Read lugbara Zaburi 104 Bible Online

Zaburi 104 - lugbara bible

Zaburi 104

¹Mi zi Yehovani, asi maniri Yehova Mungu maniri la, mi amboru tu! Mi su inzita pi mi ruaa diza opiniri be,

²mi osu mi dizasi ekile afa suzale, mi aja ’bu ekile bongo amborurile.

³Mi i’di jo mini ma pati yi alia, mi ’ba iriti mi ma gariru, mi aci oli ma opile dria,

⁴mi ’ba oli mi ma ojioru, mi ’ba ad dipi diri ati’ba miniru.

⁵Mi ’ba ndra nyaku ma eti eri ma oya i ’dani ku beni.

⁶Mi a’bu eri miri alirurisi bongole; yi nde so pa oni ma dria.

⁷Te mini egaria yi ma driaria, yi apa ra; noza miniri ma awusi yi apa mbele.

⁸Oni enga yi uru, azini e’bu yi si va kpere pari mini edele yi driria.

⁹Te mi ’ba lokiri yi dri ’bo, yi ma aga ku beni, yi kazu emvizu dika angu a’wiru a’buzu ku.

¹⁰Mi fe yi a’dini egazu e’bu ma alia; razu oni ma eselesi,

¹¹yi nde fe yi mvuza anyapa asea ’divi dri dria; akanya asea ’diyi ma yi avijo asi ani ra.

¹²Aria ’bua ’diyi adri o’a yi nde ma tia; yi ma o’dukoni efu ci ci cile arakalani ma eselia.

¹³Mi oni ambo ambo emvu yi efupi jo mini uruleruri ma aliarisi; nyaku tra azi ngaza mini ma efi kazasi.

¹⁴Mi fe ase ma zo anyapa dri, tibi ma zo ’ba aza kozu indi; mi fe nyakuni nyaka kazu,

¹⁵ patiefi ma su ayiko fepi ’ba asiari pi, odu andretini dizuri pie, enya ’ba asi ’bapi okporuri pie.

¹⁶Pati Yehovani ga tre susi, mario Lebanonia erini sale ’diyi.

¹⁷Alenia aria yi si jorovu yini; te kapia ’ba i ma jo pati izuru ma sia.

¹⁸Oni izuru ovu ndri asea ’diyi ma pari; kata ovu pari andoni yi ma ta mbazuriru.

¹⁹Mi ’ba mba eli pi awazu ayi be; etu ni geri ini ’dezuri ra.

²⁰Mi ’ba angu biza, eri inini; inisi anyapa oce talaa ’diyi dria adri efu yi ombazu e’yere e’yere.

²¹Kamianzi wu za yini ndruzu, yi ndru za yini Mungu vu.

²²Etu ka enga ra yi emvi vile lazu va oji yini ma alia.

²³’Ba efu ani azi yinia, azi ngazu cazu kpere ondresi.

²⁴Yehova la, ’yeta mini ’diyi yi esele be kakau ’doni ya! Mi o’ba yi dria onduasi; nyaku ga tre lonyi minisi.

²⁵Mirini ’dale ’daa, amboru azini walaru, alenia afa acipi ’diyi yi karakarau,lakokoru, nyiri pie, ’wara pie.

²⁶Oguru aci drinia; alenia ’dale anyapa amboru mini ’bale avita avizu aleniari’i,

²⁷Afa ’diyi dria yi mi te, mini nyaka fezu yi dri ewu ’yekeria.

²⁸Afa mini fele yi driri yi o’du ra; mi zi mi dri walaru, yi tra ani afa onyiru ’diyisi.

²⁹Mi a’bu mi mile ci, yi ovu ani candisi; mi nze ava yini, yi odra ani ra mvizu dika irifura yinia.

³⁰Mi pe Orindi mini ma ti, yi ovu ani ’bazaru; mi fe idri o’diru nyaku dria.

³¹Diza Yehovani ma adri ’dani ’dani, Yehova ma ovu ayikosi ’yeta erini ’yele ’diyisi,

³²Eri lu nyakua, nyaku oya ani ra, eri elo oni rua, acika efu ani ra!

³³Ma nga ongo ngo Yehova dri de ma idriru; ma nga Mungu mani inzi ongosi de ma indi.

³⁴yikiza mani ma ovu eri dri aluzaru; ma nga ovu ayikosi Yehovasi.

³⁵’Ba e’yo onzi ’yepi ’diyi ma ja dri nyakuasi ra, ’ba onzi ’diyi ma ovu dika yo! Mi inzi Yehovani, asi mani la! Emi inzi Yehovani!