Read lugbara Zaburi 105 Bible Online

Zaburi 105 - lugbara bible

Zaburi 105

¹Emi fe awa’difo Yehova dri fo, emi omve ru erini, emi fe ’ba jururu ma ni ’yeta erini!

²Emi ngo ongo eri dri, emi ngo ongo inzitani eri dri, emi olu ’yeta erini osutaru ’diyi ma e’yo dria!

³Emi enya emi ru erini alatararurisi; ’ba Yehovani ndrupi ’diyi ma asi ma ovu ayikosi!

⁴Emi nda Yehovani okpo erini be, emi nda mile erini ’dani ’dani!

⁵Emi ega ’yeta osutaru erini ’yele ’diyi, tali erini piyi e’yo liza efupi eri ma tilia ’diyi be,

⁶emi ori Iburahimu ati’bo erinirini ’di yi la, emi anzi Yakoboni, ’ba erini opele ’diyi!

⁷Eri Yehova Mungu amaniri’i; e’yo liza erini ’diyi ovu angu wudrikuru dria ma alia.

⁸Eri ega aziza erini azileri ma e’yo ’dani, azita erini azile kpere a’bianzi alifu alifu ’diyi vusiri,

⁹ aziza nde erini azile ndra Iburahimu beri, oyo erini sole Isaka tiari.

¹⁰Eri ’ba e’yo nde okporu Yakobo dri azitaru, ’ba eri vini Israeli dri azita ’dani ’daniriru indi,

¹¹’yozu kini, Ma nga angu Kananini fe emi dri awiafaru, awazaru emi dri.

¹²Yi ka ndra tro ovu were ti, adaru yi were tu, azini yi ovu angu nde ma alia ani’baru,

¹³yini aciria ’ba jururu ma eselia, engazu suru aluria cazu suru aziniri vu,

¹⁴eri a’ini ’ba aluni ma ’ye yi onzi ku; adaru eri ega opiyi ma dria e’yo yinisi,

¹⁵’yozu kini, Emi elo ’ba mani odu osule drinia ’diyi ku, emi ’ye nabi mani onzi aluni ku!

¹⁶Eri nga di liki omve ’dezu angu dria, eri nga nyaka ’bani o’azu aniri eza teketeke.

¹⁷Eri pe ’ba alu ma ti yi ma drilia, Yusufu yini jele ati’boruri’i.

¹⁸Yi eci eri ma pa emvesi, emve nde oli eri ma pa azo be, eri la ombezaru anziriku ayarusi;

¹⁹de nga e’yo erini ’yeni i ku e’yo Yehovani o’bi eri ra.

²⁰Te opi nga ’ba ti pe eri truzu, adaru opi ’ba juruniri ku eri ma mura;

²¹eri nga di eri ’ba opiru aku ini ma drilia, ovuzu afa ini ’diyi ma drileru dria,

²²otrezu opianzi erini ma dria erini lelerile, eri ma imba ’ba ’wara erini ondua nizu.

²³Israeli nga di fi Misiria indi; Yakobo nde nga ovu ani’boru angu Hamuniri ma alia.

²⁴Yehova fe ’ba ini ’diyini ezuzu tu, eri fe yi ma ovu okporu aga ari’ba yini ra.

²⁵Te eri nga ari’ba ma asi oja ’ba ini nguzu onzi, yi ma ’ye ani ati’ba erini ’diyi vu lokirisi.

²⁶Eri nga di Musa ati’bo eriniri pi ma ti pe Aroni erini peleri be.

²⁷Eri nga e’yo erini ecetaru ’diyi ’ye yi ma eselia, tali pie, angu Hamuniri ma alia.

²⁸Eri pe angu biza ma ti, angu bi ani bi bi; yi gani eri ma ti si ku.

²⁹Eri oja vini yi yini ariru, e’bi yini ofuzu.

³⁰Odrukodru ga yi ma angua tre tre tre, kpere yi ma opiyi ma jo aliza ’diyi ma aliasi.

³¹Eri ’yo e’yo, onyukunyu nga ti ani karakarau, uri ’ba ruaa ’diyi ti indi angu yini ma kala vusi dria,

³²Eri fe si yi dri ozoo ma paria, ovini ogazu angu yini ma alia.

³³Eri eza pati yini zabibuni ’diyi pi elio pati yini be, eri onyo pati angu yini ma kala vusi ’diyi ra.

³⁴Eri ’yo vini e’yo, ombi ecea ani ra, o’doa piyi karakarau lakokoru;

³⁵yi nga afa ibiru onya dria angu yini ma alia, onya afa kapi nyaku yini ma alia ’diyi indi.

³⁶Eri ofu anzi osipi oko angu yinia ’diyi dria ra, okpo yini dria ma esele drileri’i.

³⁷Eri nga di Israeli pi ofu dahabu pi be dria mele be, suruti erini ma eselia ’ba okpo kokoruni aluni yo.

³⁸Misiri ovu ayikosi tu yi ka fu mu ra, yini ’yele urisi yisirisi.

³⁹Eri aja iriti yi dri a’buzu, fe ad indi diza fezu yi dri inisi.

⁴⁰Yi zi eri tia, eri eji ani ali’bo, eri fe yi tra enya ’buarisi indi.

⁴¹Eri asi oni kataruri ra, yi egbi ani; yi nderi ra angu a’wiru ma alia yi arale.

⁴²A’disiku erini e’yo ’yoza ini alatararuri pi ma e’yo egale Iburahimu ati’bo iniri berisi.

⁴³Eri nga suru ini ofu ayikosi, ’ba ini opele ’diyi ofuzu ongo ngoza be tia.

⁴⁴Eri nga suru ndu ndu ma angu fe yi dri; yi opa azi ’ba jururu ’diyini ngale yi ma drisiri yiniru indi,

⁴⁵yi ma mba ani e’yo erini azile ’diyi ma ta, ma ’ye azita erini ’diyi indio Emi inzi Yehovani!