Read lugbara Zaburi 143 Bible Online

Zaburi 143 - lugbara bible

Zaburi 143

¹Mi eri zita mani fo, Yehova, mi co bile mini matu ’baza mani erizu! i Mi a’i ma asi adaru mini pisi e’yo alatararu mini be!

²Mi ’ba ati’bo miniri e’yo liza mini ma alia ku; a’disiku mi ma milia yi ngani ’ba rua ari be ’diyi ma aluni la kililiru ku.

³A’disiku juru dro ma vuti; eri co idri mani va nyakua; eri ’ba ma ovuzu angu iniru alia, ekile ’ba drapi drio ’diyile.

⁴E’yo ’disi candi oga i ma asia ra; asi mani ovu erezaru ocokosi.

⁵Ma ega ewu ndra okori ma e’yo, ma asisile dro ’yeta mini dria ’diyi ma e’yo dria; ma osu vini azi mini ’yele mi drisi ’diyi ma e’yosi.;

⁶Ma eju ma dri mi vu; orindi maniri ovu mi koresi ekile nyaku angazarurini ovule ozoo ma abirisirile.

⁷Mi omvi e’yo ma tia fo, Yehova! Orindi mani ’ye i de de! Mi zi mi mile masi ku, ma kazu ecazu ekile ’ba sipi va ’bile ma alia ’diyile ku.

⁸Mi fe ma ma eri yiki ale be miniri o’bitisi, mani mi a’ile rarisi. Mi ece ma dri geri mini lezu ma ma aci aniri, a’disiku ma asi mani enga mi vu.

⁹Mi pa ma juru mani ma dria fo, Yehova! Ma nzu mi vu ma zizu!

¹⁰Mi imba ma e’yo mini leleri ’yezu, mini ovule Mungu manirisi! Orindi mini eri onyiru; mi ce ma dri angu e’yo kililiruriniri ma alia!

¹¹Mi ’ba ma idriru ru minisi fo, Yehova! Mi ofu orindi mani candi ma aliasi, mini ovule alatararusi!

¹²Yiki aleru minirisi mi ofu juru mani, mi ja ’ba ma inzapi ’diyi ma dri dria, mani ovule ati’bo miniri’irisi.