Read lugbara Zaburi 118 Bible Online

Zaburi 118 - lugbara bible

Zaburi 118

¹Emi fe awa’difo Yehova dri fo, erini ovule onyirurisi; eri ma yiki alerurini adrile ’dani ’danirisi!

²Israeli ma ’yo kini, Yiki aleru eriniri adri ’dani ’dani.

³Suru Aronini ma ’yo kini, Yiki aleru eriniri adri ’dani ’dani.

⁴’Ba Yehovani rupi ’diyi ma ’yo kini, Yiki aleru eriniri adri ’dani ’dani.

⁵Candi mani ma alia, ma omve Yehovani; Yehova omvi e’yoni ma tia, eri ’ba ma pari amboru ma alia.

⁶Yehova fi mani ’bo, ma ngani ru ku. ’Ba ceo ma ruaa a’di ’yezaru ya?

⁷Yehova fi mani, ’ba ma aza kopi ’diyi ma eselia; e’yo ’disi ma nga lu nyonasi ’ba ma ngupi onzi ’diyi ma ruaa.

⁸Eri onyiru tu ’bani yi ma asi ’bazu Yehovani a’izu aga asi ’bazu ’ba a’izuri ra.

⁹Eri onyiru ’bani yi ma asi ’bazu Yehovani a’izu aga asi ’bazu opianzi a’izuri ra.

¹⁰Suru dria ace ma kuru; te ru Yehovanisi ma nga yi dri ja ra!

¹¹Yi ace ma kuru, ada yi ace ma kuru kuru ra; te ru Yehovanisi ma nga yi dri la ra!

¹²Yi li yi ma ageia ekile anyuni yi lilerile, yi odra ociacini dralerile; ru Yehovanisi ma nga yi ma drijara!

¹³Mi o’bi ma ’dizu okporu ma ma e’de va ani, te Yehova ko ma aza ra.

¹⁴Yehovani okpo mani azini ongo mani; eri eca pata maniru indi.

¹⁵O’duko ayikoru azini pataniri ovu ’ba kililiru ’diyi ma hema ma alia. Dri ndi Yehovaniri ’ye okposi tu,

¹⁶dri ndi Yehovaniri uru, dri ndi Yehovaniri ’ye okposi tu!

¹⁷Ma ngani dra ku, te ma nga ovi idriru, ma nga ’yeta Yehovani ma e’yo olu’i.

¹⁸Yehova co ma imbataru okporu tu ra ’bo, te eri feni ma dra dri ku.

¹⁹Emi zi mani kalitile onyini, ma nga fi kalitile ndea, ma nga awa’difo fe Yehova dri.

²⁰Kalitile Yehovani eri ’di; ’ba onyi be ’diyi nga fi aleniani,

²¹Ma nga awa’difo fe mi dri, mini e’yoni omvile ma tia ’borisi, mini ecale pata maniru ’borisi.

²² Oni ’ba jo sipi ’diyini gale siri ofu ovuzu jo kalati ma oni driruri’i.

²³Yehova ’ye e’yo ’dirini; e’yo nderi ama milia osutaru.

²⁴O’du ’diri eri o’du Yehovani ’baleri; ama nga ayiko ’ba nyona be o’du’disi.

²⁵Mi pa ama fo, ama matu ’ba mi vu, Yehova la! Yehova la, ama matu ’ba mi vu, mi fe ama dri drileba fo!

²⁶Asi ndriza ’ba emupi Yehova ma rusiri dri! Ama fe asi ndriza mi dri engazu jo Yehovani ma alia: ra,

²⁷Yehovani Munguni, eri fe diza ama dri ’bo. Emi oti anyapa edetaru bakasi, adaru, emi oti eri pari edeta edezuri ma o’yu ma ruaa!

²⁸Mi Mungu mani, ma nga awa’difo fe mi dri; mi Mungu mani, ma nga mi inzi uru.

²⁹Emi ma fe awa’difo Mungu difo, erini ovule onyirurisi; eri ma yiki alerurini adrile ’dani ’danirisi!