Read lugbara Yobu 26 Bible Online

Yobu 26 - lugbara bible

Yobu 26

¹Yobu nga di e’yo omvi kini:

²Mi ’ba okpo kokoruri ma aza ko ’doni ya! Mi ’ba ma wu okpo kokoruri pa ’doni ya!

³Mi e’yo amaza fe ’ba ondua kokoruri dri ’doni ya! Mi nita onyiruri ma e’yo olu fudri ci ’doni ya!

⁴Mi olu e’yo ’diyi a’di ma tia ya? A’di ma orindi ibi efu mi aliani ya?

⁵’Ba odrapi ’bo ’diyi ma ruani oya oya yi mirini ma etia, ’ba ovupi alenia ’diyi be.

⁶Pari ’ba drazaniri pililiru Mungu ma milia, Abadoni ma afa a’buzani yo.

⁷Eri angu andraleruri aja pari piriniri ma dria, eri angu wudrikuru ’juru, te afa erini eri ’izu ruaniani yo.

⁸Eri yi ozooruri ombe i vile iriti inicicirurisi, te iriti nde asini i yi nde ma etia ku.

⁹Eri oguna ini opiniri ma drile ase ci, eri i vile iritini aja drinia.

¹⁰Eri si lokiri kurukuru yi miriari ma milia, cazu kpere kalati etu pini ini beria.

¹¹Idiafe ’bua ’diyi oya oya, yi osu tu erini egaria yi driaria.

¹²Eri fe mirini ombuzu okpo inisi; eri ’di Rahabuni ka i e’yo vaza inisi.

¹³Eri ede angu ’buari ndrizaru Orindi inisi; eri so uri nzupi hwiori i ma drisi.

¹⁴Mi ndre, afa ’diyi yi kiri geri erini ma kalati amve ’diyi a’dule; te ama eri e’yo erini o’duko were oyokolorusiri’i a’dule ’doni ya! Te a’di eco okpo eriniri ma noza ma e’yo vazaruni ya?