Read lugbara Yobu 5 Bible Online

Yobu 5 - lugbara bible

Yobu 5

¹Mi omve te nga curu’do; ’ba azini ngapi e’yo omvipi mi tiari indi ya? Mi nga mi oja ’ba alatararu ngori vu ya?

²Te aokoni ’ba ondua kokoruri funi, a’yani vini ’ba azazari funi.

³Ma ndre ndra ’ba ondua kokorurini ola suria, te ma tri pari erini adrizuri mbelekocici.

⁴Anzi erini ovu e’yo anzuru be ziri, ekpa yi kalitilia ci, te ’ba yi aripini yo.

⁵Abiri’ba yi nga di afa kaza erini nyani, eri lozu ka tro oci ma eselia ti; ’ba yi avijo be ’diyi zi yi ti mgboru lonyi erini mbazu.

⁶Inzata efuni irifura ma alia ku, ocokoni engani vini nyakua ku;

⁷te osi ’ba ocoko isuzu ekile aci nyiri ofipi ’diyini ngale ururile.

⁸Te ma’ini, ma te nga Munguni ndru, ma te vini nga e’yo mani ku Mungu vu;

⁹eri adri afa ambo ambo ’bani e’yoni vale ti ’diyi ’ye, afa osutaru tu kakau lakokoru ’diyi pie:

¹⁰eri adri ozoo fe ’dizu nyakua, eri ozoo yi ti pe amvua;

¹¹’dini eri ’ba ele ’diyi o’du o’ba uru, eri ’ba owupi candisi ’diyi enga ’bazu pari e’yo ’yaasiria.

¹²Eri ’ba lokiri be ’diyi ma lokiri oga, ’dini yi ma dri econi e’yo yini otuleri ’yezaru ku.

¹³Eri adri ’ba onduaru ’diyi obi lokiri yi ngulupinisi; eri adri ’ba lokiriru ’diyi ma e’yo amaza eza de mbele mbele.

¹⁴Angu biza isu yi etusi, yi ri dri ci angu ndruzu etu agaasi ekile inisirile.

¹⁵Eri ’ba pa sei yi ma tiliarisi, ada, eri ’ba alioru pa ’ba okporu ma dria.

¹⁶’Dini ’ba alioru ’diyi ovu ani asi teza be, e’yo onzini nga i ti obi ci.

¹⁷Mi ndre, agu Munguni otuleri eri drilebaru; e’yo ’disi mi ede Okpoe’i ma imbata ku.

¹⁸A’disiku eri bile fe, te eri vini parini ombeni; eri ebi fe, te eri ma drini vini atini.

¹⁹Eri nga mi pa candi azia ’diyi ma alia; ada, aziri ’diyi ma alia e’yo onzi ngani mi rua elo aluni ku,

²⁰Ewu likinisi eri nga mi onze dra ma driasi; ewu ombanisi eri nga mi onze okpo seini dri.

²¹Eri nga mi zi ci cota andresirisi, mi ngani ’ye urisi dri jazani emuria ku.

²²Mi nga dri jaza pi gu abiri be gu gu, mi ngani vini ’ye urisi anyapa asea ’diyisi ku.

²³A’disiku mi nga ti eci oni amvua ’diyi be, anyapa asea ’diyi nga be asi anzurusi,

²⁴Mi nga ni kini hema miniri eri e’ya ’yaa be, mi nga lico mini andri ra, te afa avipini yo.

²⁵Mi nga vini ni kini a’bianzi mini nga ovu kakau, ori mini otile ’diyi nga ovu ase nyakuarile.

²⁶Mi nga ca ’bilea de mi eli be tre, ekile anya ombele ngulururini cale ewuni tiarile.

²⁷Mi ndre, ama nda e’yo ’diri ma eti, eri ’dini. Mi eri e’yo ’diri fa, mi ni eri, mini onyi isuzu beni.