Read lugbara Zaburi 10 Bible Online

Zaburi 10 - lugbara bible

Zaburi 10

¹Mi so pa re a’disi ya, Yehova? Mi zi mi etu candini ’diyisi a’disi ya?

²Asi afu yinisi ’ba onzi ’diyi yi ’ba alioru ’diyi ma vuti dro okposi; mi fe e’yo yini otule yi asia ’diyi ma bi yini.

³A’disiku ’ba onzi ’diyi ovu afusi e’yo yi ma asini lelerisi, azini ’ba li ’bapi ’ba azini ma afasi ’diyi ga Yehovani si, adaru yi ’ba eri toko.

⁴’Ba onzini ’yo mile ini afururisi kini, Eri ngani le ma ma ofe arotini ku; asisile erini dria ovu ’dini, kini, Mungu aluni yo.

⁵Eri drilebaru geri vusi dria etu dria; e’yo liza mini yi uru tu aga angu neza eriniri ra; eri ipi i tu ari’ba erini dria ’diyisi,

⁶Eri ’yo i asia, Ma ngani ovu ojazaru ku; cazu kpere a’bianzi ’bani vusi dria, ma ngani candi ni ku.

⁷Ti erini ga tre ’ba triza pisi, inzo pie, ’ba inzazuri be; andre erini ma etia lokiri pi e’yo onzi be.

⁸Eri ri pari ini i zizu aku eseliaria; pari zizaru ma alia eri ’ba e’yo kokoru ’diyi ofu. Mile erini ovu ’ba ’bani azani kole kuri vu okposi,

⁹eri zi i pari zizaruria ekile kamini i zile ’bile ini ma aliarile; eri do i e’yere ’ba alioru mbazu, eri vini ’ba alioru bi, eri ka eri ese emba ini ma alia ra.

¹⁰Eri ’ba i ngonde, eri avu va, ’ba ’bani azani kole ku ’diyi e’de va ’ba erini okporu ’diyi dri.

¹¹Eri ’yo i asia kini, E’yo avi Mungu dri ’bo, Mungu zi i mile ra, eri ngani e’yo nderi ndre aluni ku.

¹²Mi enga fo, Yehova; Mungu la, mi enga dri mini uru; mi dri ma avi ’ba alioru ma e’yosi ku.

¹³’Ba onzi yi onzo Mungu ma e’yo ra a’disi ya? Eri ’yo i asia kini, Mi ngani le ma ma ofe arotini ku! a’disi ya?

¹⁴Te mi ndre e’yo nderi ’bo; a’disiku mi adri asi onzi pi ndre ma’yala be, mi ma ofe e’yo nde ’diyi mi drisi mi’i ani beni; ’ba ’bani azani kole kuri ku i ma ngulupi mi dri; mi adri imvoanzi ma aza ko mi’i.

¹⁵Mi nyo ’ba onziri ma wu; mi ma nda ezata ’ba e’yo onzi ’yepirini cazu kpere mini azini isuzu dika kuria.

¹⁶Yehovani Opiru ’dani ’danini; suru ndu ndu yi ja dri angu erini ma aliasi ’bo

¹⁷Yehova, mi eri e’yo ’ba afu kokoruni leleri ’bo; mi nga asi yini ede, mi nga fe bile mini ma eri e’yoni,

¹⁸imvoanzi pi ma e’yo lizu ’ba ’bani ecandile ’diyi be, ’ba nyakuni ’diyi ma fe uri ’ba asia dika ku ani.