Read lugbara Zaburi 108 Bible Online

Zaburi 108 - lugbara bible

Zaburi 108

¹Asi mani so pa kirikiri, Mungu la! Ma nga ongo ngo, adaru ma nga inzita ma ongo ngo asi mani be!

²Emi enga, emi o’di zaburi ngozuri pi o’di amboruri be! Ma ma ngulupini nga oru o’biti kula kula!

³Ma nga awa’difo fe mi dri, Yehova, ’ba jururu ’diyi ma eselia, ma nga ongo ngo mi ru inzizu suru ndu ndu ma eselia.

⁴Yiki aleru minirini ovule amboru uru aga ’bu rarisi, e’yo ada miniri ca uru kpere ’bua.

⁵Mi ma ovu inzizaru, Mungu la, aga ’bu ra! Diza mini ma ovu uru aga angu wudrikuru dria ra!

⁶Mi ma pa ama dri ndi minirisi, mi omvi e’yo ama dri, mi ma ari ’ba mini lele turi ani!

⁷Mungu ’yo e’yo alatara inisi ’bo: Ma nga otre ani ayikosi tu, ma nga Sekemuni awa, ma nga a’bu Sukotiari ma lokiri awa bakasi.

⁸Gileadini mani; Manaseni mani indi; Efiraimuni vini biri ma driari’i; Yudani kali mani opiniri’i.

⁹Moabuni awala mani ma rua ojizuri’i; ma nga enyiriko ma paari ’be Edomu ma dria; ma nga cere ombani o’be Filisitia ma ari pezu.

¹⁰A’dini nga ma ji aku amboru kali okporu beri ma aliani ya? A’dini nga ma dri ce kpere Edomuani ya?

¹¹Te Mungu la, mi ’beni ama ku ya? Mungu la, mi funi curu’do muzu ’ba ongulumuru amani omba ’bapi ’diyi be tualu ku.

¹²Mi ko ama aza a’di ’dizu ari’ba be fo, aza koza ’bani felenirini ovule tokorisi!

¹³Te Mungusi ama nga ’ye asi okporusi; eri’i, eri nga ari’ba amani otu pasi vani. (’Ba ongo dri cepiri dri. Zaburi Daudini.)