Read lugbara Zaburi 144 Bible Online

Zaburi 144 - lugbara bible

Zaburi 144

¹Inzita Yehova vu, eri’i oni manini; eri dri mani imba omba ’bazu, azini eri drianzi mani imba a’di ’dizu;

²eri onyi mani, azini kali abi be okporu maniri, pari mani apazuri azini ’ba ma papiri, gombere mani, ’ba mani asi ’bazu driniari, ’ba ’ba mani o’bapi va ma palaari’i,

³Yehova, ’bari a’di afani ya, mini e’yo erini egazu? Mva ’baniri a’di afani ya, mini eri nezu?

⁴’Ba yi ekile oli tokorile, o’du erini ’diyi yi ekile endrilendri agapi agarile,

⁵Mi etra ’bu mini, Yehova, mi esi va fo! Mi elo oni, acikani nga efu ani!

⁶Mi ofu diza ovini yi erezu, mi ogbi ’ye mini yi ’yezu onzi!

⁷Mi eju mi dri engazu uru, mi enze ma yi amboru ma aliasi, mi pa ma ’ba jururu ’diyi ma dria fo!

⁸Ti yinisi yi e’yo toko o’yo, dri ndi yini eri dri ndi inzo lizaniri.

⁹Ma nga ongo o’diru ngo mi dri, Mungu la; o’di baka mudririsi ma nga ongo inzitani ngo mi dri,

¹⁰mi pata fepi opi driri, mi Daudi ati’bo mini enzepi sei onzi ma siasiri’i.

¹¹Mi enze ma, mi pa ma ’ba jururu ’diyi ma dria; ti yinisi yi e’yo toko o’yo, dri ndi yini eri dri ndi inzo lizaniri.

¹²Ama anzipi, ewu yini ovuzu ’ba o’dirurisi, ka nga ovu ekile pati zopi amborule; ama ezopi ka nga ovu ekile oni pa sopi piriru opale ’bazu opi ma jo ma kalaa ’diyile;

¹³ero amani yi ka nga ga nyaka ndu ndusi tre; kabilo amani yi ka nga anzi alifu azini alifu mudri oti angu amaniria;

¹⁴ti amani ka nga ovu anzi be alia kakau; ari’ba ka nga efi ku, azini ama ka nga fu mu ku, azini lulu ka nga ovu ama vile geri tia ku;

¹⁵ayiko ovu ’ba ovupi ’dinile ’diyi dri! Adaru ayiko ovu ’ba Yehovani ovuzu Mungu yiniru ’diyi dri!