Read lugbara Yobu 8 Bible Online

Yobu 8 - lugbara bible

Yobu 8

¹Bilidadi ’ba Suhini nga di e’yo omvi, ’yo kini:

²Mi nga e’yo ’dinile ’diyi ’yo izu ngopi ya? E’yo efupi mi tiliari nga vini ovu ekile oli okporule izu ngopi ya?

³Munguni adri e’yo liza eza ra ya? Mungu Okpoe’ini e’yo liza kililiruri oja onziru ya?

⁴Mi anzipi ka tro eza eri vu, eri ka fe yini e’yo isuzu ezata yini vusi ti,

⁵Mi ka te nga e’yo zi Mungu tia asi driasi matu ’bazu Mungu Okpoe’i vu,

⁶mi ka te ovu alatararu azini kililiru ka, eri nga di i enga mi ma e’yosi ada, nga jo mini ovuzu alenia kililiruri ’ba drilebaru.

⁷E’doza mini ka tro ovu were ti, asiza miniri nga zo amboru tu.

⁸Mi zi anga e’yo ’ba ewu andrarisi ’diyini fo, mi ’ba mi asi e’yo yi ma a’bipini ndale isule ’bori ma dria;

⁹te ama’i, ’ba ajeajea ’doyi, ama nini e’yo azini ku, ewu amani nyakuarini ovule endrilendrilerisi.

¹⁰Yi ngani mi imba ku ka? ngani e’yo olu mini ku ya? yi ngani e’yo yi ma asiari ofu ku ya?

¹¹Omi eco zozaru pari orita kokoruria ra ya? Awia’i eco duzaru yi kokoru ya?

¹²De nga eri ibiru, de nga voni eri ku, eri ’wi mbeleru ase azi ’diyini oko.

¹³’Ba dria Munguni avipi ’diyi ma geri ’dini; e’yo ’ba Mungu inzipi kuri ma asini tezuri nga avi ra.

¹⁴Asi ’baza eriniri nga i nyo ra, a’ita eriniri ovu eki’e ebio ma embale.

¹⁵Eri nga i ati jo ini ma ruaa, te jo nde ngani pa so ku; eri nga eri bi kirikiri, te eri ngani ovu ’ dani ku.

¹⁶Eri adri ovu ibiru etu ma milia, drileni gbipi ’diyi ra amvu erini ma alia.

¹⁷Ola erini yi ekila yi amu ma ruaa, eri pari oni beri ndre’i.

¹⁸Eri ka dri ja i pariasi, pari nde nga di eri ga si kini, Ma ndreni nga mi ku.

¹⁹Mi ndre, geri eriniri ma ayiko eri ’di; te azini ’diyi nga efu nyakua.

²⁰Mi ndre, Mungu ngani ’ba kililiruri ’be amve ku, ngani vini ’ba e’yo onzi ’yepi ’diyi edre ku.

²¹Te kiri eri nga fe mi tile ma ga tre ogutasi, nga vini fe mi ti ga tre otrea ayikorurisi.

²²Te ’ba mi ngupi ’diyi nga ovu drinzasi; ’ba azi onzi ’yepi ’diyi ma hema ngani ovu dika ku.