Read lugbara Zaburi 119 Bible Online

Zaburi 119 - lugbara bible

Zaburi 119

¹’Ba acipi letia kililiru, acipi azita Yehovani ma alia ’diyi yi drile bare!

²’Ba e’yo eti nzeza erini ma ta mbapi, eri ndapi asi driasi ’diyi yi drilebaru!

³Adam, yi ’yeni e’yo onzi ku, yi aci leti erini ma alia!

⁴Mi azi azita mini imbale ’diyi ama dri ama ma ’ye yi ani asi driasi.

⁵Geri mani ka te ovu edezaru mani pa sozu ci ’dani mani azita mini sile ’diyi ’yezu ani, ’yeke fo!

⁶Ka’dini ma ngani ovu drinzasi ku, ma ka nga azita mini azile ’diyi inzi dria raria.

⁷Ma nga awa’difo fe mi dri asi kililirurisi, ma ka nga e’yo mini lile kililiru ’diyi oni raria.

⁸Ma nga azita mini sile ’diyi ’ye ra; mi ku ma teketeke ku fo!

⁹Karilau eco leti erini ’bazaru alaru geri ngosi ya? Eri ma ’ba asi e’yo miniri ma vuti bizu.

¹⁰ Ma nda mi ma asi driasi ra; mi fe ma ma aba azita mini ’diyi kuzu ku fo!

¹¹Ma mba e’yo mini ma ta ma asia ’bo, ma kazu e’yo onzi ’yezu mi vu ku.

¹²Yehova la, mi inzizaru; mi imba ma azita mini sile ’diyisi!

¹³Ma ece ma tisi e’yo liza efupi mi tilia ’diyi dria.

¹⁴Ma adri ovu ayikosi e’yo eti nzeza mini ’diyi ma gerisi ekile lonyi driasirile.

¹⁵Ma nga asisile dro azita mini imbale ’diyi ma dria, ma nga leti mini ’diyi inzi ra.

¹⁶Ma nga ovu ayikosi azita mini sile ’diyisi; ma dri ngani e’yo mini avi ku.

¹⁷Mi ’ye ati’bomini vu asi ndrizasi fo, ma ma ovu idriru ani, ma ma ’ye vini e’yo mini indi.

¹⁸Mi zi ma mile, ma ma ndre ani e’yo osutaru ’diyi azita mini ma alia.

¹⁹Ma nyakua ani’boni; mi ma zi azita mini ’diyima dri ku fo!

²⁰Orindi mani nye i nyo nye ava mani ’bale o ’du dria e’yo liza mini ’diyi ma e’yosirisi,

²¹Mi ega ’ba afuru trile tri azita minima geri kupi ra ’diyi ma dria ’bo.

²²Mi nze o’data pi ma vu ziri anguonzi be, mani e’yo eti mini nzele ’diyi ma ta mbale ’borisi.

²³Opianzi ka ri e’yo ’yo ma ruaa ti, te ati’bo mini dro asisile ini azita mini sile ’diyi ma dria ’dani.

²⁴E’yo eti nzeza mini ’diyi yi ayiko fe ma drini, yi ovu ekile ’ba ma dri e’yo amapi ’diyile.

²⁵Orindi mani ekpa i va irifuraa; mi ’ba ma idriru ekile mini e’yoni ’yolerile fo!

²⁶Ma e’da geri mani ’diyi, te mi omvi e’yoni ma dri ra; mi ma imba ma azita mini sile ’diyisi!

²⁷Mi fe ma ma va azita mini imbale ’diyi ma geri ra, geri ’ disi ma nga ani asisile dro ’yeta mini osutaru ’diyi ma dria.

²⁸Asi mani aka candisi aka aka; mi fe okpo mini ma dri ekile mini e’yoni ’yolerile!

²⁹Mi ma nze geri inzo lizaniri ma vusi re; mi fe azita miniri ma dri asi ndrizasi!

³⁰Ma pe geri asi adaruniri ’bo, ma ’ba e’yo liza mini ’diyi ma milia ’bo.

³¹Ma ebi ma e’yo eti nzeza mini ’diyi be ci; Yehova, mi fe ma ma isu drinza ku fo!

³²Ma nga nzu azita mini ma geria mi ka nga asi mani zi walaru ’boria!

³³Yehova, mi imba ma geri azita mini sile diyini risi; ma nga eri ta mba troa asiria.

³⁴Mi fe e’yo vaza ma dri, ma nga azita mini ma ta mba ani, ada, ma nga eri ’ye ma asi driasi,

³⁵Mi fe ma ’ma aci e’yo mini azile ’diyi ma geria, a’disiku ma ovu ayikosi erisi,

³⁶Mi se asi mani e’yo eti mini nzele ’diyi vu, li ’baza afasiri vu ku!

³⁷Mi oja ma mile, yi ma ndre afa toko toko ’diyi ku; mi fe idri ma dri geri mini ma alia.

³⁸Mi fe e’yo mini ma so pa okporu ati’bo mini dri; e’yo nde ovu ’ba mi rupi ’diyiniri.

³⁹Mi oja o’data mani ruleri kalaa; e’yo mini lile ’diyini ovule onyirurisi.

⁴⁰Mi ndre, ma le azita mini imbale ’diyi avasi ra; mi ’ba ma idriru onyi minisi!

⁴¹Mi fe yiki aleru miniri ma eca ma vu fo, Yehova, adaru pata miniri, ekile mi e’yoni ’yolerile;

⁴²’dini ma nga e’yo omvi ani ’ba ma o’dapiri ma tia, mani e’yo mini a’ile rarisi.

⁴³Mi nze e’yo ada miniri ma tiliasi teketeke ku, mani e’yo liza mini tele asi tezasirisi.

⁴⁴Ma nga azita mini ’ye ani o’du dria ’dani ’dani;

⁴⁵azini ma nga aci truzaru, mani azita mini imbale ’diyi ndale ’borisi.

⁴⁶Ma nga vini e’yo eti nzeza mini ’diyi ma e’yo olu opi ma drilia, ma ngani ovu drinzasi ku.

⁴⁷Te ma nga ovu ayikosi azita mini mani lele ’diyi ma e’yosi.

⁴⁸Ma nga ma dri eju azita mini mani lele ra ’diyi vu, azini ma nga asisile dro azita mini sile ’diyi ma dria.

⁴⁹Mi ega e’yo mini ’yole ati’bo mini tia, mini ani asi teza fezu ma driri’i.

⁵⁰Asi omiza mani candi mani aliari eri ’di i e’yo minirini ma ’bale idriru rarisi.

⁵¹’Ba afuru ’diyi yi ’ba ma aparakaru tu, te ma Olani ma kalaa azita mini kuzu ku.

⁵²Ma ega e’yo liza mini drio ’diyi, Yehova, ma omi ma ngulupi ma asi ani.

⁵³Ma asi ve ma alia aciru, ’ba onzi azita mini kupi raa ’diyisi.

⁵⁴Azita mini sile ’diyi yi ovu ongo mani pari mani ovuzu ani’boruria.

⁵⁵Ma ega ru mini inisi, Yehova, ma ’ye azita mini imbrueri ra,

⁵⁶E’yo maniri ’dini, mani azita mini imbrue ’diyi ma ta mbalerisi.

⁵⁷Yehovani lonyi maniri’i; ma ’yo ma nga e’yo erini ’ye ra.

⁵⁸Ma ’ba matu ma asi driasi, asi ndriza mini a’izu; mi ovu ma vu yikisi e’yoni ’yolerile.

⁵⁹Ma dro asisile mani leti dria, ma oja ma pa e’yo eti nzeza mini ’diyi vu;

⁶⁰ma ’ye mbele mbele, ma cini dri ku azita mini ’yezu.

⁶¹’Ba onzi ’diyi ma baka ka tro ma; ombe ra ti, ma dri avini azita minirisi ku.

⁶²Ma nga enga awa’difo fezu mi dri iniayii, e’yo mini lile kililiru ’diyi ma e’yosi.

⁶³Ma ovu ’ba mi rupi ’diyi be dria agyiru, ’ba azita mini imbale ’diyi ’yepi ’diyi be indi.

⁶⁴Nyaku ga yiki aleru minirisi tre, Yehova; mi imba ma azita mini sile ’diyisi fo!

⁶⁵Mi ’ye ati’bo mini onyiru tu, Yehova, ekile mini e’yoni ’yolerile.

⁶⁶Mi imba ma e’yo liza onyirurisi, azini nitasi indi, mani azita mini a’ile rarisi.

⁶⁷De oga ’ba inzani ma ku, ma ku geri mini; te curu’do ma e’yo mini ma ta mba ra.

⁶⁸Mi ovu onyiru, mi ’ye e’yo onyiru indi;mi imba ma azita mini sile ’diyi nizu.

⁶⁹’Ba asi afu be ’diyi li inzo ma dria, te ma’i, ma nga azita mini imbale ’diyi ma ta mba ma asi driasi ra;

⁷⁰asi yini ovu osoru odule; te ma’i, ma ovu ayikosi azita minisi.

⁷¹’Bani ma inzazuri ovu ma dri onyiru, ma ma oni azita mini sile ’diyi ani.

⁷²Azita engapi mi tiliari eri onyiru ma vu ndeni, aga dahabu pi mele be alifu alifu ra.

⁷³Dri mini ’ba ma ra, ede ma wura indi; mi fe e’yo vaza ma dri fo, ma ma oni azita mini ’diyi ani.

⁷⁴’Ba mi rupi ’diyi nga ma ndre ra, yi nga ovu ayikosi, mani ovule asi tezasi e’yo minisirisi.

⁷⁵Yehova la, ma ni e’yo liza mini ’diyi yi kililiru, mi fe candi ma dri asi adaru minirisi.

⁷⁶Mi fe yiki mini aleruri ma omi ma asi fo, ekile e’yo mini ’yole ati’bo mini ma tiarile.

⁷⁷Mi fe yiki mini asi ndriza be ’diyi ma eca ma vu, ma ma ovu ani idriru; azita minirini ovule ayiko manirisi.

⁷⁸Mi fe ’ba afuru ma ovu drinzasi yini ma ’bele va inzosirisi; te ma nga asisile mani dro azita mini imbale ’diyi ma dria.

⁷⁹Mi fe ’ba mi rupi ’diyi ma oja yi mavu, te yi nga e’yo eti nzeza mini ’diyi ni ra.

⁸⁰Mi fe ma asi ma ovu kililiru azita mini sile ’diyi ma alia, ma ma ovu drinza kokoru ani.

⁸¹Ma orindi ma okpo de ra pata mini tezu; ma ovu asi tezasi e’yo minisi.

⁸²Mile mani ’ye bi, mani e’yo mini teria, mani ’yoria, Mi nga ma asi omi a’dungare ya?

⁸³A’disiku ma ofu ekile jurua acika aliarile, te ti, ma dri avini azita mini sile ’diyisi ku.

⁸⁴Ati’bo mini ma o’du yi si ya? Mi nga ’ba ma inzapi ’diyi ma e’yo li a’dungare ya?

⁸⁵’Ba afuru yi ga awi ma dri ’bo, ’ba ’diyi ovuni azita minirini lelerile ku.

⁸⁶Azita mini azile ’diyi yi dria adaru; ’ba yi ma inza e’yo inzorurisi; mi ko ma aza fo!

⁸⁷Ace were yi ja ma dri nyakua ra; te ma kuni azita mini imbale ’diyi ku.

⁸⁸Mi ’ba ma idriru yiki mini aleruri vusi fo, ’dini ma nga e’yo eti nzeza efupi mi tilia ’diyi ’ye ra.

⁸⁹Yehova, e’yo miniri ovu ’bua ojakokoru ’dani.

⁹⁰Asi adaru miniri ovu a’bianzi vusi dria; mi fe ndra nyakuni pa sozu ci, te eri pa so kirikiri ’dani.

⁹¹Yi ovu ’dani ecazu andru ekile mini azilerile; afa driani ovule mi ati’barurisi.

⁹²Azita mini ka ndra ovu ayiko mani ku, te’do ma ja dri candi mani ma alia ’bo.

⁹³Ma dri ngani avi azita mini imbale ’diyisi ku; mini idri fele ma dri azita nde ’diyisirisi.

⁹⁴Ma mini, mi pa ma fo; mani azita mini imbale ’diyi ndrule ’borisi.

⁹⁵’Ba onzi ’diyi mba ma ’bo, lezu ma dri jazu; te ma nga e’yo eti nzeza mini ’diyi ma e’yo ega’i.

⁹⁶Ma ndre e’yo ovupi kililiru ’diyi dria ma asiza ci, te azita miniri walaru tu.

⁹⁷Ma le azita mini avasi ’doni ya! Ma asisile dro drinia etu dria.

⁹⁸Azita miniri fe ma ovu onduaru aga ari’ba mani ra, azita nde ’diyini ovule ma be ’danirisi.

⁹⁹Ma ovu e’yo vaza be aga ’ba ma imbapi ’diyi dria ra, mani asisile drole e’yo eti nzeza mini ’diyi ma driarisi.

¹⁰⁰Ma e’yo va aga ’ba dezaru ’diyi ra, mani azita mini imbale ’diyi ma ta mbalerisi.

¹⁰¹Ma oga ma pa muko leti onzi ’diyia dria si, ma ma ’ye e’yo mini ani.

¹⁰²Ma kuni e’yo liza mini ’diyi ma geri ku, mini ma imbale ’borisi.

¹⁰³E’yo mini ma aji alu ma tilia ’doni ya! Yi alu ma tilia aga anyuoso ra

¹⁰⁴Azita mini imbale ’diyisi ma isu e’yo vaza ra; e’yo ’dirisi ma ngu leti inzoru ’diyi dria onzi.

¹⁰⁵E’yo mini ovu tala ma paniri, azini diza leti mania.

¹⁰⁶Ma so oyo ’bo, ma ’ba e’yoni ci, mani ngazu e’yo liza mini kililiru ’diyi ’yezu ani.

¹⁰⁷Ma ovu inzata amboru be; mi ’ba ma idriru fo, Yehova ekile mini e’yoni ’yolerile

¹⁰⁸Yehova la, mi a’i e’yo awa’diforu efupi ma tilia ’diyi fo, mi imba ma e’yo liza mini ’diyisi.

¹⁰⁹Idri mani ovu dri mani ma alia etuzu etuzu, te ti, ma dri avini azita minisi ku.

¹¹⁰’Ba onzi ’diyi ’be emba ma dri ’bo, te ma kuni azita mini imbale ’diyi ma geri ku.

¹¹¹Ma ’du e’yo eti nzeza mini ’diyi awita mani ’daniriru ’bo; yini ayiko fele ma asiarisi.

¹¹²Ma fe ma asi ’bo azita mini site ’diyi ’yezu ’dani ’dani, kpere asiria,

¹¹³Ma ngu ’ba asi iri be ’diyi onzi, te ma le azita mini.

¹¹⁴Mi ovu pari mani ma zizu aleniari azini gombere mani indi; ma ovu asi tezasi e’yo minirisi.

¹¹⁵Emi ’ba e’yo onzi ’yepi ’diyi, emi nga ma ageiasi ra, ma ma mba Mungu mani ma azita ma ta ani.

¹¹⁶Mi edre ma uru ekile e’yo minirini ’yolerile, ma ma ovu idriru ani, mi fe ma ovu drinzasi e’yo mani lule asi tezasirisi ku!

¹¹⁷Mi edre ma uru, ma nga ovu pazaru ani, ma nga azita mini sile ’diyi inzi’dani!

¹¹⁸Mi ’ba ’ba dria azita mini sile ’diyi ma geri kupi ’diyi tokoru; yi ma lokirini ovule inzorurisi.

¹¹⁹Mi da ’ba onzi nyakua ’diyi dria amve ekile okurunyale; e’yo ’disi ma le e’yo eti nzeza mini ’diyi ra.

¹²⁰Rua mani ya ya mani mi rulerisi, ma ovu urisi e’yo mini lile ’diyisi.

¹²¹Ma ’ye e’yo liza azini e’yo kililiru ’bo; mi ku ma ’ba ma inzapi ’diyi dri ku.

¹²²Mi so pa ati’bo mini ma kalaa tobo fezu e’yo onyirusi; mi ku ’ba afuru ’diyi ma inza maku.

¹²³Mile mani oro para mini tezu, e’yo mini kililiruri be.

¹²⁴Mi ’ye ati’bo mini be yiki aleru miniri vusi, mi imba ma azita mini sile ’diyi nizu.

¹²⁵Ma ovu ati’bo mini, mi fe e’yo vaza ma dri, ’dini ma ma ni e’yo eti nzeza mini ’diyi ani!

¹²⁶Etu Yehovani ngazu e’yo ’yezuri eca ni ’bo, ’bani azita mini ojale tokorurisi.

¹²⁷E’yo ’disi ma le azita mini ’diyi aga dahabu ra, adaru aga dahabu alatararu ra.

¹²⁸E’yo ’disi ma ega azita mini imbale e’yo dria ma dria ’diyi yi onyiru; ma ngu geri inzoru ’diyi dria onzi.

¹²⁹E’yo eti nzeza mini ’diyi ovu osuzaru; e’yo ’disi ma asi mba yi ma ta.

¹³⁰’Ba ka e’yo mini ma ti zi ra, eri diza fe; eri e’yo vaza fe ’ba ondua kokoru dri.

¹³¹Ma zi ma ti walaru, ma se ava okporu, azita miniri ma avani ma vale turisi.

¹³²Mi oja mi ma vu, mi ’ba yiki ma vu, mini adrile ’bale ’ba mi ru lepi ’diyi vorile.

¹³³Mi ede pa ’baza mani ovuzu e’yo mini ma alia ’dani, mi ku e’yo onzi aluni ma adri opiru ma drilia ku.

¹³⁴Mi onze ma inzata ’bani ma inzazuri ma alia, ma nga azita mini imbale ’diyi ’ye ani.

¹³⁵Mi fe andreti mini ma di ati’bo mini ma dria, mi imba ma azita mini sile ’diyisi.

¹³⁶Mindre ra ma milia yi razale, ’bani azita mini ma vuti bile kurisi,

¹³⁷Mi alatararo, Yehova, e’yo mini lile ’diyi yi kililiru indi.

¹³⁸Mi azi e’yo eti nzeza mini ’diyi e’yo onyiru ma alia azini asi adarusi dria,

¹³⁹Ava mini fu ma tu, ari’ba mani yini e’yo mini avile rarisi,

¹⁴⁰E’yo mini ovu alatararu tu; e’yo ’disi ati’bo mini le eri avasi ra.

¹⁴¹Ma ovu were, ’ba ngu ma onzi te ti, ma dri avini azita mini imbale ’diyisi ku.

¹⁴²Onyi miniri onyi ’dani ’daniri’i azita miniri eri adari’i.

¹⁴³Candi bi ma, rua suza be, te ti, ma ovu ayikosi azita minisi.

¹⁴⁴E’yo eti nzeza mini ’diyi yi onyiru ’dani ’dani; mi fe e’yo vaza ma dri, ma nga ovu idriru ani beni.

¹⁴⁵Ma omve mi asi driasi ra; mi omvi e’yo ma tia, Yehova la Ma nga azita mini sile ’diyi ma ta mba ra.

¹⁴⁶Ma omve mi ra; mi pa ma fo, ’dini ma nga e’yo eti nzeze mini ’diyi ’ye ra.

¹⁴⁷Ma enga de nga angu atini ku ma wu ra; ma ovu asi tezasi e’yo mini ’diyisi.

¹⁴⁸Ma enga mile be odruni yi mvuria, ma ma dro asisile mani e’yo mini ma dria ani.

¹⁴⁹Mi eri o’duko mani yiki mini aleruri vusi fo; mi ’ba ma idriru, Yehova la e’yo liza mini ’diyi vusi.

¹⁵⁰’Ba e’yo onzi ma vuti bipi ’diyi esi ma vu inyia; yi ovu azita miniri be ziri.

¹⁵¹Te mi ovu inyia, Yehova, azita mini ’diyi yi dria e’yo adani.

¹⁵²E’yo eti nzeza mini ’diyisi mi ni drio mi ’ba yi pa sozu ’dani ’dani,

¹⁵³Mi ega candi mani, mi ari ma a’disiku ma dri avini azita minirisi ku.

¹⁵⁴Mi ko ma aza e’yo liza mani ma alia, mi onze ma; mi ’ba ma idriru mini e’yori ’yolerile!

¹⁵⁵Pata ovu ’ba onzi ’diyi be ziri yini azita mini sile ’diyi ndale kurisi.

¹⁵⁶Yiki mini asi ndriza be ’diyi yi amboru, Yehova la; mi ’ba ma idriru e’yo liza mini vusi fo.

¹⁵⁷’Ba ma inzapi ’diyi ari’ba mani be yi karakarau, te ma ojani ma kalaa e’yo eti nzeza mini ’diyi kuzu ku.

¹⁵⁸Ma ndre ’ba ’yepi lokirisi ’diyi, ma ovu ani candisi yini e’yo mini ’yele kurisi.

¹⁵⁹Mi osu leta mani azita mini imbale ’diyi vuri ma e’yo! Mi ’ba ma idriru fo, Yehova, yiki mini alaruri vusi.

¹⁶⁰E’yo mini ’diyi ma kalafe yi dria e’yo adani; e’yo mini lile onyiru ’diyi dria alu alu nga adri ’dani ’dani.

¹⁶¹Opianzi inza ma e’yo kokoru ra ’bo, te asi mani ovu taisi e’yo mini ’yole ’diyisi.

¹⁶²Ma ovu ayikosi e’yo minisi ekile ’ba afa opale ombaari isupi turile.

¹⁶³Ma ngu e’yo inzoru onzi ma asi driasi, te ma le azita mini ra.

¹⁶⁴O’du alu alu vusi ma inzi mi pale aziri e’yo liza mini kililiru ’diyisi.

¹⁶⁵’Ba mi azita lepi ’diyi ovu asi anzuru be amboru; e’yo azini ngani yi si kumule ku.

¹⁶⁶Ma te pata miniri asi tezasi ’bo, Yehova la, ma ’ye azita mini ’diyi ra,

¹⁶⁷Orindi mani ’ye e’yo eti nzeza mini ’diyi ’bo; ma le yi avasi tu.

¹⁶⁸Ma ’ye azita mini imbale ’diyi pi e’yo eti nzeza mini ’diyi be ra, geri mani driani ovule mi miliarisi.

¹⁶⁹Mi fe wuta mani ma ca mi vu ogogo fo, Yehova; mi fe e’yo vaza ma dri mini e’yoni ’yolerile.

¹⁷⁰Mi fe matu ’baza maniri ma ca mi milia ra; mi ari ma mini e’yoni ’yolerile.

¹⁷¹Mi fe inzita ma efu ma tilia, mini ma imbale azita mini sile ’diyisi.

¹⁷²Mi fe andre mani ma ngo ongo e’yo minisi, azita mini ’diyi driani ovule onyirurisi.

¹⁷³Mi dri ma ovu ngonde ma aza kozu fo, mani azita mini imbale ’diyi pele ’borisi.

¹⁷⁴Pata mini ma ava fu ma tu, Yehova, azita miniri eri ayiko fe ma drini.

¹⁷⁵Mi fe orindi mani ma ovu idriru, ma nga di mi inzi ra mi fe e’yo liza mini ’diyi ma ko ma aza fo.

¹⁷⁶Ma avi geri ekile kabiloni adrile avilerile; mi nda ati’bo mini fo, ma drini avile azita mini ’diyisi kurisi. (Ongo tuzu ururi.)