Read lugbara Yobu 4 Bible Online

Yobu 4 - lugbara bible

Yobu 4

¹Elifazi ’ba Temanini nga di e’yo omvi, ’yo kini:

²’Ba ka o’bi e’yo ’yo mi be, eri mi dri candiru ya? Te a’dini eco i ogazaru e’yo ’yoko sini ya?

³Mi ndre, mi imba ndra ’ba kakao, mi fe ndra ’ba dri akaza be ’diyini ovuzu okporu.

⁴E’yo ’yoza mini otu ndra ’ba ’yepi e’depi vari ra, mi fe ndra kumuti okpo kokoru ’diyi dri okpo ra.

⁵Te curu’do e’yo nde ca mi ruaa ra, te mi orindi fu ra; eri elo mi ruaa ra, mi asi oti di ani.

⁶Ruta mini Mungu ruzuri feni mi dri asi ’baza okporu ku ya? Geri mini kililiruri feni mi dri asi teza ku ya?

⁷Mi ega nga e’yo ’di, ’ba dri japi, e’yo kokoruri a’di’i ya? ’Ba kililiruri ma ori avi ngoa ya?

⁸Mani ndrelerile, ’ba ezata ’yapi e’yo onzi ma ori fapi ’diyi nga afa nde ma efi lo’i.

⁹Yi odra ava efupi Mungu ma tiliarisi, oli liza eri ma adranirisi yi dri ja teketeke ra.

¹⁰Fe noza kamini pi ovu ciri, o’duko kami adraruniri be, onyo si kamianzi ma tilia ’diyi dria.

¹¹Kami dezari dra zaakosi, kamiandriri ma anzi ere yi ndu ndu.

¹²E’yo eca ma vu ndindiru, ma eri o’duko nde oyokolosiri ma bilesi.

¹³Mani asisile droria afa ndreza inisi ’diyi ma dria, o’duni ’ba ’beria dikilidiria ’di,

¹⁴uri bi ma, rua yaza be, fe fala mani driani oya oya.

¹⁵Orindi aga ma miliasi; ’biko ma ruaa ’diyi enga jiri.

¹⁶Orindi nderi so pa ci, ma ama eri ma wura ti. Te e’da ma milia ’dani; angu adri ndi, vutinia ma eri o’duko, kini:

¹⁷’Ba rua ari beri nga ovu kililiru Munguni agazu ra ya? ’Bani vini nga ovu alatararu Mungu eri ’Bapiri agazu ra ya?

¹⁸Mi ndre, eri ovuni a’itasi ati’ba erini ma e’yosi ku, eri su vini asu malaika erini ma ruaa onduaako yinisi;

¹⁹ka’dini eri ngani ovu a’ita kokoru aga ra ’ba ovupi jo bile odrisi ’diyi ma alia ’diyi vu ku ya? ’ba nde ma etini ovuzu irifura ma alia, yini anyile ekile odukodule ’diyi.

²⁰Onyo yi o’biti pi ma esele ondre beria nyingiriki; yi ja dri ’dani ’dani te ’ba aluni egani e’yoni ku.

²¹Nzeni hema yini ma baka yi ma aliasi ku ya? Yi odra ra, te ondua kokoru.