Read lugbara Yobu 7 Bible Online

Yobu 7 - lugbara bible

Yobu 7

¹Omba ’ba dri nyakua yo ya? O’du erini ovuni o’du ’ba azi ngapi oyasirinile ku ya?

²Ekile ati’boni endri lele avasirile, azini ’ba azi ngapirini oya erini ma mile galerile,

³’dinile fe ma dri mba candini ’diyi kakau, ope ma dri ini mani andezu kai kai’diyi.

⁴Ma ka la va, ma yo ra, Ma nga di enga a’dungare ya? Te ini eri izuru, ma ri ti oco kalaa kalaa ini rra kpere anguni atiria.

⁵Rua mani su eriaga pi irifura i olipi o’dutileri be bongole; ma bile yi ja ra, nga vini anya dika dika.

⁶O’du mani aga mbeleru aga afa ’ba bongo capirini wizi suzuri ra, o’du nde ’diyi aga de mani ovuria asi teza kokoru.

⁷Kirikiri mi ega kini idri mani eri olini fo; ma mile ngani e’yo onyiru ndre dika ku.

⁸’Ba ma ndrepi milesiri ngani ma lu dika ku; mi nga mi mile su ma ruaa, te ma nga ovu yo.

⁹Ekile iritini afile azini e’dale dika kurile, ’dini ’ba sipi va Pari ’ba drazaniari ngani etu uru dika ku.

¹⁰Eri ngani emvi i ma joa dika ku, pari eriniri ngani eri ni dika ku.

¹¹E’yo ’disi ma ngani ma ti obi e’yo ’yozasi ku; ma nga e’yo ’yo candi okporu ma orindinisi; ma nga wu candi manisi asi draza mani ma alia.

¹²Ma mirini, kani anyapa amboru miriari’i, mini ’ba ’bazu ma agei tezu ani ’diniri ya?

¹³Ma ka ’yo ra, Gbolo maniri nga ma asi omini, pari mani lazuri nga candi mani wuzu aniri ma aza ko were ra,

¹⁴mi di ma asia uri mi orobisi, mi adri uri fe ma dri tu afa e’dapi ma milia ’diyisi,

¹⁵’dini orindi mani pe tizuru rari pi drazu kairi be’i aga ovuzu falakoru ’daniri ra.

¹⁶Ma ngu ma idri onzi; ma leni ovu idriru ’dani ku. Mi ku ma ovu, o’du manini ovule tokorurisi.

¹⁷’Ba ovu ngoni ya, mini eri inzizu amboru, mini mi asi ’bazu eri vu,

¹⁸’dini mini eri andrizu ani o’biti vusi o’biti vusi, mini eri o’bizu inyia inyia ya?

¹⁹Mi nga mi mile ja ma vurisi kalaa a’dungare ya? kani ma kuzu a’dule mani ma cucu kizu ani ya?

²⁰Ma ka e’yo onzi ’ye ra, ma eza mi vu ngoni ya, mi ’ba agei tepiri la? Mi ’ba ma ovuzu li caza miniru a’disi ya? dini ma ovu teriru ma ma ngulupi dri ya?

²¹Mi kuni ezata mani ku e’yo onzi mani wuzu a’disi ya? A’disiku ma nga la irifura ma alia curu’do; mi nga di ma nda asi driasi, te ma nga ovu yo.