Read lugbara Yobu 20 Bible Online

Yobu 20 - lugbara bible

Yobu 20

¹Zofari ’ba Naamatini nga di e’yo omvi kini:

²E’yo ’disi asisile mani omvi e’yo ma tia ceni, asi ngiringiri manirisi.

³Ma eri mini egaria ma dria drinza fezu ma dri ’bo, orindi e’yo vaza manirini omvi e’yo ma tiani.

⁴Mi nini e’yo ’diri drio, engazu ewu ’ba ’bazu nyaku driarisi ku ya?

⁵Kini ’ba azi onzi ’yepi ’diyi ovu drilebaru ewu were toko, ’ba Mungu inzipi ku ’diyi ma ayiko ovu etu were a’dule.

⁶Ka tro eri ma inzita tu ’bua uru, eri ma dri ka tro ca kpere iriti elozu ti,

⁷te eri nga dri ja ’dani ’dani i ma ngulupi ma dakale; ’ba ndra eri ndrepi ’diyi nga ’yo ra, Eri ngoa ya?

⁸Eri nga ali ndru orobile, yi ngani eri isu ku; yi nga eri dro ekile afa ndreza inisirile.

⁹Mile ndra eri ndrepiri ngani eri ndre dika ku, pari erini ngani vini eri ndre dika ku.

¹⁰Anzi erini nga yiki nda ’ba alioru ’diyi vu, eri ma drini nga lonyi erini omvini.

¹¹Fala erini ga tre okpo erini karilaunirisi, te okpo nde nga la va eri be tualu irifura ma alia ra.

¹²E’yo onzi ka tro ovu eri ma tilia aluzaru, eri ka tro eri zi i andre ma etia ti,

¹³ka tro le eri ku muzu ku, eri ka tani mba i tilia ci ti,

¹⁴nyaka eri ma alia nga i oja ra; nga ofu uri ’boroaruri ma ’yule eri ma alia.

¹⁵Eri ki lonyi ’bo, te eri nga yi ogbe dika; Munguni nga yi ofu eri ma aliasi ra.

¹⁶Eri nga ’boroa ma ’yu mbe; uriohulu ma andreni nga eri fu ra.

¹⁷Eci ngani yi ara ndre ku, yi raza rapi anyuoso pisi buta be ’diyi.

¹⁸Eri nga afa erini i ecandizu azinisiri omvi ra, ngani eri ki ku; eri ngani ovu ayikosi lonyi erini isulerisi ku.

¹⁹A’disiku eri inza ’ba alioru ’diyi, ku vini yi ’bo, eri pa ’ba azini ma jo, te sini eri ageini tezu ku.

²⁰Erini asi anzuru nile i alia ci kurisi, eri ngani di afa erini lele tu ’diyi ma azi opa aluni ku.

²¹Afa acepi erini nyale kuni yo; e’yo ’disi drileba erini ngani ovu ’ dani ku.

²²Eci ma lonyini dri fule ciri ti, alioni nga eri ndeni; ’ba dria alu alu candi be ’diyi ma drini nga ovu eri ma i

²³Eci ma aleni ’yeria traria Munguni nga aoko erini okari da eri ma dria ra, eri nga ’di eri ma dria ozoole erini de nyaka nyaria.

²⁴Eri nga apa afa ombani ayarurisi; osu edele molasiri nga eri gbi lekeke.

²⁵Eri enze eri, eri efu eri ma ruaarisi ra, ada, ’ye nde ma si dipi ndrindriri efu eri ma oji ma aliarisi; eri di eri dri uriuriru tu.

²⁶Ini iniciciruri te lonyi erini opazu; aci ’ba ma adani ovule kuri nga eri ve ra; eri nga vini afa acepi jolokoru eri ma hema ma aliari eve indi.

²⁷’Buni nga ’eyo onzi erini e’da, nyakuni nga vini enga e’yo eti nzezu eri ma ruaa ra.

²⁸Afa ezupi tre eri ma joa ’diyi nga fu ra; afa erini nga avi mu ra o’du Munguni adra ’bazurisi.

²⁹’Diri bani afa ma esele Munguni awale ’ba azi onzi ’yepiri driri, awita Munguni pele eri driri eri ’di.