Read lugbara Yobu 38 Bible Online

Yobu 38 - lugbara bible

Yobu 38

¹Yehova nga di e’yo omvi Yobu ma ria oli adropa’diriruri ma aliasi kini:

²’Ba e’yo amaza ojapi bizaru e’yo ’yole nita kokorurisi ’diri a’di’i ya?

³Mi a’di mi opile agupile; ma nga e’yo zi mi tia, mi olu di ma tia.

⁴Mani ndra nyaku ma eti ’baria, mi ndra ngoa ya? Mi olu di, mi ka ovu e’yo vaza be raria,

⁵A’di otu o’bizaniri ma e’yoni ya? -mi ka ni raria! A’di se baka eri ma driani ya?

⁶E’do etini o’ba a’di afa ma dria ya? A’di ’ba oni amboru kalatiarini ya,

⁷o’du ndra leleo piyini ongo ngozu tualu, Mungu anzipini otrezu ayikosirisi?

⁸A’di opi miri ma ti tikosi, erini ndra efuria okposi, ekile erini engale opojoarileni ya?

⁹Ewu mani ndra iriti edezu eri dri bongoru, azini ini iniciciruri edezu eri ma bongo odekua ombezurirurisi;

¹⁰o’du nde mani ndra azita mani azizu tinia, kalitile piyi o’bazu ringili berisi,

¹¹mani ’yozu kini, Mi eco eca ’ dia ra, te mi ma aga drile ku, yi mini ombupi ombu afusi ’diyi ma asi ’dia.

¹²Mi azi e’yo o’biti dri, engazu mi o’duni e’dozurisi ra ya? Mi fe angu atizani i pari nizu mi’i ya?

¹³Eri ma la ani angu ma kalatini asizu ’diyi ra, ma oya ’ba azi onzi ’yepi ’diyi aleniasi beni.

¹⁴Eri nga i oja odri driadriamva eceta beri ma etiarile, afa dria nga efu yi e’dazu bongole.

¹⁵Oga diza diko ’ba azi onzi ’yepi ’diyi ma dria si, wu ejule ururi nyo i ra.

¹⁶Mi fi pari yi mirinirini adizu ’diyia ya? Kani yi aliru ma pari vutinia ele tu ’diyia ya?

¹⁷Ece mi dri kalitile draniri ’bo ya? Kani mi ndre dra ma endrilendri ma kalitile ra ya?

¹⁸Mi va wudrikuru ma wala ra ya? Mi olu e’yoni, mi ka ni dria raria.

¹⁹Geri mupi pari dizani ovuzuriari, ngoa ya? Kani vini inini, parini ngoa ya?

²⁰Mini ani geri nde bizu kpere asiria, mini ani geri mupi kpere eri vile joa ’diyi nizu beni?

²¹Mi ega mi ni ada, mini ndra ovule osizaru ’bo ewu ’darisirisi, ’bari, o’du mini ma kalafe yi de kakau ka!

²²Mi fi pari taluji ma ta mbazuria ya? Mi ndre vini pari si ta mbazu ’diyi ra ya?

²³Mani tani mbale o’du candirurini ecazurisi, o’du omba pini a’di beria ’diyi.

²⁴Diza co i esele geri ngosi ya? Oli engapi etuni efurialeruri ere i nyaku dria geri ngosi ya?

²⁵A’di ga yi geri yi tipi tiri drini ya? Kani geri ovi gapi le leri dri,

²⁶fezu ozooni ’dizu angu ’ba kokoria, angu roko dria ’bani ovuzu alenia yoria;

²⁷fezu angu piriniri pini trazu angu andrururi be, fezu ase ibiruni engazu ani.

²⁸Ozoo ma ati indi ya? A’di ti andrali otipi otirini ya?

²⁹Si kongolokoru efu a’di ma opojoa ya? A’di ti angu ambiza ’bua anguni i ojazu ani emverurini ya?

³⁰Yi mirini omba ekile onile, yi aliru ma mile omba kongolokoru egbesi.

³¹Mi eco ’bi’bio Nyunyumeru Vi okupi aziri ’diyi ombezare tualu ya? Mi eco Aseti ma baka tru ra ya?

³²Mi eco ’bi’bio ecetaru ewu esele copi ’diyi ofu o’du yinisi ra ya? Mi eco ’bi’bio omvele Ngururi dri cezaru anzi be ra ya?

³³Mi ni azita ’buni ’diyi ra ya? Mi eco fezu opi nyaza erinini pa sozu nyakua ra ya?

³⁴Mi eco mi o’duko engazaru iriti azizu, yi ta papi cirini mi a’buzu beni ra ya?

³⁵Mi eco ovi ma ti pezaru, yi ma mu ani ya? ’yozu mi tia kini, Ama ’do’i.

³⁶A’di ’ba ondua iriti iniru ’diyi ma alia, a’di fe e’yo vaza ngaraka’diu drini ya?

³⁷A’di eco iriti ma kalafe lazaru i ma onduasini ya? A’di eco imvu ozooni ’bua ’diyi ma ti elazaru,

³⁸ewu irifurani yi etizu odriru, o’ditini yi ekpazu tualuria ya?

³⁹Mi nga za nda kamiandri dri ya? Mi nga kamianziru ’diyi ma abiri inyu ra ya?

⁴⁰yi ka la va yi ma ojia, ka te pari zizaru za mbazuria?

⁴¹A’di fe za koreke iniruri dri, anzi erini ka wu Mungu vu dri cizu nyakaakosiria ya?