Read lugbara Yobu 22 Bible Online

Yobu 22 - lugbara bible

Yobu 22

¹Elifazi ’ba Temanini nga di e’yo omvi kini:

²’Ba eco ovuzaru Mungu dri orodriru ra ya? Ada, ’ba onduaruri eri orodriru i ma ngulupi dri.

³Mi ka ovu kililiru, e’yoni ayiko fe Okpoe’ini dri ra ya? Mi ka geri mini ’ba ezata kokoru, e’yoniri orodriru eri driraya?

⁴Eri ega mi dria mini eri rulerisi, erini fizu mi be e’yo liza ma i alia ya?

⁵Azi onzi mini ovuni amboru ku ya? E’yo onzi mini asini ku.

⁶A’disiku mi a’i afa toboru mi adri dri toko, mi otru ’ba pililiru ’diyi ma bongo ’bo.

⁷Mi feni yi mvuza ’ba andepiri dri ku, mi oga nyaka feko ’ba abiri beri dri si.

⁸Te ’ba okporuri nya angu ra, ’ba inzita beri adri alenia.

⁹Mi pe awuzi ma ti mvizu pirini, mi onyo ’ba ata kokoru ’diyi ma wu ra,

¹⁰E’yo ’disi vuluvulu ovu mi ageia ci, mi asi oti uri eceapi rugburisi;

¹¹kani angu biza, mini ani angu ndrezu kurisi, yi tipi turi a’bu mi dri ci.

¹²Mungu ovuni ’bu uru turia ku ya? Mi ndre ’bi’bio, yi uru tu tu ’doni ya!

¹³Te mi ’yo ra kini, Mungu ni a’di e’yoni ya? Eri eco e’yo lizaru angu bipi iniciciruri ma eseleasi ya?

¹⁴Iriti iniru ’diyi a’bu eri, erini nezu ani kuni, eri aci angu ’buari ma ageiasi kuru.

¹⁵Mi nga geri oku ’ba onzi ’diyini acizuri ma ta mba ya?

¹⁶Opa ’ba nde ’diyi yi o’duzu de nga ewu yiniri eceani ku; anzu yi ma jo eti ekile yi tizale.

¹⁷’Ba nde ’yo Mungu tia, Mi da mi ama vurisi ra; azini, Okpoe’i eco ama dri a’di ’yezaru ya?

¹⁸Te ti, eri fe ndra yi ma joni gazu tre tre afa onyiru ’diyisite e’yo ’ba onzi ’diyini amaleri ovu ma vu ziri.

¹⁹’Ba kililiru ndre ra, ovu ani ayikosi; ’ba e’yo kokoru ’diyi ogu yi, Yi ’bazu aparakaru,

²⁰kini, Ada ja ’ba ndra engapi ama ruaa ombaru ’diyi ma dri ’bo, aci eve ’ba joloko yini acepi ’diyi ’bo.

²¹Emi ni emi Mungu be, emi ovu a si anzurusi ani; ’dini e’yo onyiruni nga eca ani mi vu beni.

²²Mi a’i imbata efupi eri ma tiari fo, mi mba e’yo ’yoza erini ma ta mi asia.

²³Mi ka nga mvi Okpoe’i vu, eri nga mi edre uru, mi ka nga e’yo kililiru kuri ’ba hema mini vusi ziri.

²⁴Mi ’ba lonyi mini va irifura ma alia, mi ’ba mele Ofiriari oni yi raza ma alia ’diyi ma eselia;

²⁵Okpoe’ini nga ovu lonyi miniru, eri nga ovu mi dri dahabu aje nyapi turile.

²⁶’Dini ayikoni nga di mi fu Okpoe’i ma e’yosi, mi nga mi mile enga Mungu

²⁷Mi nga zita mini zi eri tia, eri nga mi eri ra; mi nga oyo mini sole ’diyi ofe ra.

²⁸Mi nga e’yo azi, e’yoniri nga pa so mi dri ra, dizani nga di geri mini ma dria.

²⁹Ka ’ba ’be va, mi nga ’yo ra, Engaza ururi ci; Munguni nga ’ba afu kokoruri pa ra.

³⁰Eri nga ’ba e’yo kokoruri ari ra; ada, mi dri alani nga fe mi pa eri drini.