Read lugbara Zaburi 103 Bible Online

Zaburi 103 - lugbara bible

Zaburi 103

¹Mi inzi Yehovani, asi maniri afa dria ovupi ma alia ’diyi, emi ma inzi ru erini alatararuri’i!

²Mi inzi Yehovani, asi maniri la, mi dri ma avi e’yo dria erini ’yele mi vu onyiru ’diyisi ku,

³eri’i e’yo onzi mini wupi driari, eri’i azo mini dria atipiri,

⁴eri’i idri mini onzepi dri jaza ma aliari, eri’i leta asi ndriza beri pi supi mi dria yiki aleruri beri,

⁵eri’i fepi tile mini ma ga tre afa onyirusiri, ’dini karilau ma okponi nga emvi mi ruaa ekile okpo ajinirile ani.

⁶Yehovani ’yeta onyi be ’diyi ’ye eri ’ba ’bani inzale ’diyi dria ma e’yo li kilili.

⁷Eri ece ndra geri ini Musa dri, ece azi ini anzi Israelini ’diyi dri indi.

⁸Yehova ga asi ndriza pisi ’yeta anzutiri be tre, eri ’bani aoko mbele ku, eri yiki aleruri ma e’ini.

⁹Eri ngani ega ’ba dria ’dani ku, eri ngani ovu ombasi ’dani ’dani ku indi.

¹⁰Eri ’yeni ama be ekile ezata amani ezale ’diyi vusi ku, feni vini panga ama dri ekile e’yo onzi amani ’yelerile ku indi.

¹¹Ekile ’buni ovule nyaku ma drilia uru turile, ’dinile yiki aleru eriniri ovu amboru tu ’ba eri rupi ’diyi vu;

¹²ekile pari etuni efuzuriarini ovule re pari etuni ’dezuriari berile, ’dinile indi eri co ezata amani pi ma esele ama be re.

¹³Ekile atani ovule yikisi anzi ini: vurile, ’dinile Yehova ovu yikisi ’ba eri rupi ’diyi vu,

¹⁴Erini rua amani ma e’yo nile rarisi; eri ega ’dani kini ama irifurani.

¹⁵O’du ’bani ’diyi ovu eki asele; ekile afa idiza aseari ma fule, ’dinile ’ba yi fu zo ra;

¹⁶te oli lieri ma dria, eri avi ra, pari eriniri fi ndru, ngani di eri ni dika ku.

¹⁷Te yiki aleru Yehovaniri ovu engazu drio ’dani ’dani kpere ’dani’dani ’ba eri rupi ’diyi vu, azini onyi erini ovu a’bianzi ma anzi vile ’diyi vu,

¹⁸’ba aziza erini ma ta mbapi azita erini ma e’yo egapi yi ’yepi ra ’diyi vu,

¹⁹Yehova ’ba oguna ini pa sozu ’bua, opi nyaza eriniri ovu afa dria ma drilia.

²⁰Emi ma inzi Yehovani, emi malaika erini ’diyi la, emi ’ba okpo be tu e’yo erini ’yoleri ’yepi ra ’diyi, emini e’yo erini ma o’duko eriria!

²¹Emi inzi Yehovani, emi asikari ongulumuru erini ’diyi dria, emi ati’ba erini e’yo erini leleri ’yepi ’diyi!

²²Emi inzi Yehovani, emi afa erini o’bale ’diyi dria, pari vusi dria angu erini nyaleri ma alia. Asi mani la, mi inzi Yehovani!