Read lugbara Yobu 3 Bible Online

Yobu 3 - lugbara bible

Yobu 3

¹’Di ma vutia Yobu nga i ti zi, nga o’du erini osizuri tri.

²Yobu nga e’do ’yo kini:

³O’du ndra mani osizuri ma ja dri ra, ini ndra ’yopi kini, Ti agimva alenia ’bo, ’diniri be.

⁴O’du nde ’dari ma ovu iniru! Mungu ma ega e’yoniri ’bua ku, etu ma di drinia ku indi.

⁵Ini pi dra ma endrilendri be ma ’yo eri yi ma afaru. Iriti ma ri eri ma dria; afa dria etu ’bapi iniru ’diyi ma fe uri eri dri.

⁶Angu biza iniciciruri ma bi ini nde ’dari ra! Eri ma ovu ayikosi o’du elini ’diyi ma alia ku; ma la eri kalafe mbaniri ma alia ku.

⁷Mi ndre, ini ’dari ma ovu ondoru; ’ba ma eri o’duko ayikoruri ini ndesi ku.

⁸’Ba adripi o’du otripi ’diyi ma tri eri ra, ’ba ovupi onduaru iyu engazu ’diyi.

⁹’Bi’bio e’dapi o’du nde ma omunetisi ’diyi ma ovo bizaru; eri ma nda diza ti, ma isu ku, ma ndre vini o’biti ma ongoro-’bi ku;

¹⁰erini ma andri ma opojo ma ti onile kurisi erini vini candi zile ma miliasi kurisi.

¹¹Ma drani ndra coti mani efuria ma andri ma alia ku a’disi ya? Ma orindi funi ndra mani osiria opojoasi ku a’disi ya?

¹²A’i ma ’bazu eli dria a’disi ya? A’i ma ba ndruzu a’disi ya?

¹³Ka ndra ’dini ku, te’do ma la va ’bo ovuzu e’yere; te’do ma ko o’du ’bo, te’do ma li di ava ’bo,

¹⁴opi piyi tualu, ’ba e’yo amapi nyakua ’diyi pie, ’ba ndra pari andruru sipi yi dri’diyi,

¹⁵kani opi mele e’iru jo gapi tre dahabusi ’diyi,

¹⁶Kani ma ka ndra ovu yo, ekile mva e’bepi e’be zizarurile, ekile anzi etu ndrepi ku ’diyile.

¹⁷Pari ’ dari ma alia ’ba azi onzi ’yepi ’diyi ku ’ba ecandizu ja, pari ’dari ma alia ’ba andepi ’diyi ava li.

¹⁸’Daa ’ba arujoa ’diyi yi ovu dria ndii; ’ba azi fepi ’diyi ma o’duko cani yi vu ’dale ku.

¹⁹’Ba soroa ’diyi pi ’dale ’ba amboru be, tru ati’bo opi erini ma driarisi.

²⁰Fe ’ba candi be turini etu ma diza nezu a’disi ya? Fe idri ’ba asi draza candisiri dri a’disi ya?

²¹’Ba nde ’diyi le dra avasi, te dra emuni ku, yi ga ’bile eri ndruzu aga lonyi zizaru ndazuri ra.

²²’Ba nde ovupi nyona be tu ayiko amboru be ’diyi, yi ka nga eco ’bile ’ba sazuri isuzaru raria.

²³Fe’ba eri ma gerini i zizu rari dri diza etuni nezu a’disi ya? agu Munguni kali tole ageinia ciri’i.

²⁴A’disiku otaza mani emu etuzu enya manile, otreza mani osu yi ekile yile.

²⁵Afa mani ’yele erisi urisirini emule ma driarisi, afa mani rule anirini ecale ma vurisi.

²⁶Ma lini ande ku, ma ovuni e’yere ku; ma lini vini ava ku indi; te ocokoni emu emu.