Read lugbara Yobu 28 Bible Online

Yobu 28 - lugbara bible

Yobu 28

¹Ada, ’bile ’bani dahabu gazu nyakuari eri indi, pari ’bani mele yini edele alaru acisiri isuzuri vini indi.

²Yi aya onze nyakua, yi adri mola ede oni akale acisirisi,

³’Ba fe angu iniruni i dezu, kpere angu ma kalatini asizuria ’ba oni ayaru nda angu biza pi ma alia dra ma endrilendri be.

⁴Yi ’bile ga angu ’bani ovuzu aleniari be re re; ’ba agapi pasi ’diyi avi e’yo yinisi ra, yi o’i yi bakasi ’ba be re re, kelekele ’yazu ’dile ’dole.

⁵Te nyaku drialeru nyaka efuni; te etinialeru eri i oja ekile acisirile.

⁶Oni erini yi pari oni safiraru ’diyi isuzuri, eri melefura be.

⁷Aria za nyapiri ma azi aluni nini geri ’dari ku, yuku ma mile neni vini eri ku.

⁸Anyapa afuru ’diyi acini geri ndeasi ku; kami adraruri alini geri ndesi ku indi.

⁹’Ba adri i dri eju oni kongolokoru i vu, eri oni ambo ambo ’diyi ogu pi ndu be.

¹⁰Eri yi geri ga oni kataru ma eselia, eri afa dria aje nyapi tu ’diyi ndre i milesi.

¹¹Eri yi were ma ti bi ci, ma asi ra nde nde nde ku beni, eri afa zizaruri ofu etua,

¹²Te onduaruri yi nga isu ngoa ya? Pari e’yo vazaniri ngoa ya?

¹³’Ba nini ondua nde ma aje ku, ’ba isuni vini eri ’ba idriru ’diyi ma angua ku.

¹⁴Yi aliruri ’yo ra, Eri ma vu yo; miri kini, Eri vini ma vu yo indi.

¹⁵’Ba econi eri isu melesi ku, ’ba ngani vini dahabu ma nzita o’bi eri jezu ku.

¹⁶’Ba econi eri o’bizaru mele Ofiriari be ku, kani oni aje nyapi tu onukiruri pi safiraruri be ku indi.

¹⁷Mele pi ma aje glasi be cani eriniri be trotto ku; ’ba econi eri elezaru onyiafa edele mele alarusi ’diyisi ku.

¹⁸’Ba econi oni ekaruri pi ma e’yo olu emvendrindriruri be ku; ada, ondua ma aje aga nyoro ekaru ’diyiniri ra.

¹⁹Oni topaziru Etiopiaari ma aje cani eriniri be trotro ku, ’ba econi vini eri ma aje o’bizaru mele alaruniri be ku.

²⁰Ka’dini ondua enga ngoa ya? Pari e’yo vazaniri ngoa ya?

²¹A’disiku zi i ’ba idriru ’diyi ma miliasi dria, zi vini i aria ’bua ’diyi dri indi.

²²Dri jaza pi Dra be kini, Ama eri e’yo kuza eriniri ama bilesi.

²³Mungu va geriniri ra, eri ni vini parinirini;

²⁴erini angu lule kpere nyaku ma kalati asizuriarisi, erini afa ’bu ma pi ma etia ’diyi ondrele rarisi.

²⁵Erini ndra nziza feria oli driria, ada, erini ndra yi mirini o’biria afa o’bizasiria;

²⁶ka ndra azita azi ozoo dri, ka ndra geri ede ovi ma noza dri;

²⁷etu nde ’dasi eri ndre eri ra, eri olu e’yoni; eri fe erini pa sozu kirikiri, ada eri nda eri, isu eri ra.

²⁸Eri nga vini ’yo ’ba ma tia kini, Mi ndre, ruta Yehovani ruzuri eri onduani; ’bani i onazu e’yo onzisiri eri e’yo vazani.