Read lugbara Yobu 27 Bible Online

Yobu 27 - lugbara bible

Yobu 27

¹Yobu nga vini e’yo o’beza eriniri e’do ’yo dika, kini:

²Ekile Mungu e’yo kililiru maniri nzepi ’borini ovule idrirurile, ekile Okpoe’i ma orindi eceandipi ’borini ovule idrirurile;

³ma idrini nga ovuria ma alia indi, orindi Mungunini nga ovuria ma omvulea ci,

⁴ada ada, ma ngani e’yo kililiru kuri ’yo ma tisi aluni ku, ma andre ngani vini e’yo lokiriruri ’yo ku indi.

⁵Ma econi emi lazaru ’ba kililiru aluni ku; de nga ma drani ku ma ngani e’yo kililiru maniri ku ku.

⁶Ma nga e’yo kililiru maniri bi ci, ma ngani eri ku ku; ma asi ngani ega ma dria ku, de nga ma drani ku.

⁷Ari’bo mani ma ovu ekile ’ba azi onzi ’yepirile fo, ’ba engapi ma ruaari ma ovu ekile ’ba kililiru kurile.

⁸Te ’ba Mungu inzipi kuri ma asi teza ngoni, Mungu ka nga eri li va ’boria, Mungu ka nga eri ma orindi ’du raria ya?

⁹Munguni nga eri ma wuta eri candini caria driniaria ra ya?

¹⁰Eri nga ovu ayikosi Okpoe’isi ya? Eri nga Munguni omve etuzu ra ya?

¹¹Ma nga emi imba dri Munguni ma e’yosi; e’yo ovupi Okpoe’i vu ciri ma ngani oci ku.

¹²Mi ndre, emi ma ngulupi dria ndre eri ’bo; emi oja di emi tokoru teketeke a’disi ya?

¹³Afa ma esele Munguni awale ’ba azi onzi ’yepirini, azini ’ba ’ba inzapi ’diyi ma awuruso yini a’ile Okpoe’i vuri eri ’di:

¹⁴anzi erini ka nga ezu kakau ti, yi ezu seini; ori erini ngani tra enyasi ku.

¹⁵’Ba erini ma joloko acepi ’diyi yi nga yi osa drasi, oku erini awuziru ’diyi ngani awu wu ku.

¹⁶Ka tro eri dahabu oku odrozaru i dri irifurale ti, ka tro bongo ede kakau odrile;

¹⁷eri ka yi oku ra ti, te ’ba kililiru ’diyi nga yi osuni, ’ba e’yo kokoru ’diyi nga dahabu nde awani.

¹⁸Eri jo ini si ebiole, ekile moroo ’ba amvu agei tepirini silerile,

¹⁹Eri la va afa e’iru, te ngani ’ye ’dini dika ku; ka i mile enga o’duarisi ra, isu avi ’bo.

²⁰E’yo uriuriruri bi eri ra, isu eri yi tizale; akuluku ’du eri oguoule inisi.

²¹Oli engapi kala etuni efuria leruriari ji eri ra, eri mu ra; eri li eri, eri wuzu eri ma pariasi.

²²A’disiku Munguni nga afa o’be eri ruaa okposi, ngani eri ku yikisi ku; eri le re a pa eri ma driasi.

²³’Ba yi nga yi dri sa erisi, yi nga eri onzi tisi, drozu eri ma pariasi.