Read lugbara Yobu 19 Bible Online

Yobu 19 - lugbara bible

Yobu 19

¹Yobu nga di e’yo omvi kini:

²Emi nga candi fe ma orindi dri ma onyozu nyingiriki e’yo ’yozasi izu ngopi ya?

³Emi inza ma dri paleko mudri ’dipi; te emi ovuni drinzasi emini ma ’yele okposirisi ku.

⁴Ma ka eza ra ada, ezata nde maniri ovu ma ngulupi be.

⁵Emi ka nga emi enya omba ’bazu ma be ada, emi ka nga ma esu, yini ma mvile elerisi,

⁶te di emi ma ni kini Mungu nde mani, ma acezu kuru emba erinisi.

⁷Mi ndre, ma otre kini, Yi ma afa opa okposi ’do yo! te ’ba ma eripini yo; ma wu aza koza ndazu, te e’yo lizani yo.

⁸Eri ase ma geria ci, ’dini ma ma aga ku beni, eri ’ba angu biza ma letia ci.

⁹Eri tru diza mani ma ruaasi ra, eri nze oku ma driarisi ’bo.

¹⁰Eri ogu ma va kalasi dria, ma afi ndru ’bo, eri nze asi teza mani ’bani pati nzelerile.

¹¹Eri ma adra ko vini ti, ve ma ruaa, eri la ma ovuzu i ma ari’boru.

¹²’Ba ongulumuru erini ’diyi emu tualu; yi geri yini ede etuzu omba ’bazu ma be, yi hema yini aso hema mani ma ageia kuru.

¹³Eri awa ama esele ma adripi be ziri ziri, ’ba ma nipi ’diyi oja yi ma jururu.

¹⁴Ori’ba mani ku ma ’bo, agyi mani nile tu ’diyi avi masi ’bo;

¹⁵’ba ovupi ma joa ’diyi pi ma milia, ezoanzi mani ati’baru ’diyi be, ma ovu ekile ’ba nile kurile; ma ani’boni yi ma milia.

¹⁶Ma ati’bo mani omve, te eri omvini e’yo ma tia ku, ma ka tro matu ’ba eri vu ma tisi ti.

¹⁷A va ’yaza mani ovu onzikanyaru oku mani dri, ma onzikanyaru ayiaanzi mani dri.

¹⁸Ka tro anzi nyiri nyiri ’diyi ti, ede ma indi; mani engaria yi e’yo onzi ’yo ma ruaa.

¹⁹’Ba dria mani ovuzu yi be agyiru tu ’diyi ngu ma onzi, ’ba mani lele ’diyi oja yi ma ari’baru.

²⁰Ma fala ebi yi ma enyi pi ma ruaa ma kalanya be, ma pa ma kiri enyi ma siniri be.

²¹Emi ma ovu ma vu yikisi fo, emi ma ovu ma vu yikisi fo, emi ma agyi la! Mungu ma drini ma rua elole rarisi.

²²Emi ma inza Mungule a’disi ya? Emi trani kalanya manisi ku a’disi ya?

²³Ka te e’yo mani ’yole ’diyi osi curu’do ci, ’yeke! Ka te yi osi buku ma alia ra fo!

²⁴Ka te yi osi kalamu ayaru pisi aya risasini, menemeneruri be yi ekpazu oni ruaa ’dani ’dani, onyiru tu fo!

²⁵Te ma ni ’Ba ma Onzepiri ovu idriru, eri nga pa so ewu vilerisi nyaku ma driani;

²⁶ma enyini dri jazu ’dini ’bori ma vutia, ma ka tro ovu rua kokoru ti, ma nga Munguni ndre ra;

²⁷ma ngulupi nga eri ndreni, ma nga eri ndre ma milesi ma’i, ’ba azini yo. Ma asi fu avanisi ra!

²⁸Emi ka ’yo ra, Ama nga eri inza ’doni ya! azini, Yi isu e’yo nderi ma ola eri ma alia indi, ’dini;

²⁹emi ma ovu di urisi sei ma e’yosi, adrani panga seiniri ejilenirisi, emi ma ni ani e’yo liza indi beni.