Read lugbara Yobu 18 Bible Online

Yobu 18 - lugbara bible

Yobu 18

¹Bilidadi ’ba Suhini nga di e’yo omvi kini:

²Emi nga e’yo ’yoza mba bizu izu ngopi ya? Emi ega, ’ di ma vutia ama nga e’yo ’yo ndo.

³Ama ovu lazaru anyapale a’disi ya? ofuzu vini afa alata kokorurile mi milia ya?

⁴Mi mi ngulupi osipi aoko minisiri, yi nga angu wudrikuru ku mi e’yosi ya? Onini nga i nze i pariasi ya?

⁵Ada, yi nga ’ba azi onzi ’yepi ’diyi ma diza inyu ra, aci nyiri eriniri ngani di ku.

⁶Dizani nga i oja iniru hema erini ma alia, tala eri ma driliari nga i inyu ra.

⁷Yi nga acita erini pasi okporu ’diyi oga si, e’yo erini amaleri nga eri ’be vani.

⁸Pa erini ma ngulupi fe erini ’dezu emba aliani, eri aci awi galeri ma dria.

⁹Gbagbani nga eri ma paedu ru ra, ongani nga eri bi ra.

¹⁰Zi vuluvulu eri mbazu nyakua, ga awi geria eri bizu.

¹¹Afa uriuriru ’diyi nga uri fe eri dri kalasi dria, yi nga eri ma vuti dro kpere eri ma paedu tuzu piindi piindi.

¹²Abirini nga okponi ndeni, ocokoni nga ovu ngonde aci erini parapararuri tezu.

¹³Eri nga rua erini ma esele nya dria ra, ada, dra ma mva kayuri nga rua erini ma esele nya ra.

¹⁴Yi nga eri nze pi ola be hema erini a’ita ’bazu driniariasi, nga eri ji opi uriuriruri vu.

¹⁵Afa ovupi erini yori nga adri hema erini ma aliani; yi nga baruti ri pari erini ovuzuri ma dria.

¹⁶Ola eri ma etia vari nga ’wi ra, arakalani drinia ururi nga onyu ra.

¹⁷’Ba ngani e’yo erini ega nyakua dika ku, yi ngani eri ma ru nze geria ku.

¹⁸Yi nga eri dro engazu etuasi fizu inia, yi nga eri ma vuti dro okposi ngazu angu wudrikuruasi ra.

¹⁹Eri ngani ovu mva be, kani mvi ma mva be, ’ba ma eselea ku, ’ba erini aluni ngani ace pari ndra erini ovuzuria ku.

²⁰’Ba etuni ’derialeru ’diyi osu eri ma o’dusi osu, ekile ’ba etuni efurialeru ’diyini ovule urisirile.

²¹Ada, jo ’ba kililiru ku ’diyini yi ’dini, ’di pari ’ba Mungu nipi kurini.