efurialerurisi ya?

³Eri ma ga agata e’yo ’yoza orodri kokorurisi, kani e’yo oluza erini ecozu ani e’yo onyiru ’yezu ku ’diyisi ya?

⁴Ada, mi ku curu’do ruta ruzuri ra, mi oga ’bani Mungu ma e’yo egakokoru si.

⁵A’disiku e’yo onzi minini mi tile imba, mi pe andre lokiri beri’i.

⁶E’yo efupi mi ngulupi ma tiliari eri mi ndeni, ma ndeni mi ma’i ku; ada, mi ngulupi ma tini e’yo nze mi ruani.

⁷Mi ’ba tile ’ba dria ma drilia okori’i ya? Ti mi oni ambo ambo ’diyini oko ya?

⁸Mi eri e’yo amaza zizaru Munguniri ya? Mi ondua mi vileri ma dri ri ku lu miniru ya?

⁹E’yo mini nile amani nile kuri ngori ya? E’yo mini vale amani vale alu kuri ngori ya?

¹⁰’Ba ozoforo be ’diyi pi ’ba depi re ’diyi be, yi ama be; yi ma eli aga mi ati ma eli tu.

¹¹Asi omiza Munguni pi yi wereru tu aga ra mi milia, e’yo ’yoza mi ’yepi e’yereri be ya?

¹²Mi asi oja mi ndu a’disi ya? Mi mile bi ombasi,

¹³mini ani mi orindi ojazu Mungu vu ari’baru, mini ani e’yo ’dinile ’diyi kuzu efuzu mi tilea ’dini a’disi ya?

¹⁴’Ba eri a’dini, ’dini erini ovuzu alaru ya? ’Ba okuni osileri a’dini, ’dini erini ovuzu kililiru ya?

¹⁵Mi ndre, eri ’bani a’ita ’ba erini alatararu ’diyi ma alia ku, ada, ’bu ma ngulupi ovuni alaru eri ma milia ku;

¹⁶ka’dini ’ba onzikanyaru ngule onziri ovu alaru ngoni ngoni ya? agu e’yo onzi mvupi yi mvuzaleri’i!

¹⁷Ma nga e’yo ece mi dri, mi eri ma; ma nga e’yo mani ndrele ’bori olu’i

¹⁸(eri e’yo ’ba onduaru ’diyini olule ’bo, engazu yi ma a’bipi vu, ocile kuri’i,

¹⁹fe ndra angu yi dri a’dule, te ani’bo alini yi ma eseliasi ku).

²⁰’Ba onziri adri ovu rua suza be o’du dria, ada, eli ma kalafe pele kule ’ba ’ba inzapiri dri ’diyi ma alia dria.

²¹E’yo uriuriruri ma awu eku eri ma bilea; ewu erini ovuzu drileba berisi ’ba afa opapiri nga emu drinia rugbu.

²²Eri a’ini i nga fu angu iniruasi mvizu ’dini ku, azini seini eri teni.

²³Eri aci dri ci saaru nyaka ndazu, kini, Eri ngoa ya? Eri ni ra o’du inini ovu ngonde i tezu ogogo;

²⁴ocoko pi rua suza be fe uri eri drini; yi aga eri ra ekile opi ovupi ngonde ombasirile.

²⁵Erini i dri ejule Mungu vu ombasi ’borisi, erini afu ’yele ’dani Mungu Okpoe’i ma ruaarisi;

²⁶eri nzu eri vu ombe mbazasi, afa gombere ma agadua oseru ’diyisi;

²⁷eri ma mileni i a’bule ci ose dririsi, eri ma opileni otele ososi ’borisi,

²⁸eri la ndra aku andruru ’diyi ma alia ’bo, jo ’ba kokoru ’yepi yi asupi va ’diyi ma alia;

²⁹eri ngani ovu afa e’iru ku, lonyi erini ngani ovu ’ dani ku, afa kaza yini ngani yi dri elu nyaku vuleru ku; eri ngani fu angu iniruarisi ku; aci ma andreni nga fe arakalani ma ’wi ra,

³⁰eri nga mu ra ava eri ma tilearisi.

³¹Eri ma ’ba i asi afa toko ma dria a’itasi, i ma ngulupi icizu ’dini ku; a’disiku e’yo tokoru nde nga ofu ovu eri ma pangaru.

³²Yi nga eri ofe dria dria, de nga ewu erini ecani ku, arakala erini ngani ovuibiruku.

³³Eri nga efi ini wapi ku ’diyi oya zabibu patile, eri ma funi nga lu va ekile mizeitu dririle.

³⁴’Ba ongulumuru Mungu inzipi ku ’diyi nga ovu ondoru, acini nga ’ba afa ’ba ti razuri fepi ’diyi ma hema eve ra.

³⁵Yi adri e’yo ’ba ezazuri isu yi ma alia’i, yi nga e’yo onzi osi’i, yi ma aleni vini adri e’yo lokiriruri otu’i.