Read lugbara Yobu 40 Bible Online

Yobu 40 - lugbara bible

Yobu 40

¹Yehova nga vini e’yo omvi Yobu tia kini:

²’Ba fipi iniri nga a’di ’di Okpoe’i beya? ’Ba agata gapi Mungu beri ma omvi e’yoni.

³Yobu nga di e’yo omvi Yehova ma tia kini:

⁴Mi mire, ma ’ba toko ’doni ’dori; ma nga mi tia a’di e’yo ’yo ya? Ma dri ’ba ma tilea ci.

⁵Ma ’yo pale alu ’bo, te ma ngani e’yo omvi ku; ada, ma ’yo paleko iri, te ma ngani ri ’yo ’dani drile ku. Geri okpo Mungunini i e’dazuri

⁶Yehova nga di e’yo omvi Yobu ma tia, oli adropa’diriruri ma aliasi, kini:

⁷Mi a’di mi opile agupile; ma nga e’yo zi mi tia, mi olu di ma tia.

⁸Mi nga e’yo liza mani ’ba toko ya? Mi riga ma nde ra, mi ma ovu ani kililiru beni ya?

⁹Mi wu Mungu ma wule ya? Mi eco nozaru o’dukosi erile ya?

¹⁰Mi ede mi rua curu’do onyi pisi diza be; mi su inzita pi ambo be mi ruaa bongole.

¹¹Mi ma osu adra tipi mi asia treri ra, mi lu ’ba dria afu be ’diyi, yi omvizu were.

¹²Mi ma lu ’ba dria afu be ’diyi, yi omvizu ele; mi otu ’ba azi onzi ’yepi ’diyi va, pari yini pa sozuria.

¹³Mi ma zi yi irifura ma alia tualu; mi ombe yi ma mile pari zizaruria.

¹⁴Ka’dini ma nga di e’yo mini e’da ani, kini mi ngulupi ma dri ndiari eco mi pazaruni.

¹⁵Mi ndre di robi mani edele mani mi edelerileri; eri ase oya moniole.

¹⁶Mi ndre di, okpo erini ovu eri ma opilia, okpo erini amboru ovu isu eri ma ’adrini ma alia.

¹⁷Eri i sobi oya mario patile; isu eri ma o’dua ’diyi eci yi tualu.

¹⁸Fala erini yi aya talaa be mgbo molaru ’diyi, pani yi aya izu izu ’diyi.

¹⁹Eri afa Munguni o’bale ’diyi ma okori; kiri eri’i eri ’bapiri eco i ma sei fe cazu vunia ogogoni!

²⁰Ada, oni ambo ambo yi nyaka ka eri drini, pari anyapa asea ’diyini avizuria.

²¹Eri la i va ojo yia ’diyi ma etia, pari zizaru omi talaa yi tiaria.

²²Ojo yia ’diyi ma endri ’de eri dria eri a’buzu; le’di pati yia ’diyi ace eri kuru.

²³Mi ndre, yi ka mbu okposi ti, eri rua oyani ku; eri asi teza be, ka tro Yoridani ti kpere eri ma tilea ti.

²⁴’Ba nga eri bi erini i agei teria mile be ya? Yi nga eri ma omvule so iwusi ya?