Read lugbara Yobu 34 Bible Online

Yobu 34 - lugbara bible

Yobu 34

¹Elihu nga vini e’yo omvi kini:

²Emi eri e’yo mani, emi’ba onduaru ’diyi la, emi co bile ma vu, emi nita be ’diyi;

³a’disiku bileni e’yo ’yoza ma aji o’bi ekile tileni nyaka ma aji o’bilerile.

⁴Ama ma ope ama dri e’yo kililiruri’i; ama ma ni ama eselia e’yo ovupi onyiruri.

⁵A’disiku Yobu kini, Ma kililiru, azini vini, Mungu ’du e’yo kililiru maniri ’bo;

⁶ka tro ma onyiru ti, la ma ekile ’ba inzo lipirile; ebi ma ruaari econi jazaru ku, ma ka tro ovu ezata kokoru ti.

⁷Agu Yobule edematara mvupi ’bani yi mvulerile,

⁸mupi ’ba azi onzi ’yepi ’diyi be tualu, acipi ’ba onziru ’diyi pieri a’di’i ya?

⁹Te eri ’yo ’bo kini, ’Bani ovuzu ayikosi Mungusiri feni ’ba dri orodri ku.

¹⁰E’yo ’disi emi eri e’yo mani, emi ’ba e’yo vaza be ’diyi, Mungu econi azi onzi ’yezaru ku, Okpoe’i econi e’yo onzi ’yezaru ku.

¹¹Te eri nga arioti ofe ’ba dri azi erini vusi, eri nga fe ’ba drini e’yo isuzu trotro geri yini vusi.

¹²Ada, Mungu ngani e’yo ’ye onzi ku, Okpoe’i ngani e’yo li inzoru ku.

¹³A’di azi eri ovuzu nyaku ma driliani ya? A’di fe angu wudrikuru driani ovuzu eri ma driani ya?

¹⁴Eri ka asi ’bani omvi i vu, ka orindi ’bani pi oku i vu avani be,

¹⁵’ba rua ari be ’diyi dria nga dri ja tualu, ’ba yi nga ofu irifuraru dika.

¹⁶Mi ka e’yo va curu’do ra, mi eri ’di; mi eri e’yo mani ’yole ’diyi ma o’duko.

¹⁷’Ba e’yo kililiruri ngupi onziri nga angu nya ra ya? Mi nga ’ba kililiru azini okporuri ma e’yo li eri ndezu ra ya?

¹⁸’Yozu opi tia, Mi ’ba saaru, kani ’ba ’wara ’diyi ma tia, Emi onzi, ’diniri onyiru ya?

¹⁹Ka’dini ’yozu ’ba ’ba opiru ’diyi opepi ku, ’ba afa e’iru ma e’yo ’bapi drile aga ’ba alioruni kuri ma tia ’dinile eri onzi aga ra, yi driani ovule azi eri ma dri pamvunirisi.

²⁰Yi odra mbelekocici, iniayii ’dia ’di, ’ba ma rua oya ra, yi aga mu ra, wu ’ba okporu ’diyi ra, te dri ’banisi ku.

²¹Eri ma mileni geri ’bani lulenirisi, erini geri yini muzuri ondrele driarisi.

²²Angu iniru, kani dra ma endrilendri ’ba azi onzi ’yepi ’diyini ecozu yi zizu aleniani yo.

²³’Dini leni eri ma ndru e’yo ’bani dika raka erini emuzu Mungu ma drilia fizu e’yo lizuria ndo, ’dini ku.

²⁴Eri onyo ’ba okporu ’diyi ra geri ’bani nile kurisi, eri ’ba azini o’ba yi ma paria.

²⁵E’yo ’disi eri ni ’yeta yini, eri ogu yi va inisi, nga ani dri ja ra.

²⁶Eri o’di yi ekile ’ba azi onzi ’yepi ’diyile ’ba azini ma milia ayii,

²⁷yini yi ojale kalaa, kuzu eri vuti bizu jarisi, yini lele geri erini ’diyi ma azi ma e’yo egale aluni kurisi,

²⁸’dini yi fe alia ma wutani ecazu eri ma bilea, eri eri ’ba inzaleri ma awu ra-

²⁹Eri ka asi anzuru fe ra, a’di eco e’yoni lizu onzini ya? Eri ka i mile zi, a’di eco eri ndrezaruni ya? kani suru ve, kani ’ba alu vu dria trotro.

³⁰’ba Mungu inzipi kuri ma ce ani ’ba dri ku, ’ba aluni ma mba ’ba lokirisi ku beni.

³¹A’disiku ’ba azini ’yo Mungu ma tia ’dinile ra ya? kini, Ma isu imbata ’bo, ma ngani eza dika ku;

³²mi ma imba ma afa mani ndrele kurisi; ma ka e’yo onzi ’ye ’bo ti, ma ngani eri ’ye dika ku.

³³Afa ofeza erini nga ovu mini lelerile mini eri gale sirisi ya? Te mi ma pe mi’i, ma ’yo, e’yo ’disi mi ma ’yo e’yo mini nileri.

³⁴’Ba e’yo vaza be ’diyi nga e’yo ’yo ma tia, ada, ’ba dria ondua be ma eripi ’diyi, kini:

³⁵Yobuni e’yo ’yo nita kokoru, e’yo erini ’yole ’diyi yi ondua kokoru.

³⁶Onyiru Yobuni o’bizu kpere asizania, erini e’yo omvile ’ba azi onzi ’yepi ’diyilerisi.

³⁷Erifii mbuza Mungu ruaasi amveri o’bale ezata erini aziniri ma driarisi; eri e’yo nze dri sazasi ama eselia, eri e’yo ini ’yole ’diyi ere kakau Mungu ruaa.