Read lugbara Yobu 6 Bible Online

Yobu 6 - lugbara bible

Yobu 6

¹Yobu nga di e’yo omvi, kini:

²Yi ka te candi mani ma nziza o’bi are, ka te ocoko mani dria ’ba ratilia indi, ’yeke fo!

³Eri te cinya miriari aga nzizasi ra; e’yo ’disi e’yo ri ndra efu ma tilia mbele mbele ani.

⁴A’disiku Okpoe’i ma ’ye ovu ma alia; orindi maniri enyataniri mvu; e’yo Munguni uriuriru ’diyi oti yi omba ’bazu ma be.

⁵Akanya aseari adri wu de iribi indi ya? Tini adri wu de ase nyaza indi ya?

⁶’Ba eco afa alupi kuri nya a’i kokoru ra ya? A’ugbe ma yi emveri ma aji alu ra ya?

⁷Ma orindi ga yi eloko si; yi ma dri nyaka irijiruni.

⁸Ma ka te e’yo mani zileri isu are; Mungu ka te e’yo mani lele avasiri fe, ’yeke fo!

⁹Ada, eri ma ovu onyiru Mungu milia ma anyizu kinyikinyi ra, eri ma nze di i dri ma ma ja dri beni fo!

¹⁰’Dini ma te nga asi omiza isu ani ra ka’dini ma te vini ma asi imba rua suza ma kupi kuri a’izu asi tezasi beni; mani e’yo Mungu Alatararurini gale kurisi.

¹¹Okpo mani ngori, ’dini mani tezu ani ya? Asiza maniri a’dini, mani ovuzu ani asi tezasi ya?

¹²Okpo mani eri okpo oninirile ya? Kalanya mani eri molaru ya?

¹³Ovuni adaru kini aza koza ma alia aluni yo, azini dro ecoza mani e’yo ’yezuri re ’bo, ’dini ku ya?

¹⁴Agu ’ba ma agyiru ma ece asi ndriza ’ba ’yepi ebipi ebiri dri, ’ba nderi ka tro Okpoe’ini ku ruzu ja ti.

¹⁵Ma agyi yi ’ye ma lokirisi ekile yi razale, yi si yi ekile yi raza nzupi rarile.

¹⁶Yi raza nde ndra iniru si e’yosi, talujini i zizu aleniari.

¹⁷Te ewu etuni kazurisi yi afi ra; angu ka ka eturu yi nzu ra, ku yi ma pari ndru.

¹⁸’Ba ongulumuru acipi yi nde ma gerisi ’diyi cia yi kalaa, yi tu fi angu roko dria, yi ja dri ra.

¹⁹’Ba ongulumuru Temaa ’diyi lu yi nde vu, ’ba ongulumuru Sebaa ’diyi yi nde ma mile ga ’dani.

²⁰Yi mile eca candiru yini ndra asi ’bale driniarisi; yi ca ’dale, yi nini yi a’di ’ye yari ku.

²¹Curu’do emi ’dinile; emi ndre e’yo uriurirori, emi ’ye ani urisi.

²²Ma ’yo te, Emi fe afa ma dri, ya? kani, Emi fe afa feza ’ba ti razuri lonyi emini ma eselia masi, ’dini ya?

²³Kani, Emi pa ma ari’bo ma dria, ya? kani, Emi onze ma ’ba ma inzapi ’diyi ma dria, ra ya?

²⁴Emi ma imba ma, ma nga di adri ciri ani; emi fe ma va e’yo mani ezaleri fu.

²⁵E’yo kililiru ’diyi yi okporu tu ’doni ya! Te e’yo emini nduni nzeleri eri otu a’di e’yoni ya?

²⁶Emi ega emi nga e’yo ’yole tisi ’diyi otu’i A’disiku e’yo ’ba avani otizu rarini ’yoleri si i olile.

²⁷Ada, emi le te odrisi ’be imvoanzi ma dria, emi le te vini emi agyi ma afa ozi orodri eminiru.

²⁸Te di, eri ma ovu onyiru emi milia ma luzu; a’disiku ada ada ma ngani inzo li emi milia ayii ku.

²⁹Emi emvi, ma matu ’ba emi vu, emi ma li e’yo kililiru kuri aluni ku. Ada, emi emvi ma vu dika; e’yo maniri kilili.

³⁰E’yo kilili kuri ovu ma andrea ra ya? Ma econi e’yo lokiriru ma aji amazaru ma andresi ku ya?