Read lugbara Yobu 32 Bible Online

Yobu 32 - lugbara bible

Yobu 32

¹’Dini ’ba nde ’diyi na ku e’yo omviko Yobu ma tia ja, erini ovule kililiru i ma ngulupi ma miliarisi.

²Vutinia aoko nga di Elihu Barakeli mvi, ’ba Buzini, Ramu ma ori’baruri nya. Aoko nya eri Yobu ruaa, erini i ’bale kililiru aga Mungu ransi,

³Aoko nya vini eri Yobu ma agyi na ’diyi ma ruaa indi, yini e’yo omviza isule ku ti, te yini e’yo tile ’dani Yobuni ndezurisi,

⁴Isu de Elihu te e’yo oluzu Yobu tia, ’ba nde ’diyini ovule eli be tre eri agazu rarisi.

⁵Te Elihu ka ndre e’yo omviza ’ba na ’diyi ma tileari yo, aoko nga di eri nya ra ani.

⁶Elihu Barakeli mvi, ’ba Buzini, nga e’yo omvi kini: Ma’i ma karilauni, emi’i emi ’ba dezani; e’yo ’disi ma ku nga ani, ma ru e’yo mani egaleri oluzu.

⁷Ma ’yo ra, ’Ba o’du be kakau ’diyi ma ’yo e’yo okorisi raka, ’ba eli be tre ’diyi ma imba onduani.

⁸Te orindi ’ba ma alia indi, Okpoe’i ma ava fe yi dri e’yo vazani.

⁹’Ba onduaru ovuni ’ba amboru ’diyi’i ku, ’ba e’yo liza vapi ’diyi ovuni ’ba deza ’diyi’i ku.

¹⁰E’yo ’disi ma ’yo ra, Emi eri ma fo; ma’i ma nga e’yo mani egaleri ece indi.

¹¹Mi ndre, ma te e’yo emini ’yoleri ra, ma co bile e’yo emini nzele ’diyi erizu, emini de e’yo emini ngale ’yoleri ndaria.

¹²Ada, ma co bile emi vu, te mi ndre, ’ba emi eselia ma yobu sisile ndepini yo, ’ba e’yo erini ’yoleri omvipini vini yo.

¹³Emi te emi agei emi kazu ’yozu kini, Ama isu ondua ’bo; Mungu eco eri agazaruni, te ’ba ndini ku, ’dini ku.

¹⁴A’disiku eri ’yoni e’yo ini ma ruaa ku, ma ngani vini e’yo omvi eri tia e’yo emini olule ’diyisi ku.

¹⁵Yi osu tu, yi omvini e’yo dika ku; yi ovuni e’yo ’yoza be aluni ku.

¹⁶Te onyiru ma ma te ’dani, yini e’yo ’yole kurisi, yini pa sole ci e’yo omvizu dika kurisi ya?

¹⁷Ma’i ma nga e’yo mani omvi indi; ma nga vini e’yo mani egaleri ece’i.

¹⁸A’disiku e’yo ’yoza ma asia tre, orindi ma aliari ma omi okposi.

¹⁹Mi ndre, ma asi ovu ekile patiefi ma su, tini opile cirile; eri le asi ekile enyiriko patiefi ma su tozu ’diyile.

²⁰Ma nga e’yo ’yo, ma ma isu ani asi ambiza beni; ma nga ma tile zi e’yo omvizu.

²¹Emi ku ma ma ope’ba aluni ku fo; ma ngani ’ba aluni inzi, ru ambo ambo inzitani ’diyi fezu eri dri inzosi ku.

²²Ma nini ru ambo ambo inzitani ’diyi fezu inzosi ku; ma ka te ni fezu ra, Mungu ma ’Bapiri te nga ma ’du mbele,