Read lugbara Zaburi 109 Bible Online

Zaburi 109 - lugbara bible

Zaburi 109

¹Mungu mani inzileri, mi ovu ciri ku fo!

²A’disiku ’ba onzi pini yi ma ti zile ma ruaa ’ba lokiri be ’diyi berisi, yi e’yo ’yo ma ruaa andre inzorurisi.

³Yi ace vini ma kuru kuru e’yo ’yole anguonzisirisi, yi omba ’ba ma be e’yo kokoru.

⁴Ma ka ovu yi vu alesi ti, yi ovu ’ ma vu ari’baru, te ma’i, ma fe ma ngulupi Mungu zizu asi alusi.

⁵Te yi ofe e’yo onzi ma dri e’yo i onyiru ma paria, yi ofe anguonzi leta mani ma paria,

⁶Mi ’ba ’ba onziri eri ma drilia; mi fe ’ba asu supiri ma so pa eri ma dri ndiria.

⁷’Ba ka e’yo erini li, e’yo ma nde ’ eri ra; mi fe zita erini ma eca ovuzu e’yo onziru!

⁸ Mi fe o’du erini ma ovu were; ’ba azini ma nga azi eri pariani!

⁹Anzi erini ma ovu imvoanziru, te oku erini ma ovu awuziouru!

¹⁰Anzi erini ma aba ’dile ’dole afa a’izu; yi ma nda nyaka yini engazu pari andruru ’diyi ma alia!

¹¹’Ba afa ’bani nyapi ereza be onziri ma bi afa erini dria; ’ba emuza ma opa azi erini ma orodri dria!

¹²Mi fe ’ba aluni ma ’ba yiki eri vu ku, vini ’ba aluni ma ’ba asi ndriza imvoanzi erini vu ku!

¹³Ori erini ma ja dri ra; ma mi ru yini anzi yini ma anziazi ’diyi ma eseliasi ra!

¹⁴Yehova ma ega e’yo onzi eri ma atipini ’yeleri, ma ini vini andri erini ma ezata ku!

¹⁵Yi ma ovu Yehova ma milia ’dani; eri ma ini ani egata ’bani e’yo yini egazuri nyakuarisi ra!

¹⁶Erini asile yiki ’bazasi kurisi, te eri inza ’ba alioru afa kokoruri azini ’ba asi nyozaru be ’diyi, yi ofuzu.

¹⁷Adaru, eri le ’ba trizu; te e’yo nde ma ca eri dria be! Eri ovuni ayikosi asi ndriza ’bazu ku; te e’yo nde ma ovu eri vu ziri fo!

¹⁸Eri su e’yo ’ba trizuri i ruaa ekile bongole; e’yo nde ma fi kpere eri ma alia ekile yile, kpere fala erini ma alia odule!

¹⁹E’yo nde ma ovu eri dri ekile bongo erini sule ruaarile, ma ovu enyiriko erini eri opile a’dizu etu zurile!

²⁰E’yo ’diri ovu panga ma ari’bani isule Yehova vuri, ’di ’ba e’yo onzi ’yopi idri mani ma e’yosi ’diyi ma pangani!

²¹Te mi’i, mi ’ye ma vu ru mini ma e’yosi, Yehova Opi maniri la; yiki aleru minirini ovule onyirurisi, mi pa ma fo!

²²A’disiku mani ovule alioru afa kokorurisi, mani ebi isule ma asia ’borisi.

²³Ma avi ekile endrilendri etuni ’deriarile; ’du ma uru, ’be ma va ekile ombile.

²⁴Ma kumuti yi aka aka, mani nyaka ’dale ’darisi; oso de i ma ruaarisi ra.

²⁵Ma eca ajidimararu yi dri; yi ka ma ndre ra, yi oya yi dri oya oya.

²⁶Mi ko ma aza, Yehova Mungu mani fo! mi pa ma yiki aleru miniri vusi fo!

²⁷’Ba ma ni kini ’di dri miniri’i; mi ’ye e’yo ’diri mi’i, Yehova!

²⁸Yi ka ma tri ra ti, te mi’i, mi fe asi ndriza! Yi ka nga enga ra yi nga ovu drinzasi; te ati’bo miniri nga ovu ayikosi!

²⁹Ari’ba mani ma su drinza yi ruaa bongole; mi fe yi ma a’bu yi drinza yinisi ekile bongo ’bezasirile!

³⁰Te ma nga awa’difo fe Yehova dri amboru ma tisi; ada ma nga eri inzi ’ba ongulumuru ma eselia.

³¹A’disiku erini ngale pa sole ’ba afa kokoruri ma dri adaria, eri pazu ’ba e’yo lipi eri ma dria ’diyi ma driarisi.