Read lugbara Yobu 36 Bible Online

Yobu 36 - lugbara bible

Yobu 36

¹Elihu nga di ’yo ’dani, kini:

²Mi ku nga ma e’yo ’yo were, ma nga e’yo ece mi dri; ma ovu nga e’yo azini be ’yozaru mi tia Mungu rusi.

³Ma nga ondua mani eji engazu re, ma nga ece kini Mungu ma ’Bapiri ovu kililiru.

⁴A’disiku e’yo mani ’yoleri ovuni inzoru ku ada; ’ba e’yo nipi teketekeri eri mi be indi.

⁵Mi ndre, Munguni okporu, eri nguni ’ba aluni ku; eri okporu tu e’yo vaza ma okposi,

⁶Eri mbani ’ba azi onzi ’yepi ’diyi ma ta idriru ku, te eri e’yo kililiruri fe ’ba inzale ra ’diyi dri.

⁷Eri ojani i mile ’ba kililiru ’diyi kuzu nekokoru ku, te eri ’ba yi oguna dria opi be tualu ’dani ’dani, yi ovu di inzizaru uru,

⁸Yi ka ovu ombezaru anzirikusi, ka ovu o’izaru baka ’ba inzazurisi,

⁹eri nga di azi yini pi ece yi dri ezata yini be, kini, yi ’ye afusi ’bo.

¹⁰Eri nga yi ma bile zi, yi ma eri imbata ani, eri azi yi ma emvi dika ezata kuzu.

¹¹Yi ka e’yo eri ra, azi ngazu eri dri, yi nga o’du yini de drilebasi, yi nga eli yini de ayikosi.

¹²Te yi ka eri ku, yi nga dri ja seisi, yi nga odra nita kokoru,

¹³’Ba Mungu inzipi yi asia ku ’diyi, yi lu adra ma ta mba’i; eri ka yi o’i, yi wuni aza koza ndazu ku.

¹⁴Yi odra de yi karileru, idri yini ja dri ’ba alata kokoru ’diyi ma eselia.

¹⁵Eri ’ba inzale ’diyi opa inzata yinisini, eri yi ma bile zi e’yo ewaru yinisi.

¹⁶Ada, eri te ndra mi dri ese pari candi beriasi amve, kpere fizu pari walaru ’bani ani ’ba omizu kuria; afa ’bale mesa mini ma driari te nga ga tre ososi.

¹⁷Te mi ga tre e’yo liza lile ’ba azi onzi ’yepi ’diyi ma driarisi; e’yo liza pi e’yo liza kililiruri be bi mi ci.

¹⁸Mi ma ovu mile be asi adraru mini kazu mi dri sezu Mungu edezu onzi ku; mi ma fe onzeza ma amboni mi ojazu kalaa ku.

¹⁹Lonyi mini nga dri fu ra, mini ani ovuzu candi kokoru ya? Kani okpo miniri ma okpo dria fu dri ra ya?

²⁰Mi ma ’ba mi ava ini dria ewu yini ’ba adizu nyairi ma dria ku.

²¹Mi ma ovu mile be, mi ma ega e’yo onzi ku, mini ’diri pele aga inzata rarisi.

²²Mi ndre, Mungu ’ye e’yo amboru uru okpo inisi; ’ba imbapi erileni a’di’i ya?

²³A’di azi geri eriniri eri drini ya? A’di eco ’yozaru, Mi ’ye e’yo kililiru kuri -ni ya?

²⁴Mi ma avi azi erini ’bani e’yoni ngole ’bori inzizu ku.

²⁵’Ba dria lu azi nderi ra; ’ba ndre eri ziri.

²⁶Mi ndre, Munguni amboru, ama nini eri ku; ’ba econi eli erini ma kalafe ndazaru nizu ku.

²⁷A’disiku eri ese yi otipi oti ’diyi uru, yi nde ofu ozooru luru erini ma alia

²⁸’buni osule va, ’dipi ’ba dria fudri ciri.

²⁹Ada, ’ba eco iriti ma ajaza pi ma e’yo vazaru noza efupi eri ma hemaari be ra ya?

³⁰Mi ndre, eri aja ovi diza ini i ma ageia, eri angu miri etiari a’bu.

³¹A’disiku eri ’ba ma e’yo li afa nde ’diyisi; eri nyaka fe tu.

³²Eri a’bu i ma wu ovisi ci, eri azi ovi ma so li nderi.

³³Fizaniri ma awuni eri ma e’yo oluni, anyapa indi yi nga akuluku emupiri ma e’yo ece.