Read lugbara Yobu 29 Bible Online

Yobu 29 - lugbara bible

Yobu 29

¹Yobu nga vini e’yo o’beza eriniri e’do, ’yo kini:

²Ma ka te ovu ekile mba ndra drio ’dayisirile, ’yeke fo! ekile ewu ndra Munguni ma agei tezuriasirile;

³eri ma talani ndra diria ma dria drilia uru, mani ndra aciria angu biza ma alia diza erinisi;

⁴ekile ndra mani ovule o’du mani efi kazurisirile, ti eciza Mungu berini ndra nga ovuria hema mani ma driaria;

⁵ewu Okpoe’ini ndra nga ovuria ma berisi, ma anzipini ndra nga ovuria ma ageiaria;

⁶ndra mani ma pa ojiria butasiria, ndra onini raria oduru ma dri ekile yi razaleria

⁷Mani ndra efuria muria kalitilea kpere aku ambori vuria, mani oguna mani ederia geri aritiaria,

⁸karile ka ma ndre ra, yi adri ndra dri ose vile, ’ba ’wara adri ndra enga pa so urulesi;

⁹opianzi yi adri e’yo ku ’yoko ja, yi obi yi ti drisi;

¹⁰opi ma o’duko ovu ciri, yi ma andre ebi yi anakulea ci.

¹¹A’disiku bile ka ndra ma eri ra, eri ndra ma inzi ra, mile ka ndra ma ndre ra, eri ndra e’yo mani ma eti nze;

¹²a’disiku mani ’ba alioru owupi ’diyi pi opale ’ba ata kokoru ovupi ’ba yi aza kopiri kokoru ’diyi berisi,

¹³’Ba ’yepi ndra dri japiri ma asi ndriza eca ma dria, ma fe ndra awuzio ma asini ongo ngozu ayikosi.

¹⁴Ma su e’yo kililiru bongole, eri ndra afa suza maniru; e’yo mani lile kililiruri ovu bongo ’beza pile oku ndrizaruri be.

¹⁵Ma ndra ’ba mile kokoru dri mileru, ma ndra ’ba acozaru dri paru.

¹⁶’Ba afa kokoru dri ma ndra ataru, ma adri ndra ’ba mani nile kuri ma e’yo nda,

¹⁷Ma onyo ndra ’ba kililiru kuri ma silili ra, ma nze afa erini opaleri eri ma tiliasi ra.

¹⁸Etu ’dasi ma ’yo ndra kini, Ma nga dra jorovu mani ma alia, ma nga o’du mani idri kakau cinyale,

¹⁹ola mani ra fi kpere yi tialeru ’bo, andrali ’ya arakala mani ma dria ini rra,

²⁰diza mani nga o’diru ma alia, osu mani ofu vini o’diru ma dria.

²¹’Ba yi adri ndra bile co ma vu ma tezu, yi adri ndra ciri e’yo amaza mani erizu.

²²E’yo ’yoza mani ma vutia yi adrini ndra e’yo azini ’yo dika ku, e’yo ’yoza mani adri ndra ti yi ma dria ti ti.

²³Yi te ma ’bani ozoo telerile; yi zi yi ti walaru, ekile ’bani ewadri ozoo telerile.

²⁴Yi ka ovu asi teza kokoru, ma adri ndra ci yini ogutasi nyaa; yi ’beni diza ma miletiniri va ku.

²⁵Ma pe ndra geri yini, ma ri opiru, ma adri ekile opi asikari ongulumuru ’diyi ma eseliarile, ekile ’ba ’ba awu wupi ’diyi ma asi omipirile.