Read lugbara Yobu 41 Bible Online

Yobu 41 - lugbara bible

Yobu 41

¹Mi ceo eyiu epezaru iwusi ya? Kani mi eco eri ma andre ombe bakasi ci ra ya?

²Mi eco baka suzaru omvulenia ya? Mi eco eri ma siso sozaru iwusi ya?

³Eri nga matu ’ba mi vu tu ra ya? Eri nga vini e’yo ’yo mi tia e’yere ya?

⁴Eri nga aziza azi mi be mini eri ’bazu ati’boru ’dani ’dani ya?

⁵Mi nga avi eri be ekile aria berile ya? Mi nga eri ’i ku ci ezoanzi mini dri ra ya?

⁶’Ba ongulumuru ebi okupi ’diyi nga erisi aje je ra ya? Yi nga eri awa ’ba afa ozipi ’diyi ma eselia ya?

⁷Mi ceo aju su be ’diyi oso ku ruania piripiri, drini osozu aju ebi sozu diyisi ra ya?

⁸Mi ’ba di mi dri eri ruaa; mi ega nga omba ma e’yo; mi ngani ’ye dika ku!

⁹Mi ndre, eyikiza ’bani ngazu eri bizuri eri toko; ’ba ngani e’de va kiri eri luzuri ma urisi ku ya?

¹⁰’Ba asi be okaru tu lepi eri ma adra engapini aluni yo. A’dini nga di pa so ma milia anini ya?

¹¹A’di fe afa ma dri oko, mani ani eri ofezuni bueni ya? Afa dria ’bu ma etia ’diyi yi mani.

¹²Ma ngani adri ciri, pa erini piyi ma e’yo oluzu ku, ’dini ku, okpo erini amboru turi pie, ombo erini ndrizaruri be.

¹³A’di eco eri ma bongo amveleruri truni ya? A’dini te nga fi afa suza erini ayaru akpale mileko iriri ma aliani ya?

¹⁴A’di eco jotile eri ma mileari zizaru ya? Si eri ma tilea kalaasi kuru ’diyi e’da uriuriru.

¹⁵Eri ovu di afusi o’boroko ini ngo’bongo’boru’diyisi, yi eci yi tualu okporu ekile oderisirile.

¹⁶O’borokoni yi ogogo ogogo yi agyi be, ’dini oli econi ani fi talania aluni ku.

¹⁷Yi eci yi agyi be agyi be; yi ebi yi tualu, ’ba econi yi ma esele cozaru ku.

¹⁸Omvu coza erini ’diyi di lau, mileefi erini ovu ekile o’biti ma ongoro’bile,

¹⁹Alaka aciru yi efu eri ma tilea; aci nyiri ofipi ’diyi ombu uru.

²⁰Acika efu eri ma omvulea, ekile afa a’dipi a’di imvu ma aliari ma avivi, kani omi vepi veri ma acikale,

²¹Ava ’yaza erini fe acikuluni ti kozu, aci andre efu eri ma tilea ra.

²²Okpo ovu eri ma ombelekoa, e’yo uriuriruri ongo tu eri ma drilia.

²³Za eri ruaa yi osupi osu ’diyi eci yi tualu, ekpa yi eri ruaa kirikiri, econi yi onzezaru ku.

²⁴Asi erini ovu mbazaru onile, ada, eri mbazaru ekile oniandri anya ’izurile.

²⁵Eri ka i enga uru, ’ba okporu’diyi ’ye erisi urisi; uri ma e’yosi yi asi fu ra.

²⁶’Ba ka le eri ga seisi, econi ku; kani alu pisi, oliri pie, pati li be ndri ndriri pie ti.

²⁷Eri milia ayani ekile anyapatile, molani ekile pati mazarurile.

²⁸’Ye econi fe erini apazu ku; oni ’bani ’yale bakasi ’eliyi oja yi eri dri ekile anya drilekole.

²⁹Eri milia abeleku si ekile ase vozale; eri aju ’bani ’dile awu be wiri gugu.

³⁰Rua erini etinialeruri e’da ekile ajirikolo ti be cizaru ’eliyile; eri i aja ekile tiko anya cozurile orita ma dria.

³¹Eri fe yi aliruni a’di a’di ekile afa a’dipi otekuarile; eri fe mirini i ojazu odu efizale.

³²Eri fe gerini e’da i vutia dizaru; ’ba eco te ega kini ozoforo efu yi aliru ma driani,

³³Anyapa azini nyaku dria ovupi ’bazaru uri kokoru erileni yo.

³⁴Eri afa dria ovepi uru ’eliyi ondre; eri opiru anzi afuru ’eliyi ma drilia driani.