Read lugbara Yobu 33 Bible Online

Yobu 33 - lugbara bible

Yobu 33

¹Te di, Yobu la, mi eri e’yo mani oluleri fo! Mi ma co bile e’yo mani ’yole ’diyi erizu dria.

²Mi ndre di, ma zi ma tile ’bo; ma ’yo e’yo andre ma tilearisi.

³E’yo mani ’yoleri nga e’yo kililiru ma asiari oluni, e’yo ma tileni nileri, tileni nga ’yo asi adasi.

⁴Orindi Munguni ’ba ma ra, ava Okpoe’ini idri fe ma drini.

⁵Ka eco mini ra, mi omvi e’yo ma tia; mi oti e’yo mini ’yole ’diyi ma drilia kilili; mi so pa ’dia.

⁶Mi ndre, ma ovu mile, Mungu vu; ede ma alu odrisi indi.

⁷Mi ndre, ruta nuru ma ruzuri ngani uri fe mi dri ku; e’yo nzizaru mani ngani nzi mi dria ku.

⁸Ada, mi ’yo ma bilia ’bo, ma eri e’yo mini ’yole ’diyi ma o’duko ’bo, kini:

⁹Ma alaru, ezata kokoru; ma e’yo kokoru, e’yo onzi ma alia yo.

¹⁰Mi ndre, eri e’yo nda ma ruaa, eri ma la i ma ari’bole;

¹¹eri ’ba ma pa pati okaliru ’ba ma pa ecizuri ma alia, eri ne geri mani dria.

¹²Mi ndre, ma nga e’yo omvi mi tia. E’yo ’diri ma alia mi ovuni kililiru ku; a’disiku Mungu aga ’ba ra.

¹³Mi agata ga eri be erini e’yo omvile aloni kurisi a’disi ya?

¹⁴A’disiku Munguadri e’yo ’yogeri alusi, ada, geri irisi, ka tro ’ba egani e’yoni ku ti.

¹⁵Orobisi, kani afa ndreza inisirisi, o’duni ’ba ’beria adikadiria, ’bani o’du kozu gbolo dria kaukaurisi,

¹⁶eri nga di ’ba bile zi, eri nga uri fe yi dri imbatasi,

¹⁷eri ma oja ’ba, aguni e’yo ini lele ’yeleri kuzu ani ja, eri ma zi afu ci ’ba ma milia;

¹⁸eri orindi erini ta mba, kazu ’dezu ’bilea ku, eri idri ta mba kazu dri jazu seisi ku.

¹⁹Eri ’ba imba rua suza pisi gbolo dria, abala ’baza ciani fala erini ma aliari be;

²⁰’ dini eri ma idri ngu enya onzi ani, orindi erini ngu nyaka aluzaru onzi.

²¹Za eri ruaari nzu ra, e’dani ani ku; fala ndra e’dapi ku ’diyi e’da yi ku ra’ya.

²²Ada, orindi erini osi i ’Bile tia ogogo, idri erini ca ’ba dri japi ’diyi vu ogogo.

²³Malaika ka ovu eri be indi, ’ba ti ojapi ovupi alu alifu ma eseliari, e’yo ovupi eri dri onyiruri ecezu ’ba dri;

²⁴ka’dini eri nga di ovu asi ndrizasi eri vu, nga ’yo kini, Mi ari eri, kazu sizu ’Bilea ku fo, ma isu afa eri onzezuri ’bo;

²⁵za eri ma ruaari nga di emvi o’diru aga anziniri ra; eri mvi ovuzu ekile ewu ndra erini ovuzu karilaururisirile.

²⁶Eri nga di e’yo zi Mungu ria, eri nga ovu eri vu asi ndrizasi, eri nga ani eri ma mile ndre ayikosi; eri e’yo erini kililiruri omvi ’ba dri dika,

²⁷eri ongo ngo ’ba ma milia kini Ma eza ’bo, ma oja ndra e’yo kililiruri onzi, te orodrini ma dri yo.

²⁸Te eri pa ma orindi, kazu fizu ’Bilea ku, ma idrini nga diza ndre.

²⁹Mi ndre, Munguni e’yo ’diyi ’ye dria ’ba dri, vu iri, kani vu na,

³⁰eri ma orindi omvizu engazu ’Bilearisi, dizani dizu eri dria diza idrirurisi.

³¹Mi ovu mile be, Yobu la, mi eri e’yo mani; mi adri ciri, ma nga e’yo ’yo ’di.

³²Mi ka ovu e’yo azini be ’yozaru, mi omvi di e’yo ma tia fo; mi ’yo e’yo, te ma le mi la ’ba kililirule.

³³Ka ku, mi eri e’yo mani; mi adri ciri, ma nga mi imba ondua nizu.