Read lugbara Yobu 42 Bible Online

Yobu 42 - lugbara bible

Yobu 42

¹Yobu nga di e’yo omvi Yehova ma na kini:

²Ma ni mi eco afa dria ’yezaru ra, ’ba econi e’yo mini otule ’yeleri ogazaru ku.

³’Ba e’yo amaza zipi nita kokoru ’dori a’di’i ya? E’yo ’disi ma ’yo e’yo mani vale kuri’i, e’yo osuzaru tu ma ndepi, mani nile ku ’diyi.

⁴Mi eri, ma matu ’ba mi vu, ma nga e’yo ’yo; ma nga e’yo zi mi tia, mi olu di ma tia.

⁵Isu de ma eri ndra e’yo kuza miniri ma bilesi, te curu’do ma mi ndre ma milesi ’do;

⁶e’yo ’disi ma ngu ma ngulupi onzi, ma oja ma asi ra irifura pi ma alia ofuta be.

⁷Eri nga eca ’dini, Yehova ka le’yo ’diyi ’yo Yobu tia ’bo, Yehova nga ’yo Elifazi ’ba Temanini ma tia kini: Emi aoko fu ma mi agyi iri ’diyi be; emini e’yo mani ’yole kililiru, ati’bo mani Yobuni ’yolerile, ’dini kurisi.

⁸E’yo ’disi emi ma obi monio aziri ndriago aziri be emi dri, muzu ati’bo mani Yobu vu, edeta vezaru edezu emi ngulupisi; te ati’bo mani Yobuni nga Mungu zi emi dri, a’disiku ma nga e’yo erini a’i ra, ma kazu emi ’yezu onduaako emini vusi ku; a’disiku emini e’yo mani ’yole kililiru ati’bo mani Yobuni ’yolerile kurisi.

⁹’Dini Elifazi ’ba Temanini pi, Bilidadi ’ba Suhini pie, Zofari ’ba Naamatini be, nga mu ’ye Yehovani azile yi ma tiarile; Yehova nga di Yobuni a’i ra.

¹⁰Yehova nga ocoko Yobuni oja; etu erini Mungu zizu i agyi dririsi; Mungu fe Yobu dri afa erini ndraka ’diyi akpazaru iri iri.

¹¹Eri ma adripi nga di emu eri vu dria, eri ma amvipi be dria, ’ba dria ndra eri nipi ’diyi pie dria, yi nga nyaka nya eri be eri vile joa; yi nga eri ovu, nga eri ma asi omi e’yo candiru dria Yehovani ejile eri ruaa ’bori ma e’yosi; yi dria alu alu nga eri dri silingi fe, driadriamva meleru ’diyi be.

¹²’Dini Yehova fe asi ndriza Yobu dri ewu asizaniria aga ndra e’dozaniriari ra; eri ovu kabilo be alifu mudri drini su, ngamia alifu azia, ti e’bu sepi iri iri ’diyi alifu iri, akanya aroniru alifu alu.

¹³Eri ovu vini agianzi be aziri, ezoanzi be na.

¹⁴’Da zamva okori ma ru Yemima’i; iriri ma ru Kezia’i; nari ma ru Kereni-hapuki’i.

¹⁵Angu ’daa dria ’ba isuni ezoanzi azini ndripi caka Yobu ma ezopile ’diyi ku; yi ati fe yi awuruso nya yi adripi ma eselia.

¹⁶’Di ma vutia Yobu ovu idriru eli turu alu drini kali su, ndre i anzipi, azini i anzipi ma anzi, kpere a’bianzi su.

¹⁷’Dini Yobu dra di ra, de eri de ’bo, eli be tre.