Read lugbara Yobu 9 Bible Online

Yobu 9 - lugbara bible

Yobu 9

¹Yobu nga eli e’yo omvi, kini:

²Adaru, ma ni ra eri ’dini: te ’ba eco ovu kililiru Mungu ma milia ngoni ngoni ya?

³Eri ka le agata ga eri be, eri econi e’yo alu omvizaru eri tia zita alifu ma eselia ku.

⁴Eri onduaru asia, eri okporu tu -’ba i asi imbapi a’eli ’elizu eri be drileba isupi aniri a’eli’i ya?-

⁵eri adri oni ambo ambo ’eliyi o’du ji pari azinia, te yi nini e’yoni ku, erini yi oguria adra inisi;

⁶eri adri nyaku oya eri ma pariasi, agofe erini nga ani ya ya;

⁷eri e’yo azi etu ma tia, eri efuni ani ku; eri ’bi’bio opi ci;

⁸eri’i a’dule ’bu ajapiri, eri pa otu yi mirini ombupi ombu ’diyi ma dria;

⁹eri ’ba ’bi’bio ndu ndu, Leleo pi, Aseti pie, jo aliza kala uruleruria ’divi pie;

¹⁰eri adri e’yo amboru ’bani etini ndale ti ’diyi ’ye, ada, afa osutaru kakau lakokoru.

¹¹Mi ndre, eri aga ma ageia, te ma ndreni eri ku; eri aga vini drile, te ma vani eri ku.

¹²Mi ndre, eri afa opa; te a’di eco eri ogazaruni ya? A’dini nga ’yo eri ma tia, Mi a’di ’ye ya-rini ya?

¹³Mungu ngani adra erini ma ti nze ku; ’ba Rahabu ma aza kopi ’diyi avu va eri ma palaa.

¹⁴Ka’dini ’ba maleri eco e’yo omvi eri tia ngoni ngoni, e’yo mani ngale ’yole eri be ’diyi opezu ya?

¹⁵Ma ka te tro ovu kililiru ti, ma econi te e’yo omvi eri tia ku; ma te lu matu ’ba ’ba e’yo mani lipiri vu’i.

¹⁶Ma ka ndra eri omve, ka ndra omvi mani ra, ti ma econi a’izaru kini eri ma o’duko eri ra, ’dini ku.

¹⁷Erini ma nyole oli okpoturisi, erini bile ezule ma ruaa e’yo kokorurisi;

¹⁸eri a’ini mani ava sezu ku, eri fe asi draza ga ma alia tre.

¹⁹Ka e’yo okponisi, mi ndre, eri okporu! Ka e’yo lizasi, te a’dini nga pa so ma aza kozuni ya?

²⁰Ma ka tro ovu kililiru ti, ma ngulupi ma tini nga e’yo li ma ndezuni; ma ka tro ovu e’yo kokoru ti, eri nga ma e’da ’ba onzini.

²¹Ma e’yo kokoru; ma asini ma ngulupi ma e’yosi ku; ma ’ba idri mani aparakaru.

²²Eri dria e’yo alurile; e’yo ’disi ma ’yo kini, eri ’ba kililiru ’diyi pi ma dri ja ’ba e’yo onzi be ’diyi pie tualu.

²³Dra onzi ka ’ba fu rugburu, eri nga ’ba e’yo kokoruri ma candi gu gu.

²⁴Fe angu wudrikuruni ’ba e’yo onzi ’yepi ’diyi ma dria ’bo; eri ’ba e’yo lipi alenia ’diyi ma mile a’bu cika eri’i yo, eri te bani a’di’i ya?

²⁵Te o’du mani aga mbeleru aga ojio onzupi e’yo ojipiri ra; yi apa ra, yi ndreni e’yo onyiru ku.

²⁶Yi aga ekile o’bo acipi mbeleru ’diyile, aji esipi hwi va za driarile.

²⁷Ma ka ’yo ra, Ma drini nga awu mani ma e’yo avi ra, ma nga mile mani candiruri oja ra, ma nga ovu ayikosi,

²⁸te ti ma ovu urisi candi mani ’diyisi dria, ma ni ra mi ngani ma la ekile ’ba e’yo kokorurile ku.

²⁹Mi nga e’yo li ma ndezu; ka’dini ma ma ecandi toko a’disi ya?

³⁰Ma ka tro ma oji yi sirurisi ti, ma ka tro ma dri oji alatararu sabunisi ti,

³¹te mi nga ma su yi geria, ma vile bongori nga ani ma ngu onzi.

³²A’disiku Mungu ovuni ’ba ekile male, mani ani e’yo omvizu tiniani, amani efizu ani pari e’yo lizuria tualu ’dini ku.

³³’Ba e’yo lipi ama eselia ecopi i dri ’bapi ama ruaa iri troni yo.

³⁴Eri ma nze kali ini ma vurisi fo! E’yo erini uriuriruri ma fe mani uri ku.

³⁵Ka’dini ma te nga e’yo ’yo, ma ngani di ’ye erisi urisi ku, te ma ngulupiruni ovuni ’dini ku.