Read lugbara Zaburi 102 Bible Online

Zaburi 102 - lugbara bible

Zaburi 102

¹Mi eri zita mani fo, Yehova; mi fe wuta mani ma ca mi vu!

²Mi zi mi mile masi o’du mani ovuzu candisirisi ku fo! Mi co mi bile ma vu; mi omvi e’yo ma tia mbele o’du mani mi omvezurisi!

³O’du mani yini afile acikalerisi, azini fala mani ve ekile ejatile.

⁴Vu ma asi ekile asele, eri ’wi ra; nyaka nyaza ma e’yo avi ma dri nyazaru ra,

⁵O’duko mani wuzu candi tazuri ma e’yosi fala mani ebi yi za ma ruaari be ci.

⁶Ma ovu ekile yi aria aroroaru angu didi ma aliarile, ma oja ma ekile emaa Pari tokoarile;

⁷ma la mile be ’dani, ma si ekile kolikoli ovupi a’dulesi jo driarile,

⁸Ari’ba mani yi ma o’da o’du dria, ’ba engapi ma ruaa asi drazasi ’diyi yi ’ba tri masi.

⁹Te ma nya ofuta ekile ’bani enya nyalerile, afa mvuza mani osa i mindresi,

¹⁰asi veza mini pi ma e’yosi adra mini be; a’disiku mi ’du ma ra, ma ’bezu amve.

¹¹O’du mani yi ovu ekile endrilendri i ojapi izururile, ma ’wi ekile asele.

¹²Te mi’i, Yehova la, mi nga adri ’dani; yi nga ru mini ega kpere a’bianzi vusi dria.

¹³Mi nga enga ra, yiki ’bazu Zioni ma dria; etu yiki ’bazu eri vuri eca di ’bo; adaru etu peleri eca ’bo.

¹⁴A’disiku ati’ba mini ovu ayikosi oni ’bani ani eri sizu ’diyisi, yi ovu yikisi irifura erini ma e’yosi.

¹⁵’Ba jururu ’diyi nga di ru Yehovani ru ani, opi nyakua ’diyi dria nga diza mini ru indi.

¹⁶Yehovani Zionini sile ’borisi, eri e’da i diza ini be;

¹⁷eri ega ’ba afa kokoruri ma zita ra, eri onzoni zita yini ku.

¹⁸Yi nga e’yo ’diri si a’bianzi ngale otile vile’diyi dri, suru ’bani ngale tileri nga Yehovani inzi;

¹⁹erini lule va engazu pari erini alatararu uru turiarisi, Yehovani ovuria ’bua eri elu angu nyakuari,

²⁰eri ma eri ani ’ba arujoari ma otaza, eri ma otru ani ’ba opele drani ’diyi;

²¹’ba ma e’da ru Yehovani Zionia ani beni,

²²’ba ma e’da vini inzita erini Yerusalemua indi, ’ba jururu ’diyini ngaria yi okuria tualu, suri ndu ndu be, Yehovani inzizu.

²³De ma geria, omvi ma okpo were; etru vini o’du mani were.

²⁴Ma ’yo ra, Mungu mani la, mi ’duma o’du mani ma eselia agadua ku fo; eli mini ovu kpere a’bianzi vusi dria!

²⁵Mi ’ba nyaku ma eti gbudrio, ’buri mi dri pamvuni.

²⁶Yi nga dri ja ra, te mi nga adri ’dani; ada yi dria nga de yaliyali bongole. Mi nga yi ele afa suzale, azini yi nga yi oja ndu;

²⁷te mi ovu ojakokoru ’dani, eli mini ngani asi ku ’dani ’dani,

²⁸Ati’ba mini ’diyi ma anzi nga ovu ’dani; ori yini nga pa so okporu mi drilia ra. (Zaburi Daudini.)