Read lugbara Yobu 2 Bible Online

Yobu 2 - lugbara bible

Yobu 2

¹O’du azini anzi Mungunini emuzu yi e’dazu Yehova ma miliari eca vini dika. Satani emu vini indi yi ma eselia i e’dazu Yehova ma milia.

²Yehova ’yo Satani ma ria, Mi enga ngoa ya? Satani nga di e’yo omvi, ’yo Yehova ma tia kini, Ma ibi enga mani aciria ’dile ’dale nyaku ma dria, mani kelekele coria ’dale ’dole eri ma alia.

³Yehova nga ’yo Satani ma ria, Mi ega ati’bo mani Yobu ma e’yo ra ya? ’ba azini erile nyaku ma driani yo, eri ’ba e’yo kokoruri, ’ba kililiruni, ’ba Mungu rupi, i onapi e’yo onzisiri’i. Eri kuni nga e’yo ini kililiruri ku, ka tro mi fe ma enga eri ruaa eri dri jazu e’yo kokoru ti.

⁴Satani nga e’yo omvi Yehova ria, ’yo ra kini, Enyi enyi ma paria! Ada ’ba nga afa erini ovuzu yi be ’diyi ofe dria idri ini ma paria.

⁵Te mi eju mi dri curu’do, mi elo eri ma fala pi rua be, eri nga mi o’da kpere va mi milia ’dia.

⁶Yehova nga ’yo Satani ma ria, Mi ndre, ma fe eri mi dria; te kiri mi ma ku idri erini’i.

⁷’Dini Satani nga fu Yehova ma miliasi, nga Yobuni co apipi onzikanyarusi kurubu, engazu eri ma pa agelea kpere eri ma dri olubua.

⁸Eri nga ajirikolo ’du i rua fazu, nga di ri ofuta ma alia.

⁹Oku erini nga di ’yo eri ma ria kini, Ka adri ’dini, mi ebi mi e’yo mini kililiruri be ’dani ya? Mi o’da Mungu, mi dra di ani beni.

¹⁰Te eri ’yo eri ria, Mi ’yo ekile oku ondua kokoru ’diyi ma azini ’yolerile. Ngoni ya? Ama nga e’yo onyiru a’i Mungu dri lu’i, ama ngani e’yo ewaru a’i ku ya? E’yo ’diyi ma alia dria, Yobu ezani e’yo i tisi ku.

¹¹Te di Yobu ma agyi na ’diyi ka e’yo onzi dria ecapi eri ma ruaari ma e’yo eri ra, yi dria alu alu enga yi ma ngulupi ma pariasi, Elifazi ’ba Temanini pi, Bilidadi ’ba Suhini pi, Zofari ’ba Naamatini pie. Yi otu e’yo yi eselia emuzu eri owuzu, azini asini omizu.

¹²Yi ka yi mile enga uru ziri, yi nini eri ku; yi nga di wu o’duko urusi; yi alu alu nga yi ma bongo ’beza asi ra, nga irifura omvu uru yi ma dria.

¹³’Dini yi ri va nyakua eri omvezu o’du aziri ini be rra, te ’ba aluni ’yoni e’yo azini eri ma ria ku, yini ndrele candi erini ovu amboru turisi.