Read lugbara Zaburi 107 Bible Online

Zaburi 107 - lugbara bible

Zaburi 107

¹Emi ma fe awa’difo Yehova dri, erini ovule onyiru risi; eri ma yiki alerurini adrile ’dani ’danirisi!

²’Ba Yehovani onzele ’diyi ma ’yo ’dini, ’ba erini onzele ari’ba ma dria,

³erini okule engazu angu dria ma alia ’diyi, engazu woko etuni efuzuria, azini etuni ’dezuria, engazu angu andraleruria, engazu vini angu uruleruria dria.

⁴’Ba azini ’diyi aba ndra angu roko driaria, pari yi kokoruri ma alia, yi isuni aku yini ngazu ovuzu aleniari ku;

⁵yini ovuria abirisi azini yi avijosi, orindi yi ma aliari ma ava fu ra.

⁶Etu ’dasi yi wu Yehova vu ocoko yini ma alia, eri nga di yi ari e’yo ewaru yini ma alia;

⁷eri ce yi dri geri kililirurisi cazu kpere aku yini ngazu ovuzu aleniaria,

⁸’Ba ka te Yehovani inzi onyi erini ma e’yosi, ’yeke fa, ’yeta osutaru erini ’yele anzi ’bani dri ’diyisi indi!

⁹A’disiku eri fe ’ba yi avijo beri ma avijoni i dezu, azini eri fe ’ba abiri berini trazu onyisi.

¹⁰’Ba azini ri ndra angu inirua azini dra ma endrilendria ombezaru ayasi candi ma alia,

¹¹yini e’yo Munguni gale sirisi, yini e’yo amaza Mungu Uru Agapi Turini gale sirisi.

¹²E’yo ’disi eri ji asi yini va azi okporusi; yi ’de va, te ’ba yi aza kopiri aluni yo.

¹³Etu ’dasi yi wu Yehova vu candi yini ma alia, eri nga di yi pa e’yo ewaru yini ma alia ra;

¹⁴eri ofu yi amve engazu angu inirua azini dra ma endrilendria, eri onyo anziriku yini mgbirimgbiri,

¹⁵’Ba ka te Yehovani inzi onyi erini ma e’yosi, ’yeke fo, ’yeta osutaru erini ’yele anzi ’bani dri ’diyisi indi!

¹⁶Erini kalitile molaru ’diyi onyole rarisi, erini katala ayaru jotile opizu ’diyi ma aleni onyole iririsi.

¹⁷’Ba azini ondua kokoru ’diyi isu ndra inzata ra ezata yini ma e’yosi, yini e’yo onzi ’yelerisi;

¹⁸yi ma asi ngu nyaka dria ma aji onzi, yi si dra ma kalitile vu ogogo.

¹⁹Etu ’dasi yi wu Yehova vu candi yini ma alia, eri nga di yi pa ani e’yo ewaru yini ma alia ra;

²⁰eri pe e’yo ini ma ti yi rua atizu, o eri onze yi dri jaza yini ma alia.

²¹’Ba ka te Yehovani inzi onyi erini ma e’yosi, ’yeke fo, ’yeta osutaru erini ’yele anzi ’bani dri ’diyisi indi!

²²Yi ma ede edeta awa’diforu, yi ma olu vini ’yeta erini ma e’yo ongo ngozasi indi!

²³’Ba azini si ndra va miria oguru ma alia azi ngazu miri aliru ma alia;

²⁴’ba ’diyi ndre ’yeta Yehovani, yi ndre tali erini miri aliru ma alia.

²⁵A’disiku eri fe azita, akulukuni engazu okporu, oli nde fe yi mirini mbuzu uru

²⁶Yi tu uru ’bua, yi esi va angu valerua dika; asi yini aka aka candi yini ma e’yosi;

²⁷yi aba aba, yi ad parapara ’ba ewani fulerile, yi nini yi ma ’ye ngoni yari ku.

²⁸Etu ’dasi yi wu Yehova vu candi yini ma alia, eri nga di yi ofu e’yo ewaru yini ma aliasi amve;

²⁹eri fe akuluku ma ovu ndi, yi mbuzani nga pa so ndi ani.

³⁰Yi ovu di ayikosi yini ava lilerisi; ’dini eri ji yi yikuti yini lele cale vuniaria.

³¹’Ba ka te Yehovani inzi onyi erini ma e’yosi, ’yeke fo, ’yeta osutaru erini ’yele anzi ’bani dri ’diyisi indi!

³²Yi ma ’ba eri uru inzizaru okuza ’bani ma eselia, yi ma inzi eri pari ’ba ’warani rizu oguna driaria indi.

³³Eri oja yi ara ovuzu angu roko driariru, eri oja yi a’di ovuzu angu a’wiru,

³⁴eri oja angu efi kapi turi ovuzu angu yi kokoru a’i beriru, ’ba ovupi alenia ’diyi ma ezatasi.

³⁵Eri oja angu roko driari ovuzu yi atipi atiriru, eri oja angu a’wiru ovuzu yi a’diru.

³⁶Eri fe ’ba abiri be ’diyi ma adri alenia, yi ma si aku amboru yini ngale ovule aleniari ’dale;

³⁷yi ma fa amvu, ma isi zabibu, ma isu ani efi kaza onyiru.

³⁸Eri fe asi ndriza yi dri indi, yi ma ezu ani karakarau; eri a’ini ti yini ma kalafeni mvizu wereru ku.

³⁹Te dika, yi anu were, yi si va, inzata pisi, e’yo ewaru pie, e’yo candiru pie;

⁴⁰eri ’ba ’ba opianziru’diyiaparakaru, eri fe yi aba angu didi ma alia pari gerini ovuzu yoria;

⁴¹te eri ’ba ’ba afa kokoru ’diyi uru: engazu candi yini ma alia, eri ’ba anzi yini kakau kabilo o’birule.

⁴²’Ba kililiru yi asia ’diyi nga e’yo nderi ndre ra, yi ovu ani ayikosi; e’yo onzi driani nga i ma tile obi ci.

⁴³’Ba ovupi onduaru ’diyi nga asi ’ba e’yo ’diyi ma driani; yi nga yiki ale be Yehovaniri ma e’yo ega’i.