Read lugbara Yobu 30 Bible Online

Yobu 30 - lugbara bible

Yobu 30

¹Te curu’do ’ba nyiri mani agale elisi ra ’diyi ’ba ma aparakaru, ’ba mani egale ndra yi ma atapi funi dri mani yi o’bazu oce kabilo mani ongulumuru ma ta mbapi ’diyi ma eselia ku ’diyi.

²Ada, yi ma dri ma okponi nga ma dri a’di orodri fe ya? ’Ba yi ma okponi dezu ’bo ’diyi!

³Yi oyi tu abiri pi dri liki be; yi nyaku a’wiru ci angu iniciciru ’ba kokoru roko driaria;

⁴yi kayi’bi oba jere ma tia, yi ma nyaka eri pati nyiri ’daa ’diyi ma olani.

⁵’Ba odro yi ’ba ma eseliasi; yi otre yi ma vutia ’bani otrele oguou ma votiarile.

⁶Yi ma adri ’bile guru guru e’bua ’diyi ma alia, gule ovupi nyakua ’diyi pi ma alia, oni eselia ’diyi be.

⁷Yi owu akanyale jere ma alia; yi oku yi tualu meu ma etia.

⁸Yi ’ba ondua kokoru ’diyi ma anzipi, ada ’ba soroa ma anzipi, ndra odrole anguasi kali ninirurisi ’diyi.

⁹Te curu’do ma ofu ’ba ’diyi dri ongoru, ada, ma ajidimararu yi dri.

¹⁰Yi ngu ma onzi, ose yi ma vusi re re; kuni cucu wuzu masi ku, yini ma neria,

¹¹Te Munguni baka mani ayule ’bo, azini erini ma inzale rarisi, e’yo ’disi yi ayu baka yi ma ti ombezuri ma drilia ’bo.

¹²’Ba ongulumuru soroaru ’diyi enga ma dri ndialeru, yi ma pa oze kalaa kalaa, yi geri yini ’ba dri jazu ’diyi odro ma vu.

¹³Yi geri mani eza, yi fe ocoko manini ezuzu drile drile; ’ba yi aza kopi e’yosini yo.

¹⁴Yi emu ma ruaa, ekile abi lule huuri ma talasirile; yi adi ma dria abi nyaku asupi vari ma alia.

¹⁵E’yo uriuriru ’diyi oja yi ma dria; yi dro inzita mani ma vuti ekile olile, drileba Irani afi iritile,

¹⁶Curu’do orindi manini ra ma alia yile; o’du candini isu di ma ’bo.

¹⁷Ini be fala ma alia ’diyi o’bi puru puru, dra ma rua nyapiri lini ava ku.

¹⁸Azo manini ovule okporu turisi ma bongo eza i ra; eri anzu ma kirikiri koti mani ma ombeleni ma anzulerile.

¹⁹Eri ’be ma orita ma alia ’bo, ma ofu di ovu ekile irifura pile ofuta be.

²⁰Ma wu mi vu, te mi omvini e’yo ma tia ku; ma pa tu, mi lu ma lu milesi.

²¹Mi oja mi ma ’yezu yiki kokoru; mi ma inza mi dri okporurisi.

²²Mi ma ’du uru oli vu, ma otuzu rizu drinia, mi ma aka akulukusi.

²³A’disiku ma ni ra, mi nga ma ji drata ve, cazu kpere jo pele ’ba dria idriru ’diyi driria.

²⁴Te di, aguni e’deria va eri ngani i dri eju ku ya? Ocoko erini ma alia eri ngani wu aza koza ndazu ku ya?

²⁵Ma wuni ndra mindresi ’ba candi beri ma e’yosi ku ya? Ma orindi ovuni ndra candisi ’ba afa kokoru ma e’yosi ku ya?

²⁶Mani e’yo onyiru ma mile garia, e’yo onzi ecani; mani etu teria, angu biza ecani.

²⁷Ma asini a’di a’di, ovuni ciri ku; o’du candini ’diyi eca di ma vu ’bo.

²⁸Ma aci dri ci awu be etu akosi; ma pa so okuza ma alia, wuzu aza koza ndazu.

²⁹Ma obalako ma adri’i, ma aria okondoruri ma agyi’i.

³⁰Enyi mani ofu iniru, eri i owu ma ruaasi va, ma fala ve rua drizasi ’bo.

³¹E’yo ’disi o’di mani oja i ma dri awu ongoru, ejeleko mani oja i ’ba awu wupi ’diyi ma o’dukole.