Read lugbara Yobu 39 Bible Online

Yobu 39 - lugbara bible

Yobu 39

¹Mi ni ewu ndri asea oni dria ’diyini anzi otizuri ra ya? Mi eco otiza nyajo piyini nezaruraya?

²Mi eco mba yini ovuzu’a be ’diyi ma kalafe lazaru ra ya? Mi ni ewu yini ngazu anzi otizuri ra ya?

³Yi avu va, anzi otizu, yi ofu rua suza yini ra,

⁴Anzi yini ma rua alaru, yi zo asea, yi fu ra, emvini dika ku.

⁵A’di ku akanya aseari muzu yani ya? A’di tru akanya aseari ma bakani ya?

⁶mani angu roko driari ’bazu eri ma joru, mani angu a’i beri ’bazu eri ma pari ovuzuriruri’i.

⁷Eri aku amboru ma o’yoa ’ba aparakaru; eri erini ’ba dropiri ma otreza ku.

⁸Oni ambo ambo dri be ngongo, diyi ovu eri dri pari ase nyazuriru, eri afa dria ibiru ’diyi onda’i.

⁹Odruni nga a’i azi ngazu mi dri ya? Eri nga la lico mini ma alia ra ya?

¹⁰Mi eco odru ’izaru bakasi amvu ’azu ra ya? Eri nga amvu ma ale si mi vutia e’butia ra ya?

¹¹Mi nga asi ’ ba drinia eri ma okponi ovule turisi ya? Mi nga azi mini ku eri dri ra ya?

¹²Mi ovu eri vu a’itasi kini eri nga ori mini eji akua, nga anya mini oku akuma mini anya cozuria ra ya?

¹³Aria okondoruri ma opile ayikoru, te eri ma opile piyi ’bikoni be, yi ma yiki ci ya?

¹⁴A’disiku eri gbe ini ’diyi ku nyaku dria, irifurani ani driza fezu yi dri;

¹⁵drini avi ra kini kani pani nga yi ofu ra yani, kani anyapa asea ’diyi nga yi otu pasi yani.

¹⁶Eci ma asi yiki kokoru anzi ini vu, ekile yi erini yole; ka tro ndra i ecandi azisi ti, asini otini ani ku;

¹⁷Munguni eri ndele onduasi sirisi, erini vini e’yo vaza fele eri dri kurisi.

¹⁸Eri ka nga i enga uru nzuzu, eri ede akanya pi ’ba tupi driniari be ede ede.

¹⁹Mi fe okpo akanya dri ya? Mi su podo eri ma ombelea i oyapi oyari ra ya?

²⁰Mi fe erini mbuzu ombile ya? Inzita eri ma omvu cozaniri ma awuni ’ba dri uriuriru.

²¹Eri angu otu i pasi e’bu alia, i ipizu ayikosi i ma okposi; eri fu dri fuzu ’ba afa ombani be ’diyi be.

²²Uri funi eri ku, eri ani gu gu, asini otini ku; ngani i oja vile seisi ku.

²³Ndere ’ye tozu ’diyi pi ri yi osi eri ruaa kieikiei, aju hwene si dipi diri pie, oliri pie.

²⁴Eri nyaku ki i ma aoko pisi adra be, econi vini pa sozaru ci guka ma awusi ku.

²⁵Guka ka nga wu ra, eri eli nga ’yo, Awa’di! Eri omba ma aji ese engazu ziri, otreza ’ba asikari dri cepi ’diyini, cere ombani be.

²⁶Yuku sa ’bua uru ondua minisi, eri ma opile ajazu woko uruleruri vuleru ya?

²⁷Aji tu ’bua azita minisi, eri ma jorovu sizu pari uru turia ya?

²⁸Eri ovu oni ruaa, eri adri ri ’dale, oni sukiliki ma dria uru, pari okporu turia.

²⁹Eri za one engazu ’dasi; eri ndre eri i milesi ziri.

³⁰Anzi erini yi ari mbe; pari avuni ovuzuria, eri ’daa ci.