Read lugbara Yobu 16 Bible Online

Yobu 16 - lugbara bible

Yobu 16

¹Yobu nga di e’yo omvi kini:

²Ma eri e’yo ’dinile ’diyi kakau ’bo; emi dria ’ba asi omipi candi fepi ’ba dri’i ’diyi.

³E’yo ’yoza toko toko ’diyi ma asiza ci ya? Kani a’dini mi asi enga e’yo omvizuni ya?

⁴Ma indi, ma eco te e’yo ’yozaru emini ’yolerile, emi ka ovu ma ma paria; ma eco te e’yo ’yoza ecizaru tualu emi ruaa ra, ma eco te ma dri oyazaru emi vu ra.

⁵Ma te nga okpo fe emi dri ma tisi, asi omiza mani ’yole ma tilesiri te nga candi emini ma aza koni.

⁶Ma ka tro e’yo ’yo ra ti, ma candi deni i ku, ma ka ku e’yo ’yoko ja ti, candi ngori ku mani ya?

⁷Te curu’do eri fe ma ande kai ’bo; mi fe ’ba ma vile akua ’diyi ovu

⁸Mi fe ma rua ’wi ’bo, e’yo nde nze e’yo eti ma ruaani; oyiza mani enga ma ruaa ombaru, e’yo eti nzezu ma ruaa.

⁹Eri asi ma rua adra inisi, inza mara; erinya i ma siso ma ruaa; ari’bo mani adri i ma mile su ma ruaa.

¹⁰Yi azi yi tile walaru ma dria, yi sa ma o’boloa ma o’dazu, yi oku yi tualu ma dri aruzu.

¹¹Munguni ma fe ’ba Mungu inzipi ku ’diyi ma dria, ma ’bezu ’ba azi onzi ’yepi ’diyi ma dria.

¹²Mani ndra ava liria, eri nyo ma mgbiri; ada, eri bi ma ombelekoa, a’be ma va mani ma onyozu nyingiriki; eri i’di ma cazaru liru,

¹³’ba erini osu be ’diyi ace ma kuru. Eri ali ma oroefi mgbiri, ’yeni ma vu yikisi ku; eri ada ma oji nyakua.

¹⁴Eri ri ma onyo drile drile, eri esa ma dria ekile agu ambotilirile,

¹⁵Ma ci koliba enyi ma ruaari a’buzu, ma ’ba o’yu mani va irifura ma alia.

¹⁶Ma andretini afo afo mani mindre osulerisi, dra ma endrilendri ovu ma mile ongoro’bo ma dria;

¹⁷ka tro ma ’yeni ’ba eganasi dri ma driarisi ku ti, zita mani Mungu vuri alatararu.

¹⁸Mi nyaku la! mi a’bu ma ari ku; wuta mani ma isu pari ava lizuri ku fo!

¹⁹Te di curu’do, mi ndre, ’ba e’yo mani ma eti nzepiri eri ’bua ci, ’ba e’yo mani ecepiri eri ’bua uru.

²⁰Ma agyi yi ede ma ra; te ma mileni mindre osu Mungu vu,

²¹eri ka te eco ’ba ma e’yo kililiruri ma eti nze Mungu vu, ’yeke fo, ekile ’ba ma orini e’yo eti nzele ’ba i ma jo ejeleari dririle!

²²A’disiku eli were ka nga aga ’bo ma nga mu geri maru emvizu ani dika kuria.